Utshovঅধ্যায় 8
8.1
বৈশংপায়ন উবাচ
শল্যঃ শ্রুত্বা তু দূতানাং সৈন্যেন মহতা বৃতঃ
অভ্যয়াত্পাণ্ডবান্রাজন্সহ পুত্রৈর্মহারথৈঃ
8.2
তস্য সেনানিবেশোঽভূদধ্যর্ধমিব যোজনম্
তথা হি বহুলাং সেনাং স বিভর্তি নরর্ষভঃ
8.3
বিচিত্রকবচাঃ শূরা বিচিত্রধ্বজকার্মুকাঃ
বিচিত্রাভরণাঃ সর্বে বিচিত্ররথবাহনাঃ
8.4
স্বদেশবেষাভরণা বীরাঃ শতসহস্রশঃ
তস্য সেনাপ্রণেতারো বভূবুঃ ক্ষত্রিয়র্ষভাঃ
8.5
ব্যথয়ন্নিব ভূতানি কম্পয়ন্নিব মেদিনীম্
শনৈর্বিশ্রাময়ন্সেনাং স যয়ৌ যেন পাণ্ডবঃ
8.6
ততো দুর্যোধনঃ শ্রুত্বা মহাসেনং মহারথম্
উপায়ান্তমভিদ্রুত্য স্বয়মানর্চ ভারত
8.7
কারয়ামাস পূজার্থং তস্য দুর্যোধনঃ সভাঃ
রমণীয়েষু দেশেষু রত্নচিত্রাঃ স্বলংকৃতাঃ
8.8
স তাঃ সভাঃ সমাসাদ্য পূজ্যমানো যথামরঃ
দুর্যোধনস্য সচিবৈর্দেশে দেশে যথার্হতঃ
আজগাম সভামন্যাং দেবাবসথবর্চসম্
8.9
স তত্র বিষয়ৈর্যুক্তঃ কল্যাণৈরতিমানুষৈঃ
মেনেঽভ্যধিকমাত্মানমবমেনে পুরংদরম্
8.10
পপ্রচ্ছ স ততঃ প্রেষ্যান্প্রহৃষ্টঃ ক্ষত্রিয়র্ষভঃ
যুধিষ্ঠিরস্য পুরুষাঃ কে নু চক্রুঃ সভা ইমাঃ
আনীয়ন্তাং সভাকারাঃ প্রদেয়ার্হা হি মে মতাঃ
8.11
গূঢো দুর্যোধনস্তত্র দর্শয়ামাস মাতুলম্
তং দৃষ্ট্বা মদ্ররাজস্তু জ্ঞাত্বা যত্নং চ তস্য তম্
পরিষ্বজ্যাব্রবীত্প্রীত ইষ্টোঽর্থো গৃহ্যতামিতি
8.12
দুর্যোধন উবাচ
সত্যবাগ্ভব কল্যাণ বরো বৈ মম দীয়তাম্
সর্বসেনাপ্রণেতা মে ভবান্ভবিতুমর্হতি
8.13
বৈশংপায়ন উবাচ
কৃতমিত্যব্রবীচ্ছল্যঃ কিমন্যত্ক্রিয়তামিতি
কৃতমিত্যেব গান্ধারিঃ প্রত্যুবাচ পুনঃ পুনঃ
8.14
স তথা শল্যমামন্ত্র্য পুনরায়াত্স্বকং পুরম্
শল্যো জগাম কৌন্তেয়ানাখ্যাতুং কর্ম তস্য তৎ
8.15
উপপ্লব্যং স গত্বা তু স্কন্ধাবারং প্রবিশ্য চ
পাণ্ডবানথ তান্সর্বাঞ্শল্যস্তত্র দদর্শ হ
8.16
সমেত্য তু মহাবাহুঃ শল্যঃ পাণ্ডুসুতৈস্তদা
পাদ্যমর্ঘ্যং চ গাং চৈব প্রত্যগৃহ্ণাদ্যথাবিধি
8.17
ততঃ কুশলপূর্বং স মদ্ররাজোঽরিসূদনঃ
প্রীত্যা পরময়া যুক্তঃ সমাশ্লিষ্য যুধিষ্ঠিরম্
8.18
তথা ভীমার্জুনৌ হৃষ্টৌ স্বস্রীয়ৌ চ যমাবুভৌ
আসনে চোপবিষ্টস্তু শল্যঃ পার্থমুবাচ হ
8.19
কুশলং রাজশার্দূল কচ্চিত্তে কুরুনন্দন
অরণ্যবাসাদ্দিষ্ট্যাসি বিমুক্তো জয়তাং বর
8.20
সুদুষ্করং কৃতং রাজন্নির্জনে বসতা বনে
ভ্রাতৃভিঃ সহ রাজেন্দ্র কৃষ্ণয়া চানয়া সহ
8.21
অজ্ঞাতবাসং ঘোরং চ বসতা দুষ্করং কৃতম্
দুঃখমেব কুতঃ সৌখ্যং রাজ্যভ্রষ্টস্য ভারত
8.22
দুঃখস্যৈতস্য মহতো ধার্তরাষ্ট্রকৃতস্য বৈ
অবাপ্স্যসি সুখং রাজন্হত্বা শত্রূন্পরংতপ
8.23
বিদিতং তে মহারাজ লোকতত্ত্বং নরাধিপ
তস্মাল্লোভকৃতং কিংচিত্তব তাত ন বিদ্যতে
8.24
ততোঽস্যাকথয়দ্রাজা দুর্যোধনসমাগমম্
তচ্চ শুশ্রূষিতং সর্বং বরদানং চ ভারত
8.25
যুধিষ্ঠির উবাচ
সুকৃতং তে কৃতং রাজন্প্রহৃষ্টেনান্তরাত্মনা
দুর্যোধনস্য যদ্বীর ত্বয়া বাচা প্রতিশ্রুতম্
একং ত্বিচ্ছামি ভদ্রং তে ক্রিয়মাণং মহীপতে
8.26
ভবানিহ মহারাজ বাসুদেবসমো যুধি
কর্ণার্জুনাভ্যাং সংপ্রাপ্তে দ্বৈরথে রাজসত্তম
কর্ণস্য ভবতা কার্যং সারথ্যং নাত্র সংশয়ঃ
8.27
তত্র পাল্যোঽর্জুনো রাজন্যদি মত্প্রিয়মিচ্ছসি
তেজোবধশ্চ তে কার্যঃ সৌতেরস্মজ্জয়াবহঃ
অকর্তব্যমপি হ্যেতত্কর্তুমর্হসি মাতুল
8.28
শল্য উবাচ
শৃণু পাণ্ডব ভদ্রং তে যদ্ব্রবীষি দুরাত্মনঃ
তেজোবধনিমিত্তং মাং সূতপুত্রস্য সংয়ুগে
8.29
অহং তস্য ভবিষ্যামি সংগ্রামে সারথির্ধ্রুবম্
বাসুদেবেন হি সমং নিত্যং মাং স হি মন্যতে
8.30
তস্যাহং কুরুশার্দূল প্রতীপমহিতং বচঃ
ধ্রুবং সংকথয়িষ্যামি যোদ্ধুকামস্য সংয়ুগে
8.31
যথা স হৃতদর্পশ্চ হৃততেজাশ্চ পাণ্ডব
ভবিষ্যতি সুখং হন্তুং সত্যমেতদ্ব্রবীমি তে
8.32
এবমেতত্করিষ্যামি যথা তাত ত্বমাত্থ মাম্
যচ্চান্যদপি শক্ষ্যামি তত্করিষ্যামি তে প্রিয়ম্
8.33
যচ্চ দুঃখং ত্বয়া প্রাপ্তং দ্যূতে বৈ কৃষ্ণয়া সহ
পরুষাণি চ বাক্যানি সূতপুত্রকৃতানি বৈ
8.34
জটাসুরাত্পরিক্লেশঃ কীচকাচ্চ মহাদ্যুতে
দ্রৌপদ্যাধিগতং সর্বং দময়ন্ত্যা যথাশুভম্
8.35
সর্বং দুঃখমিদং বীর সুখোদর্কং ভবিষ্যতি
নাত্র মন্যুস্ত্বয়া কার্যো বিধির্হি বলবত্তরঃ
8.36
দুঃখানি হি মহাত্মানঃ প্রাপ্নুবন্তি যুধিষ্ঠির
দেবৈরপি হি দুঃখানি প্রাপ্তানি জগতীপতে
8.37
ইন্দ্রেণ শ্রূয়তে রাজন্সভার্যেণ মহাত্মনা
অনুভূতং মহদ্দুঃখং দেবরাজেন ভারত