অধ্যায় 3

3.1

সাত্যকিরুবাচ
যাদৃশঃ পুরুষস্যাত্মা তাদৃশং সংপ্রভাষতে
যথারূপোঽন্তরাত্মা তে তথারূপং প্রভাষসে

সন্তি বৈ পুরুষাঃ শূরাঃ সন্তি কাপুরুষাস্তথা
উভাবেতৌ দৃঢৌ পক্ষৌ দৃশ্যেতে পুরুষান্প্রতি

একস্মিন্নেব জায়েতে কুলে ক্লীবমহারথৌ
ফলাফলবতী শাখে যথৈকস্মিন্বনস্পতৌ

নাভ্যসূয়ামি তে বাক্যং ব্রুবতো লাঙ্গলধ্বজ
যে তু শৃণ্বন্তি তে বাক্যং তানসূয়ামি মাধব

কথং হি ধর্মরাজস্য দোষমল্পমপি ব্রুবন্
লভতে পরিষন্মধ্যে ব্যাহর্তুমকুতোভয়ঃ

সমাহূয় মহাত্মানং জিতবন্তোঽক্ষকোবিদাঃ
অনক্ষজ্ঞং যথাশ্রদ্ধং তেষু ধর্মজয়ঃ কুতঃ

যদি কুন্তীসুতং গেহে ক্রীডন্তং ভ্রাতৃভিঃ সহ
অভিগম্য জয়েয়ুস্তে তত্তেষাং ধর্মতো ভবেৎ

সমাহূয় তু রাজানং ক্ষত্রধর্মরতং সদা
নিকৃত্যা জিতবন্তস্তে কিং নু তেষাং পরং শুভম্

কথং প্রণিপতেচ্চায়মিহ কৃত্বা পণং পরম্
বনবাসাদ্বিমুক্তস্তু প্রাপ্তঃ পৈতামহং পদম্

যদ্যয়ং পরবিত্তানি কাময়েত যুধিষ্ঠিরঃ
এবমপ্যয়মত্যন্তং পরান্নার্হতি যাচিতুম্

কথং চ ধর্ময়ুক্তাস্তে ন চ রাজ্যং জিহীর্ষবঃ
নিবৃত্তবাসান্কৌন্তেয়ান্য আহুর্বিদিতা ইতি

অনুনীতা হি ভীষ্মেণ দ্রোণেন চ মহাত্মনা
ন ব্যবস্যন্তি পাণ্ডূনাং প্রদাতুং পৈতৃকং বসু

অহং তু তাঞ্শিতৈর্বাণৈরনুনীয় রণে বলাৎ
পাদয়োঃ পাতয়িষ্যামি কৌন্তেয়স্য মহাত্মনঃ

অথ তে ন ব্যবস্যন্তি প্রণিপাতায় ধীমতঃ
গমিষ্যন্তি সহামাত্যা যমস্য সদনং প্রতি

ন হি তে যুয়ুধানস্য সংরব্ধস্য যুয়ুত্সতঃ
বেগং সমর্থাঃ সংসোঢুং বজ্রস্যেব মহীধরাঃ

কো হি গাণ্ডীবধন্বানং কশ্চ চক্রায়ুধং যুধি
মাং চাপি বিষহেত্কো নু কশ্চ ভীমং দুরাসদম্

যমৌ চ দৃঢধন্বানৌ যমকল্পৌ মহাদ্যুতী
কো জিজীবিষুরাসীদেদ্ধৃষ্টদ্যুম্নং চ পার্ষতম্

পঞ্চেমান্পাণ্ডবেয়াংশ্চ দ্রৌপদ্যাঃ কীর্তিবর্ধনান্
সমপ্রমাণান্পাণ্ডূনাং সমবীর্যান্মদোত্কটান্

সৌভদ্রং চ মহেষ্বাসমমরৈরপি দুঃসহম্
গদপ্রদ্যুম্নসাম্বাংশ্চ কালবজ্রানলোপমান্

তে বয়ং ধৃতরাষ্ট্রস্য পুত্রং শকুনিনা সহ
কর্ণেন চ নিহত্যাজাবভিষেক্ষ্যাম পাণ্ডবম্

নাধর্মো বিদ্যতে কশ্চিচ্ছত্রূন্হত্বাততায়িনঃ
অধর্ম্যময়শস্যং চ শাত্রবাণাং প্রয়াচনম্

হৃদ্গতস্তস্য যঃ কামস্তং কুরুধ্বমতন্দ্রিতাঃ
নিসৃষ্টং ধৃতরাষ্ট্রেণ রাজ্যং প্রাপ্নোতু পাণ্ডবঃ

অদ্য পাণ্ডুসুতো রাজ্যং লভতাং বা যুধিষ্ঠিরঃ
নিহতা বা রণে সর্বে স্বপ্স্যন্তি বসুধাতলে