UtshovChapter 14
14.1
शल्य उवाच
अथैनां रुपिणीं साध्वीमुपातिष्ठदुपश्रुतिः
तां वयोरूपसंपन्नां दृष्ट्वा देवीमुपस्थिताम्
Shalya uvacha
Athainam rupinim sadhvimupatishthadupashrutih
Tam vayorupasampannam drishtva devimupasthitam
14.2
इन्द्राणी संप्रहृष्टा सा संपूज्यैनामपृच्छत
इच्छामि त्वामहं ज्ञातुं का त्वं ब्रूहि वरानने
Indrani samprahrishta sa sampujyainamaprichchhata
Ichchhami tvamaham gyatum ka tvam bruhi varanane
14.3
उपश्रुतिरुवाच
उपश्रुतिरहं देवि तवान्तिकमुपागता
दर्शनं चैव संप्राप्ता तव सत्येन तोषिता
Upashrutiruvacha
Upashrutiraham devi tavantikamupagata
Darshanam chaiva samprapta tava satyena toshita
14.4
पतिव्रतासि युक्ता च यमेन नियमेन च
दर्शयिष्यामि ते शक्रं देवं वृत्रनिषूदनम्
क्षिप्रमन्वेहि भद्रं ते द्रक्ष्यसे सुरसत्तमम्
Pativratasi yukta cha yamena niyamena cha
Darshayishyami te shakram devam vritranishudanam
Kshipramanvehi bhadram te drakshyase surasattamam
14.5
शल्य उवाच
ततस्तां प्रस्थितां देवीमिन्द्राणी सा समन्वगात्
देवारण्यान्यतिक्रम्य पर्वतांश्च बहूंस्ततः
हिमवन्तमतिक्रम्य उत्तरं पार्श्वमागमत्
Shalya uvacha
Tatastam prasthitam devimindrani sa samanvagat
Devaranyanyatikramya parvatanshcha bahunstatah
Himavantamatikramya uttaram parshvamagamat
14.6
समुद्रं च समासाद्य बहुयोजनविस्तृतम्
आससाद महाद्वीपं नानाद्रुमलतावृतम्
Samudram cha samasadya bahuyojanavistritam
Asasada mahadvipam nanadrumalatavritam
14.7
तत्रापश्यत्सरो दिव्यं नानाशकुनिभिर्वृतम्
शतयोजनविस्तीर्णं तावदेवायतं शुभम्
Tatrapashyatsaro divyam nanashakunibhirvritam
Shatayojanavistirnam tavadevayatam shubham
14.8
तत्र दिव्यानि पद्मानि पञ्चवर्णानि भारत
षट्पदैरुपगीतानि प्रफुल्लानि सहस्रशः
Tatra divyani padmani panchavarnani bharata
Shatpadairupagitani praphullani sahasrashah
14.9
पद्मस्य भित्त्वा नालं च विवेश सहिता तया
बिसतन्तुप्रविष्टं च तत्रापश्यच्छतक्रतुम्
Padmasya bhittva nalam cha vivesha sahita taya
Bisatantupravishtam cha tatrapashyachchhatakratum
14.10
तं दृष्ट्वा च सुसूक्ष्मेण रूपेणावस्थितं प्रभुम्
सूक्ष्मरूपधरा देवी बभूवोपश्रुतिश्च सा
Tam drishtva cha susukshmena rupenavasthitam prabhum
Sukshmarupadhara devi babhuvopashrutishcha sa
14.11
इन्द्रं तुष्टाव चेन्द्राणी विश्रुतैः पूर्वकर्मभिः
स्तूयमानस्ततो देवः शचीमाह पुरंदरः
Indram tushtava chendrani vishrutaih purvakarmabhih
Stuyamanastato devah shachimaha purandarah
14.12
किमर्थमसि संप्राप्ता विज्ञातश्च कथं त्वहम्
ततः सा कथयामास नहुषस्य विचेष्टितम्
Kimarthamasi samprapta vigyatashcha katham tvaham
Tatah sa kathayamasa nahushasya vicheshtitam
14.13
इन्द्रत्वं त्रिषु लोकेषु प्राप्य वीर्यमदान्वितः
दर्पाविष्टश्च दुष्टात्मा मामुवाच शतक्रतो
उपतिष्ठ मामिति क्रूरः कालं च कृतवान्मम
Indratvam trishu lokeshu prapya viryamadanvitah
Darpavishtashcha dushtatma mamuvacha shatakrato
Upatishtha mamiti krurah kalam cha kritavanmama
14.14
यदि न त्रास्यसि विभो करिष्यति स मां वशे
एतेन चाहं संतप्ता प्राप्ता शक्र तवान्तिकम्
जहि रौद्रं महाबाहो नहुषं पापनिश्चयम्
Yadi na trasyasi vibho karishyati sa mam vashe
Etena chaham santapta prapta shakra tavantikam
Jahi raudram mahabaho nahusham papanishchayam
14.15
प्रकाशयस्व चात्मानं दैत्यदानवसूदन
तेजः समाप्नुहि विभो देवराज्यं प्रशाधि च
Prakashayasva chatmanam daityadanavasudana
Tejah samapnuhi vibho devarajyam prashadhi cha