UtshovChapter 6
6.1
द्रुपद उवाच
भूतानां प्राणिनः श्रेष्ठाः प्राणिनां बुद्धिजीविनः
बुद्धिमत्सु नराः श्रेष्ठा नराणां तु द्विजातयः
Drupada uvacha
Bhutanam praninah shreshthah praninam buddhijivinah
Buddhimatsu narah shreshtha naranam tu dvijatayah
6.2
द्विजेषु वैद्याः श्रेयांसो वैद्येषु कृतबुद्धयः
स भवान्कृतबुद्धीनां प्रधान इति मे मतिः
Dvijeshu vaidyah shreyanso vaidyeshu kritabuddhayah
Sa bhavankritabuddhinam pradhana iti me matih
6.3
कुलेन च विशिष्टोऽसि वयसा च श्रुतेन च
प्रज्ञयानवमश्चासि शुक्रेणाङ्गिरसेन च
Kulena cha vishishtosi vayasa cha shrutena cha
Pragyayanavamashchasi shukrenangirasena cha
6.4
विदितं चापि ते सर्वं यथावृत्तः स कौरवः
पाण्डवश्च यथावृत्तः कुन्तीपुत्रो युधिष्ठिरः
Viditam chapi te sarvam yathavrittah sa kauravah
Pandavashcha yathavrittah kuntiputro yudhishthirah
6.5
धृतराष्ट्रस्य विदिते वञ्चिताः पाण्डवाः परैः
विदुरेणानुनीतोऽपि पुत्रमेवानुवर्तते
Dhritarashtrasya vidite vanchitah pandavah paraih
Vidurenanunitopi putramevanuvartate
6.6
शकुनिर्बुद्धिपूर्वं हि कुन्तीपुत्रं समाह्वयत्
अनक्षज्ञं मताक्षः सन्क्षत्रवृत्ते स्थितं शुचिम्
Shakunirbuddhipurvam hi kuntiputram samahvayat
Anakshagyam matakshah sankshatravritte sthitam shuchim
6.7
ते तथा वञ्चयित्वा तु धर्मपुत्रं युधिष्ठिरम्
न कस्यांचिदवस्थायां राज्यं दास्यन्ति वै स्वयम्
Te tatha vanchayitva tu dharmaputram yudhishthiram
Na kasyanchidavasthayam rajyam dasyanti vai svayam
6.8
भवांस्तु धर्मसंयुक्तं धृतराष्ट्रं ब्रुवन्वचः
मनांसि तस्य योधानां ध्रुवमावर्तयिष्यति
Bhavanstu dharmasanyuktam dhritarashtram bruvanvachah
Manansi tasya yodhanam dhruvamavartayishyati
6.9
विदुरश्चापि तद्वाक्यं साधयिष्यति तावकम्
भीष्मद्रोणकृपाणां च भेदं संजनयिष्यति
Vidurashchapi tadvakyam sadhayishyati tavakam
Bhishmadronakripanam cha bhedam sanjanayishyati
6.10
अमात्येषु च भिन्नेषु योधेषु विमुखेषु च
पुनरेकाग्रकरणं तेषां कर्म भविष्यति
Amatyeshu cha bhinneshu yodheshu vimukheshu cha
Punarekagrakaranam tesham karma bhavishyati
6.11
एतस्मिन्नन्तरे पार्थाः सुखमेकाग्रबुद्धयः
सेनाकर्म करिष्यन्ति द्रव्याणां चैव संचयम्
Etasminnantare parthah sukhamekagrabuddhayah
Senakarma karishyanti dravyanam chaiva sanchayam
6.12
भिद्यमानेषु च स्वेषु लम्बमाने च वै त्वयि
न तथा ते करिष्यन्ति सेनाकर्म न संशयः
Bhidyamaneshu cha sveshu lambamane cha vai tvayi
Na tatha te karishyanti senakarma na sanshayah
6.13
एतत्प्रयोजनं चात्र प्राधान्येनोपलभ्यते
संगत्या धृतराष्ट्रश्च कुर्याद्धर्म्यं वचस्तव
Etatprayojanam chatra pradhanyenopalabhyate
Sangatya dhritarashtrashcha kuryaddharmyam vachastava
6.14
स भवान्धर्मयुक्तश्च धर्म्यं तेषु समाचरन्
कृपालुषु परिक्लेशान्पाण्डवानां प्रकीर्तयन्
Sa bhavandharmayuktashcha dharmyam teshu samacharan
Kripalushu parikleshanpandavanam prakirtayan
6.15
वृद्धेषु कुलधर्मं च ब्रुवन्पूर्वैरनुष्ठितम्
विभेत्स्यति मनांस्येषामिति मे नात्र संशयः
Vriddheshu kuladharmam cha bruvanpurvairanushthitam
Vibhetsyati manansyeshamiti me natra sanshayah
6.16
न च तेभ्यो भयं तेऽस्ति ब्राह्मणो ह्यसि वेदवित्
दूतकर्मणि युक्तश्च स्थविरश्च विशेषतः
Na cha tebhyo bhayam testi brahmano hyasi vedavit
Dutakarmani yuktashcha sthavirashcha visheshatah
6.17
स भवान्पुष्ययोगेन मुहूर्तेन जयेन च
कौरवेयान्प्रयात्वाशु कौन्तेयस्यार्थसिद्धये
Sa bhavanpushyayogena muhurtena jayena cha
Kauraveyanprayatvashu kaunteyasyarthasiddhaye
6.18
वैशंपायन उवाच
तथानुशिष्टः प्रययौ द्रुपदेन महात्मना
पुरोधा वृत्तसंपन्नो नगरं नागसाह्वयम्
Vaishampayana uvacha
Tathanushishtah prayayau drupadena mahatmana
Purodha vrittasampanno nagaram nagasahvayam