Utshovঅধ্যায় 7
7.1
বৈশংপায়ন উবাচ
গতে দ্বারবতীং কৃষ্ণে বলদেবে চ মাধবে
সহ বৃষ্ণ্যন্ধকৈঃ সর্বৈর্ভোজৈশ্চ শতশস্তথা
7.2
সর্বমাগময়ামাস পাণ্ডবানাং বিচেষ্টিতম্
ধৃতরাষ্ট্রাত্মজো রাজা দূতৈঃ প্রণিহিতৈশ্চরৈঃ
7.3
স শ্রুত্বা মাধবং যাতং সদশ্বৈরনিলোপমৈঃ
বলেন নাতিমহতা দ্বারকামভ্যয়াত্পুরীম্
7.4
তমেব দিবসং চাপি কৌন্তেয়ঃ পাণ্ডুনন্দনঃ
আনর্তনগরীং রম্যাং জগামাশু ধনংজয়ঃ
7.5
তৌ যাত্বা পুরুষব্যাঘ্রৌ দ্বারকাং কুরুনন্দনৌ
সুপ্তং দদৃশতুঃ কৃষ্ণং শয়ানং চোপজগ্মতুঃ
7.6
ততঃ শয়ানে গোবিন্দে প্রবিবেশ সুয়োধনঃ
উচ্ছীর্ষতশ্চ কৃষ্ণস্য নিষসাদ বরাসনে
7.7
ততঃ কিরীটী তস্যানু প্রবিবেশ মহামনাঃ
পশ্চার্ধে চ স কৃষ্ণস্য প্রহ্বোঽতিষ্ঠত্কৃতাঞ্জলিঃ
7.8
প্রতিবুদ্ধঃ স বার্ষ্ণেয়ো দদর্শাগ্রে কিরীটিনম্
স তয়োঃ স্বাগতং কৃত্বা যথার্হং প্রতিপূজ্য চ
তদাগমনজং হেতুং পপ্রচ্ছ মধুসূদনঃ
7.9
ততো দুর্যোধনঃ কৃষ্ণমুবাচ প্রহসন্নিব
বিগ্রহেঽস্মিন্ভবান্সাহ্যং মম দাতুমিহার্হতি
7.10
সমং হি ভবতঃ সখ্যং ময়ি চৈবার্জুনেঽপি চ
তথা সংবন্ধকং তুল্যমস্মাকং ত্বয়ি মাধব
7.11
অহং চাভিগতঃ পূর্বং ত্বামদ্য মধুসূদন
পূর্বং চাভিগতং সন্তো ভজন্তে পূর্বসারিণঃ
7.12
ত্বং চ শ্রেষ্ঠতমো লোকে সতামদ্য জনার্দন
সততং সংমতশ্চৈব সদ্বৃত্তমনুপালয়
7.13
কৃষ্ণ উবাচ
ভবানভিগতঃ পূর্বমত্র মে নাস্তি সংশয়ঃ
দৃষ্টস্তু প্রথমং রাজন্ময়া পার্থো ধনংজয়ঃ
7.14
তব পূর্বাভিগমনাত্পূর্বং চাপ্যস্য দর্শনাৎ
সাহায্যমুভয়োরেব করিষ্যামি সুয়োধন
7.15
প্রবারণং তু বালানাং পূর্বং কার্যমিতি শ্রুতিঃ
তস্মাত্প্রবারণং পূর্বমর্হঃ পার্থো ধনংজয়ঃ
7.16
মত্সংহননতুল্যানাং গোপানামর্বুদং মহৎ
নারায়ণা ইতি খ্যাতাঃ সর্বে সংগ্রাময়োধিনঃ
7.17
তে বা যুধি দুরাধর্ষা ভবন্ত্বেকস্য সৈনিকাঃ
অয়ুধ্যমানঃ সংগ্রামে ন্যস্তশস্ত্রোঽহমেকতঃ
7.18
আভ্যামন্যতরং পার্থ যত্তে হৃদ্যতরং মতম্
তদ্বৃণীতাং ভবানগ্রে প্রবার্যস্ত্বং হি ধর্মতঃ
7.19
বৈশংপায়ন উবাচ
এবমুক্তস্তু কৃষ্ণেন কুন্তীপুত্রো ধনংজয়ঃ
অয়ুধ্যমানং সংগ্রামে বরয়ামাস কেশবম্
7.20
সহস্রাণাং সহস্রং তু যোধানাং প্রাপ্য ভারত
কৃষ্ণং চাপহৃতং জ্ঞাত্বা সংপ্রাপ পরমাং মুদম্
7.21
দুর্যোধনস্তু তত্সৈন্যং সর্বমাদায় পার্থিবঃ
ততোঽভ্যয়াদ্ভীমবলো রৌহিণেয়ং মহাবলম্
7.22
সর্বং চাগমনে হেতুং স তস্মৈ সংন্যবেদয়ৎ
প্রত্যুবাচ ততঃ শৌরির্ধার্তরাষ্ট্রমিদং বচঃ
7.23
বিদিতং তে নরব্যাঘ্র সর্বং ভবিতুমর্হতি
যন্ময়োক্তং বিরাটস্য পুরা বৈবাহিকে তদা
7.24
নিগৃহ্যোক্তো হৃষীকেশস্ত্বদর্থং কুরুনন্দন
ময়া সংবন্ধকং তুল্যমিতি রাজন্পুনঃ পুনঃ
7.25
ন চ তদ্বাক্যমুক্তং বৈ কেশবঃ প্রত্যপদ্যত
ন চাহমুত্সহে কৃষ্ণং বিনা স্থাতুমপি ক্ষণম্
7.26
নাহং সহায়ঃ পার্থানাং নাপি দুর্যোধনস্য বৈ
ইতি মে নিশ্চিতা বুদ্দির্বাসুদেবমবেক্ষ্য হ
7.27
জাতোঽসি ভারতে বংশে সর্বপার্থিবপূজিতে
গচ্ছ যুধ্যস্ব ধর্মেণ ক্ষাত্রেণ ভরতর্ষভ
7.28
ইত্যেবমুক্তঃ স তদা পরিষ্বজ্য হলায়ুধম্
কৃষ্ণং চাপহৃতং জ্ঞাত্বা যুদ্ধান্মেনে জিতং জয়ম্
7.29
সোঽভ্যয়াত্কৃতবর্মাণং ধৃতরাষ্ট্রসুতো নৃপঃ
কৃতবর্মা দদৌ তস্য সেনামক্ষৌহিণীং তদা
7.30
স তেন সর্বসৈন্যেন ভীমেন কুরুনন্দনঃ
বৃতঃ প্রতিয়য়ৌ হৃষ্টঃ সুহৃদঃ সংপ্রহর্ষয়ন্
7.31
গতে দুর্যোধনে কৃষ্ণঃ কিরীটিনমথাব্রবীৎ
অয়ুধ্যমানঃ কাং বুদ্ধিমাস্থায়াহং ত্বয়া বৃতঃ
7.32
অর্জুন উবাচ
ভবান্সমর্থস্তান্সর্বান্নিহন্তুং নাত্র সংশয়ঃ
নিহন্তুমহমপ্যেকঃ সমর্থঃ পুরুষোত্তম
7.33
ভবাংস্তু কীর্তিমাঁল্লোকে তদ্যশস্ত্বাং গমিষ্যতি
যশসা চাহমপ্যর্থী তস্মাদসি ময়া বৃতঃ
7.34
সারথ্যং তু ত্বয়া কার্যমিতি মে মানসং সদা
চিররাত্রেপ্সিতং কামং তদ্ভবান্কর্তুমর্হতি
7.35
বাসুদেব উবাচ
উপপন্নমিদং পার্থ যত্স্পর্ধেথা ময়া সহ
সারথ্যং তে করিষ্যামি কামঃ সংপদ্যতাং তব
7.36
বৈশংপায়ন উবাচ
এবং প্রমুদিতঃ পার্থঃ কৃষ্ণেন সহিতস্তদা
বৃতো দাশার্হপ্রবরৈঃ পুনরায়াদ্যুধিষ্ঠিরম্