Utshovঅধ্যায় 29
29.1
বাসুদেব উবাচ
অবিনাশং সংজয় পাণ্ডবানা;মিচ্ছাম্যহং ভূতিমেষাং প্রিয়ং চ
তথা রাজ্ঞো ধৃতরাষ্ট্রস্য সূত; সদাশংসে বহুপুত্রস্য বৃদ্ধিম্
29.2
কামো হি মে সংজয় নিত্যমেব; নান্যদ্ব্রূয়াং তান্প্রতি শাম্যতেতি
রাজ্ঞশ্চ হি প্রিয়মেতচ্ছৃণোমি; মন্যে চৈতত্পাণ্ডবানাং সমর্থম্
29.3
সুদুষ্করশ্চাত্র শমো হি নূনং; প্রদর্শিতঃ সংজয় পাণ্ডবেন
যস্মিন্গৃদ্ধো ধৃতরাষ্ট্রঃ সপুত্রঃ; কস্মাদেষাং কলহো নাত্র মূর্চ্ছেৎ
29.4
তত্ত্বং ধর্মং বিচরন্সংজয়েহ; মত্তশ্চ জানাসি যুধিষ্ঠিরাচ্চ
অথো কস্মাত্সংজয় পাণ্ডবস্য; উত্সাহিনঃ পূরয়তঃ স্বকর্ম
যথাখ্যাতমাবসতঃ কুটুম্বং; পুরাকল্পাত্সাধু বিলোপমাত্থ
29.5
অস্মিন্বিধৌ বর্তমানে যথাব;দুচ্চাবচা মতয়ো ব্রাহ্মণানাম্
কর্মণাহুঃ সিদ্ধিমেকে পরত্র; হিত্বা কর্ম বিদ্যয়া সিদ্ধিমেকে
নাভুঞ্জানো ভক্ষ্যভোজ্যস্য তৃপ্যে;দ্বিদ্বানপীহ বিদিতং ব্রাহ্মণানাম্
29.6
যা বৈ বিদ্যাঃ সাধয়ন্তীহ কর্ম; তাসাং ফলং বিদ্যতে নেতরাসাম্
তত্রেহ বৈ দৃষ্টফলং তু কর্ম; পীত্বোদকং শাম্যতি তৃষ্ণয়ার্তঃ
29.7
সোঽয়ং বিধির্বিহিতঃ কর্মণৈব; তদ্বর্ততে সংজয় তত্র কর্ম
তত্র যোঽন্যত্কর্মণঃ সাধু মন্যে;ন্মোঘং তস্য লপিতং দুর্বলস্য
29.8
কর্মণামী ভান্তি দেবাঃ পরত্র; কর্মণৈবেহ প্লবতে মাতরিশ্বা
অহোরাত্রে বিদধত্কর্মণৈব; অতন্দ্রিতো নিত্যমুদেতি সূর্যঃ
29.9
মাসার্ধমাসানথ নক্ষত্রয়োগা;নতন্দ্রিতশ্চন্দ্রমা অভ্যুপৈতি
অতন্দ্রিতো দহতে জাতবেদাঃ; সমিধ্যমানঃ কর্ম কুর্বন্প্রজাভ্যঃ
29.10
অতন্দ্রিতা ভারমিমং মহান্তং; বিভর্তি দেবী পৃথিবী বলেন
অতন্দ্রিতাঃ শীঘ্রমপো বহন্তি; সংতর্পয়ন্ত্যঃ সর্বভূতানি নদ্যঃ
29.11
অতন্দ্রিতো বর্ষতি ভূরিতেজাঃ; সংনাদয়ন্নন্তরিক্ষং দিবং চ
অতন্দ্রিতো ব্রহ্মচর্যং চচার; শ্রেষ্ঠত্বমিচ্ছন্বলভিদ্দেবতানাম্
29.12
হিত্বা সুখং মনসশ্চ প্রিয়াণি; তেন শক্রঃ কর্মণা শ্রৈষ্ঠ্যমাপ
সত্যং ধর্মং পালয়ন্নপ্রমত্তো; দমং তিতিক্ষাং সমতাং প্রিয়ং চ
এতানি সর্বাণ্যুপসেবমানো; দেবরাজ্যং মঘবান্প্রাপ মুখ্যম্
29.13
বৃহস্পতির্ব্রহ্মচর্যং চচার; সমাহিতঃ সংশিতাত্মা যথাবৎ
হিত্বা সুখং প্রতিরুধ্যেন্দ্রিয়াণি; তেন দেবানামগমদ্গৌরবং সঃ
29.14
নক্ষত্রাণি কর্মণামুত্র ভান্তি; রুদ্রাদিত্যা বসবোঽথাপি বিশ্বে
যমো রাজা বৈশ্রবণঃ কুবেরো; গন্ধর্বয়ক্ষাপ্সরসশ্চ শুভ্রাঃ
ব্রহ্মচর্যং বেদবিদ্যাঃ ক্রিয়াশ্চ; নিষেবমাণা মুনয়োঽমুত্র ভান্তি
29.15
জানন্নিমং সর্বলোকস্য ধর্মং; ব্রাহ্মণানাং ক্ষত্রিয়াণাং বিশাং চ
স কস্মাত্ত্বং জানতাং জ্ঞানবান্স;ন্ব্যায়চ্ছসে সংজয় কৌরবার্থে
29.16
আম্নায়েষু নিত্যসংয়োগমস্য; তথাশ্বমেধে রাজসূয়ে চ বিদ্ধি
সংয়ুজ্যতে ধনুষা বর্মণা চ; হস্তত্রাণৈ রথশস্ত্রৈশ্চ ভূয়ঃ
29.17
তে চেদিমে কৌরবাণামুপায়;মধিগচ্ছেয়ুরবধেনৈব পার্থাঃ
ধর্মত্রাণং পুণ্যমেষাং কৃতং স্যা;দার্যে বৃত্তে ভীমসেনং নিগৃহ্য
29.18
তে চেত্পিত্র্যে কর্মণি বর্তমানা; আপদ্যেরন্দিষ্টবশেন মৃত্যুম্
যথাশক্ত্যা পূরয়ন্তঃ স্বকর্ম; তদপ্যেষাং নিধনং স্যাত্প্রশস্তম্
29.19
উতাহো ত্বং মন্যসে সর্বমেব; রাজ্ঞাং যুদ্ধে বর্ততে ধর্মতন্ত্রম্
অয়ুদ্ধে বা বর্ততে ধর্মতন্ত্রং; তথৈব তে বাচমিমাং শৃণোমি
29.20
চাতুর্বর্ণ্যস্য প্রথমং বিভাগ;মবেক্ষ্য ত্বং সংজয় স্বং চ কর্ম
নিশম্যাথো পাণ্ডবানাং স্বকর্ম; প্রশংস বা নিন্দ বা যা মতিস্তে
29.21
অধীয়ীত ব্রাহ্মণোঽথো যজেত; দদ্যাদিয়াত্তীর্থমুখ্যানি চৈব
অধ্যাপয়েদ্যাজয়েচ্চাপি যাজ্যা;ন্প্রতিগ্রহান্বা বিদিতান্প্রতীচ্ছেৎ
29.22
তথা রাজন্যো রক্ষণং বৈ প্রজানাং; কৃত্বা ধর্মেণাপ্রমত্তোঽথ দত্ত্বা
যজ্ঞৈরিষ্ট্বা সর্ববেদানধীত্য; দারান্কৃত্বা পুণ্যকৃদাবসেদ্গৃহান্
29.23
বৈশ্যোঽধীত্য কৃষিগোরক্ষপণ্যৈ;র্বিত্তং চিন্বন্পালয়ন্নপ্রমত্তঃ
প্রিয়ং কুর্বন্ব্রাহ্মণক্ষত্রিয়াণাং; ধর্মশীলঃ পুণ্যকৃদাবসেদ্গৃহান্
29.24
পরিচর্যা বন্দনং ব্রাহ্মণানাং; নাধীয়ীত প্রতিষিদ্ধোঽস্য যজ্ঞঃ
নিত্যোত্থিতো ভূতয়েঽতন্দ্রিতঃ স্যা;দেষ স্মৃতঃ শূদ্রধর্মঃ পুরাণঃ
29.25
এতান্রাজা পালয়ন্নপ্রমত্তো; নিয়োজয়ন্সর্ববর্ণান্স্বধর্মে
অকামাত্মা সমবৃত্তিঃ প্রজাসু; নাধার্মিকাননুরুধ্যেত কামান্
29.26
শ্রেয়াংস্তস্মাদ্যদি বিদ্যেত কশ্চি;দভিজ্ঞাতঃ সর্বধর্মোপপন্নঃ
স তং দুষ্টমনুশিষ্যাত্প্রজান;ন্ন চেদ্গৃধ্যেদিতি তস্মিন্ন সাধু
29.27
যদা গৃধ্যেত্পরভূমিং নৃশংসো; বিধিপ্রকোপাদ্বলমাদদানঃ
ততো রাজ্ঞাং ভবিতা যুদ্ধমেত;ত্তত্র জাতং বর্ম শস্ত্রং ধনুশ্চ
ইন্দ্রেণেদং দস্যুবধায় কর্ম; উত্পাদিতং বর্ম শস্ত্রং ধনুশ্চ
29.28
স্তেনো হরেদ্যত্র ধনং হ্যদৃষ্টঃ; প্রসহ্য বা যত্র হরেত দৃষ্টঃ
উভৌ গর্হ্যৌ ভবতঃ সংজয়ৈতৌ; কিং বৈ পৃথক্ত্বং ধৃতরাষ্ট্রস্য পুত্রে
যোঽয়ং লোভান্মন্যতে ধর্মমেতং; যমিচ্ছতে মন্যুবশানুগামী
29.29
ভাগঃ পুনঃ পাণ্ডবানাং নিবিষ্ট;স্তং নোঽকস্মাদাদদীরন্পরে বৈ
অস্মিন্পদে যুধ্যতাং নো বধোঽপি; শ্লাঘ্যঃ পিত্র্যঃ পররাজ্যাদ্বিশিষ্টঃ
এতান্ধর্মান্কৌরবাণাং পুরাণা;নাচক্ষীথাঃ সংজয় রাজ্যমধ্যে
29.30
যে তে মন্দা মৃত্যুবশাভিপন্নাঃ; সমানীতা ধার্তরাষ্ট্রেণ মূঢাঃ
ইদং পুনঃ কর্ম পাপীয় এব; সভামধ্যে পশ্য বৃত্তং কুরূণাম্
29.31
প্রিয়াং ভার্যাং দ্রৌপদীং পাণ্ডবানাং; যশস্বিনীং শীলবৃত্তোপপন্নাম্
যদুপেক্ষন্ত কুরবো ভীষ্মমুখ্যাঃ; কামানুগেনোপরুদ্ধাং রুদন্তীম্
29.32
তং চেত্তদা তে সকুমারবৃদ্ধা; অবারয়িষ্যন্কুরবঃ সমেতাঃ
মম প্রিয়ং ধৃতরাষ্ট্রোঽকরিষ্য;ত্পুত্রাণাং চ কৃতমস্যাভবিষ্যৎ
29.33
দুঃশাসনঃ প্রাতিলোম্যান্নিনায়; সভামধ্যে শ্বশুরাণাং চ কৃষ্ণাম্
সা তত্র নীতা করুণান্যবোচ;ন্নান্যং ক্ষত্তুর্নাথমদৃষ্ট কংচিৎ
29.34
কার্পণ্যাদেব সহিতাস্তত্র রাজ্ঞো; নাশক্নুবন্প্রতিবক্তুং সভায়াম্
একঃ ক্ষত্তা ধর্ম্যমর্থং ব্রুবাণো; ধর্মং বুদ্ধ্বা প্রত্যুবাচাল্পবুদ্ধিম্
29.35
অনুক্ত্বা ত্বং ধর্মমেবং সভায়া;মথেচ্ছসে পাণ্ডবস্যোপদেষ্টুম্
কৃষ্ণা ত্বেতত্কর্ম চকার শুদ্ধং; সুদুষ্করং তদ্ধি সভাং সমেত্য
যেন কৃচ্ছ্রাত্পাণ্ডবানুজ্জহার; তথাত্মানং নৌরিব সাগরৌঘাৎ
29.36
যত্রাব্রবীত্সূতপুত্রঃ সভায়াং; কৃষ্ণাং স্থিতাং শ্বশুরাণাং সমীপে
ন তে গতির্বিদ্যতে যাজ্ঞসেনি; প্রপদ্যেদানীং ধার্তরাষ্ট্রস্য বেশ্ম
পরাজিতাস্তে পতয়ো ন সন্তি; পতিং চান্যং ভামিনি ত্বং বৃণীষ্ব
29.37
যো বীভত্সোর্হৃদয়ে প্রৌঢ আসী;দস্থিপ্রচ্ছিন্মর্মঘাতী সুঘোরঃ
কর্ণাচ্ছরো বাঙ্ময়স্তিগ্মতেজাঃ; প্রতিষ্ঠিতো হৃদয়ে ফল্গুনস্য
29.38
কৃষ্ণাজিনানি পরিধিত্সমানা;ন্দুঃশাসনঃ কটুকান্যভ্যভাষৎ
এতে সর্বে ষণ্ঢতিলা বিনষ্টাঃ; ক্ষয়ং গতা নরকং দীর্ঘকালম্
29.39
গান্ধাররাজঃ শকুনির্নিকৃত্যা; যদব্রবীদ্দ্যূতকালে স পার্থান্
পরাজিতো নকুলঃ কিং তবাস্তি; কৃষ্ণয়া ত্বং দীব্য বৈ যাজ্ঞসেন্যা
29.40
জানাসি ত্বং সংজয় সর্বমেত;দ্দ্যূতেঽবাচ্যং বাক্যমেবং যথোক্তম্
স্বয়ং ত্বহং প্রার্থয়ে তত্র গন্তুং; সমাধাতুং কার্যমেতদ্বিপন্নম্
29.41
অহাপয়িত্বা যদি পাণ্ডবার্থং; শমং কুরূণামথ চেচ্চরেয়ম্
পুণ্যং চ মে স্যাচ্চরিতং মহোদয়ং; মুচ্যেরংশ্চ কুরবো মৃত্যুপাশাৎ
29.42
অপি বাচং ভাষমাণস্য কাব্যাং; ধর্মারামামর্থবতীমহিংস্রাম্
অবেক্ষেরন্ধার্তরাষ্ট্রাঃ সমক্ষং; মাং চ প্রাপ্তং কুরবঃ পূজয়েয়ুঃ
29.43
অতোঽন্যথা রথিনা ফল্গুনেন; ভীমেন চৈবাহবদংশিতেন
পরাসিক্তান্ধার্তরাষ্ট্রাংস্তু বিদ্ধি; প্রদহ্যমানান্কর্মণা স্বেন মন্দান্
29.44
পরাজিতান্পাণ্ডবেয়াংস্তু বাচো; রৌদ্ররূপা ভাষতে ধার্তরাষ্ট্রঃ
গদাহস্তো ভীমসেনোঽপ্রমত্তো; দুর্যোধনং স্মারয়িত্বা হি কালে
29.45
সুয়োধনো মন্যুময়ো মহাদ্রুমঃ; স্কন্ধঃ কর্ণঃ শকুনিস্তস্য শাখাঃ
দুঃশাসনঃ পুষ্পফলে সমৃদ্ধে; মূলং রাজা ধৃতরাষ্ট্রোঽমনীষী
29.46
যুধিষ্ঠিরো ধর্মময়ো মহাদ্রুমঃ; স্কন্ধোঽর্জুনো ভীমসেনোঽস্য শাখাঃ
মাদ্রীপুত্রৌ পুষ্পফলে সমৃদ্ধে; মূলং ত্বহং ব্রহ্ম চ ব্রাহ্মণাশ্চ
29.47
বনং রাজা ধৃতরাষ্ট্রঃ সপুত্রো; ব্যাঘ্রা বনে সংজয় পাণ্ডবেয়াঃ
মা বনং ছিন্ধি সব্যাঘ্রং মা ব্যাঘ্রান্নীনশো বনাৎ
29.48
নির্বনো বধ্যতে ব্যাঘ্রো নির্ব্যাঘ্রং ছিদ্যতে বনম্
তস্মাদ্ব্যাঘ্রো বনং রক্ষেদ্বনং ব্যাঘ্রং চ পালয়েৎ
29.49
লতাধর্মা ধার্তরাষ্ট্রাঃ শালাঃ সংজয় পাণ্ডবাঃ
ন লতা বর্ধতে জাতু অনাশ্রিত্য মহাদ্রুমম্
29.50
স্থিতাঃ শুশ্রূষিতুং পার্থাঃ স্থিতা যোদ্ধুমরিংদমাঃ
যত্কৃত্যং ধৃতরাষ্ট্রস্য তত্করোতু নরাধিপঃ
29.51
স্থিতাঃ শমে মহাত্মানঃ পাণ্ডবা ধর্মচারিণঃ
যোধাঃ সমৃদ্ধাস্তদ্বিদ্বন্নাচক্ষীথা যথাতথম্