অধ্যায় 6

6.1

দ্রুপদ উবাচ
ভূতানাং প্রাণিনঃ শ্রেষ্ঠাঃ প্রাণিনাং বুদ্ধিজীবিনঃ
বুদ্ধিমত্সু নরাঃ শ্রেষ্ঠা নরাণাং তু দ্বিজাতয়ঃ

দ্বিজেষু বৈদ্যাঃ শ্রেয়াংসো বৈদ্যেষু কৃতবুদ্ধয়ঃ
স ভবান্কৃতবুদ্ধীনাং প্রধান ইতি মে মতিঃ

কুলেন চ বিশিষ্টোঽসি বয়সা চ শ্রুতেন চ
প্রজ্ঞয়ানবমশ্চাসি শুক্রেণাঙ্গিরসেন চ

বিদিতং চাপি তে সর্বং যথাবৃত্তঃ স কৌরবঃ
পাণ্ডবশ্চ যথাবৃত্তঃ কুন্তীপুত্রো যুধিষ্ঠিরঃ

ধৃতরাষ্ট্রস্য বিদিতে বঞ্চিতাঃ পাণ্ডবাঃ পরৈঃ
বিদুরেণানুনীতোঽপি পুত্রমেবানুবর্ততে

শকুনির্বুদ্ধিপূর্বং হি কুন্তীপুত্রং সমাহ্বয়ৎ
অনক্ষজ্ঞং মতাক্ষঃ সন্ক্ষত্রবৃত্তে স্থিতং শুচিম্

তে তথা বঞ্চয়িত্বা তু ধর্মপুত্রং যুধিষ্ঠিরম্
ন কস্যাংচিদবস্থায়াং রাজ্যং দাস্যন্তি বৈ স্বয়ম্

ভবাংস্তু ধর্মসংয়ুক্তং ধৃতরাষ্ট্রং ব্রুবন্বচঃ
মনাংসি তস্য যোধানাং ধ্রুবমাবর্তয়িষ্যতি

বিদুরশ্চাপি তদ্বাক্যং সাধয়িষ্যতি তাবকম্
ভীষ্মদ্রোণকৃপাণাং চ ভেদং সংজনয়িষ্যতি

অমাত্যেষু চ ভিন্নেষু যোধেষু বিমুখেষু চ
পুনরেকাগ্রকরণং তেষাং কর্ম ভবিষ্যতি

এতস্মিন্নন্তরে পার্থাঃ সুখমেকাগ্রবুদ্ধয়ঃ
সেনাকর্ম করিষ্যন্তি দ্রব্যাণাং চৈব সংচয়ম্

ভিদ্যমানেষু চ স্বেষু লম্বমানে চ বৈ ত্বয়ি
ন তথা তে করিষ্যন্তি সেনাকর্ম ন সংশয়ঃ

এতত্প্রয়োজনং চাত্র প্রাধান্যেনোপলভ্যতে
সংগত্যা ধৃতরাষ্ট্রশ্চ কুর্যাদ্ধর্ম্যং বচস্তব

স ভবান্ধর্ময়ুক্তশ্চ ধর্ম্যং তেষু সমাচরন্
কৃপালুষু পরিক্লেশান্পাণ্ডবানাং প্রকীর্তয়ন্

বৃদ্ধেষু কুলধর্মং চ ব্রুবন্পূর্বৈরনুষ্ঠিতম্
বিভেত্স্যতি মনাংস্যেষামিতি মে নাত্র সংশয়ঃ

ন চ তেভ্যো ভয়ং তেঽস্তি ব্রাহ্মণো হ্যসি বেদবিৎ
দূতকর্মণি যুক্তশ্চ স্থবিরশ্চ বিশেষতঃ

স ভবান্পুষ্যয়োগেন মুহূর্তেন জয়েন চ
কৌরবেয়ান্প্রয়াত্বাশু কৌন্তেয়স্যার্থসিদ্ধয়ে

বৈশংপায়ন উবাচ
তথানুশিষ্টঃ প্রয়য়ৌ দ্রুপদেন মহাত্মনা
পুরোধা বৃত্তসংপন্নো নগরং নাগসাহ্বয়ম্