UtshovChapter 24
24.1
संजय उवाच
यथार्हसे पाण्डव तत्तथैव; कुरून्कुरुश्रेष्ठ जनं च पृच्छसि
अनामयास्तात मनस्विनस्ते; कुरुश्रेष्ठान्पृच्छसि पार्थ यांस्त्वम्
Sanjaya uvacha
Yatharhase pandava tattathaiva; kurunkurushreshtha janam cha prichchhasi
Anamayastata manasvinaste; kurushreshthanprichchhasi partha yanstvam
24.2
सन्त्येव वृद्धाः साधवो धार्तराष्ट्रे; सन्त्येव पापाः पाण्डव तस्य विद्धि
दद्याद्रिपोश्चापि हि धार्तराष्ट्रः; कुतो दायाँल्लोपयेद्ब्राह्मणानाम्
Santyeva vriddhah sadhavo dhartarashtre; santyeva papah pandava tasya viddhi
Dadyadriposhchapi hi dhartarashtrah; kuto dayanllopayedbrahmananam
24.3
यद्युष्माकं वर्ततेऽसौ न धर्म्य;मद्रुग्धेषु द्रुग्धवत्तन्न साधु
मित्रध्रुक्स्याद्धृतराष्ट्रः सपुत्रो; युष्मान्द्विषन्साधुवृत्तानसाधुः
Yadyushmakam vartatesau na dharmya;madrugdheshu drugdhavattanna sadhu
Mitradhruksyaddhritarashtrah saputro; yushmandvishansadhuvrittanasadhuh
24.4
न चानुजानाति भृशं च तप्यते; शोचत्यन्तः स्थविरोऽजातशत्रो
शृणोति हि ब्राह्मणानां समेत्य; मित्रद्रोहः पातकेभ्यो गरीयान्
Na chanujanati bhrisham cha tapyate; shochatyantah sthavirojatashatro
Shrinoti hi brahmananam sametya; mitradrohah patakebhyo gariyan
24.5
स्मरन्ति तुभ्यं नरदेव संगमे; युद्धे च जिष्णोश्च युधां प्रणेतुः
समुत्कृष्टे दुन्दुभिशङ्खशब्दे; गदापाणिं भीमसेनं स्मरन्ति
Smaranti tubhyam naradeva sangame; yuddhe cha jishnoshcha yudham pranetuh
Samutkrishte dundubhishankhashabde; gadapanim bhimasenam smaranti
24.6
माद्रीसुतौ चापि रणाजिमध्ये; सर्वा दिशः संपतन्तौ स्मरन्ति
सेनां वर्षन्तौ शरवर्षैरजस्रं; महारथौ समरे दुष्प्रकम्प्यौ
Madrisutau chapi ranajimadhye; sarva dishah sampatantau smaranti
Senam varshantau sharavarshairajasram; maharathau samare dushprakampyau
24.7
न त्वेव मन्ये पुरुषस्य राज;न्ननागतं ज्ञायते यद्भविष्यम्
त्वं चेदिमं सर्वधर्मोपपन्नः; प्राप्तः क्लेशं पाण्डव कृच्छ्ररूपम्
Na tveva manye purushasya raja;nnanagatam gyayate yadbhavishyam
Tvam chedimam sarvadharmopapannah; praptah klesham pandava krichchhrarupam
24.8
त्वमेवैतत्सर्वमतश्च भूयः; समीकुर्याः प्रज्ञयाजातशत्रो
न कामार्थं संत्यजेयुर्हि धर्मं; पाण्डोः सुताः सर्व एवेन्द्रकल्पाः
Tvamevaitatsarvamatashcha bhuyah; samikuryah pragyayajatashatro
Na kamartham santyajeyurhi dharmam; pandoh sutah sarva evendrakalpah
24.9
त्वमेवैतत्प्रज्ञयाजातशत्रो; शमं कुर्या येन शर्माप्नुयुस्ते
धार्तराष्ट्राः पाण्डवाः सृञ्जयाश्च; ये चाप्यन्ये पार्थिवाः संनिविष्टाः
Tvamevaitatpragyayajatashatro; shamam kurya yena sharmapnuyuste
Dhartarashtrah pandavah srinjayashcha; ye chapyanye parthivah sannivishtah
24.10
यन्माब्रवीद्धृतराष्ट्रो निशाया;मजातशत्रो वचनं पिता ते
सहामात्यः सहपुत्रश्च राज;न्समेत्य तां वाचमिमां निबोध
Yanmabraviddhritarashtro nishaya;majatashatro vachanam pita te
Sahamatyah sahaputrashcha raja;nsametya tam vachamimam nibodha