অধ্যায় 2

2.1

বলদেব উবাচ
শ্রুতং ভবদ্ভির্গদপূর্বজস্য; বাক্যং যথা ধর্মবদর্থবচ্চ
অজাতশত্রোশ্চ হিতং হিতং চ; দুর্যোধনস্যাপি তথৈব রাজ্ঞঃ

অর্ধং হি রাজ্যস্য বিসৃজ্য বীরাঃ; কুন্তীসুতাস্তস্য কৃতে যতন্তে
প্রদায় চার্ধং ধৃতরাষ্ট্রপুত্রঃ; সুখী সহাস্মাভিরতীব মোদেৎ

লব্ধ্বা হি রাজ্যং পুরুষপ্রবীরাঃ; সম্যক্প্রবৃত্তেষু পরেষু চৈব
ধ্রুবং প্রশান্তাঃ সুখমাবিশেয়ু;স্তেষাং প্রশান্তিশ্চ হিতং প্রজানাম্

দুর্যোধনস্যাপি মতং চ বেত্তুং; বক্তুং চ বাক্যানি যুধিষ্ঠিরস্য
প্রিয়ং মম স্যাদ্যদি তত্র কশ্চি;দ্ব্রজেচ্ছমার্থং কুরুপাণ্ডবানাম্

স ভীষ্মমামন্ত্র্য কুরুপ্রবীরং; বৈচিত্রবীর্যং চ মহানুভাবম্
দ্রোণং সপুত্রং বিদুরং কৃপং চ; গান্ধাররাজং চ সসূতপুত্রম্

সর্বে চ যেঽন্যে ধৃতরাষ্ট্রপুত্রা; বলপ্রধানা নিগমপ্রধানাঃ
স্থিতাশ্চ ধর্মেষু যথা স্বকেষু; লোকপ্রবীরাঃ শ্রুতকালবৃদ্ধাঃ

এতেষু সর্বেষু সমাগতেষু; পৌরেষু বৃদ্ধেষু চ সংগতেষু
ব্রবীতু বাক্যং প্রণিপাতয়ুক্তং; কুন্তীসুতস্যার্থকরং যথা স্যাৎ

সর্বাস্ববস্থাসু চ তে ন কৌট্যা;দ্গ্রস্তো হি সোঽর্থো বলমাশ্রিতৈস্তৈঃ
প্রিয়াভ্যুপেতস্য যুধিষ্ঠিরস্য; দ্যূতে প্রমত্তস্য হৃতং চ রাজ্যম্

নিবার্যমাণশ্চ কুরুপ্রবীরৈঃ; সর্বৈঃ সুহৃদ্ভির্হ্যয়মপ্যতজ্জ্ঞঃ
গান্ধাররাজস্য সুতং মতাক্ষং; সমাহ্বয়েদ্দেবিতুমাজমীঢঃ

দুরোদরাস্তত্র সহস্রশোঽন্যে; যুধিষ্ঠিরো যান্বিষহেত জেতুম্
উত্সৃজ্য তান্সৌবলমেব চায়ং; সমাহ্বয়ত্তেন জিতোঽক্ষবত্যাম্

স দীব্যমানঃ প্রতিদেবনেন; অক্ষেষু নিত্যং সুপরাঙ্মুখেষু
সংরম্ভমাণো বিজিতঃ প্রসহ্য; তত্রাপরাধঃ শকুনের্ন কশ্চিৎ

তস্মাত্প্রণম্যৈব বচো ব্রবীতু; বৈচিত্রবীর্যং বহুসাময়ুক্তম্
তথা হি শক্যো ধৃতরাষ্ট্রপুত্রঃ; স্বার্থে নিয়োক্তুং পুরুষেণ তেন

বৈশংপায়ন উবাচ
এবং ব্রুবত্যেব মধুপ্রবীরে; শিনিপ্রবীরঃ সহসোত্পপাত
তচ্চাপি বাক্যং পরিনিন্দ্য তস্য; সমাদদে বাক্যমিদং সমন্যুঃ