Utshovঅধ্যায় 4
4.1
দ্রুপদ উবাচ
এবমেতন্মহাবাহো ভবিষ্যতি ন সংশয়ঃ
ন হি দুর্যোধনো রাজ্যং মধুরেণ প্রদাস্যতি
4.2
অনুবর্ত্স্যতি তং চাপি ধৃতরাষ্ট্রঃ সুতপ্রিয়ঃ
ভীষ্মদ্রোণৌ চ কার্পণ্যান্মৌর্খ্যাদ্রাধেয়সৌবলৌ
4.3
বলদেবস্য বাক্যং তু মম জ্ঞানে ন যুজ্যতে
এতদ্ধি পুরুষেণাগ্রে কার্যং সুনয়মিচ্ছতা
4.4
ন তু বাচ্যো মৃদু বচো ধার্তরাষ্ট্রঃ কথংচন
ন হি মার্দবসাধ্যোঽসৌ পাপবুদ্ধির্মতো মম
4.5
গর্দভে মার্দবং কুর্যাদ্গোষু তীক্ষ্ণং সমাচরেৎ
মৃদু দুর্যোধনে বাক্যং যো ব্রূয়াত্পাপচেতসি
4.6
মৃদু বৈ মন্যতে পাপো ভাষ্যমাণমশক্তিজম্
জিতমর্থং বিজানীয়াদবুধো মার্দবে সতি
4.7
এতচ্চৈব করিষ্যামো যত্নশ্চ ক্রিয়তামিহ
প্রস্থাপয়াম মিত্রেভ্যো বলান্যুদ্যোজয়ন্তু নঃ
4.8
শল্যস্য ধৃষ্টকেতোশ্চ জয়ত্সেনস্য চাভিভোঃ
কেকয়ানাং চ সর্বেষাং দূতা গচ্ছন্তু শীঘ্রগাঃ
4.9
স তু দুর্যোধনো নূনং প্রেষয়িষ্যতি সর্বশঃ
পূর্বাভিপন্নাঃ সন্তশ্চ ভজন্তে পূর্বচোদকম্
4.10
তত্ত্বরধ্বং নরেন্দ্রাণাং পূর্বমেব প্রচোদনে
মহদ্ধি কার্যং বোঢব্যমিতি মে বর্ততে মতিঃ
4.11
শল্যস্য প্রেষ্যতাং শীঘ্রং যে চ তস্যানুগা নৃপাঃ
ভগদত্তায় রাজ্ঞে চ পূর্বসাগরবাসিনে
4.12
অমিতৌজসে তথোগ্রায় হার্দিক্যায়াহুকায় চ
দীর্ঘপ্রজ্ঞায় মল্লায় রোচমানায় চাভিভো
4.13
আনীয়তাং বৃহন্তশ্চ সেনাবিন্দুশ্চ পার্থিবঃ
পাপজিত্প্রতিবিন্ধ্যশ্চ চিত্রবর্মা সুবাস্তুকঃ
4.14
বাহ্লীকো মুঞ্জকেশশ্চ চৈদ্যাধিপতিরেব চ
সুপার্শ্বশ্চ সুবাহুশ্চ পৌরবশ্চ মহারথঃ
4.15
শকানাং পহ্লবানাং চ দরদানাং চ যে নৃপাঃ
কাম্বোজা ঋষিকা যে চ পশ্চিমানূপকাশ্চ যে
4.16
জয়ত্সেনশ্চ কাশ্যশ্চ তথা পঞ্চনদা নৃপাঃ
ক্রাথপুত্রশ্চ দুর্ধর্ষঃ পার্বতীয়াশ্চ যে নৃপাঃ
4.17
জানকিশ্চ সুশর্মা চ মণিমান্পৌতিমত্স্যকঃ
পাংসুরাষ্ট্রাধিপশ্চৈব ধৃষ্টকেতুশ্চ বীর্যবান্
4.18
ঔড্রশ্চ দণ্ডধারশ্চ বৃহত্সেনশ্চ বীর্যবান্
অপরাজিতো নিষাদশ্চ শ্রেণিমান্বসুমানপি
4.19
বৃহদ্বলো মহৌজাশ্চ বাহুঃ পরপুরংজয়ঃ
সমুদ্রসেনো রাজা চ সহ পুত্রেণ বীর্যবান্
4.20
অদারিশ্চ নদীজশ্চ কর্ণবেষ্টশ্চ পার্থিবঃ
সমর্থশ্চ সুবীরশ্চ মার্জারঃ কন্যকস্তথা
4.21
মহাবীরশ্চ কদ্রুশ্চ নিকরস্তুমুলঃ ক্রথঃ
নীলশ্চ বীরধর্মা চ ভূমিপালশ্চ বীর্যবান্
4.22
দুর্জয়ো দন্তবক্ত্রশ্চ রুক্মী চ জনমেজয়ঃ
আষাঢো বায়ুবেগশ্চ পূর্বপালী চ পার্থিবঃ
4.23
ভূরিতেজা দেবকশ্চ একলব্যস্য চাত্মজঃ
কারূষকাশ্চ রাজানঃ ক্ষেমধূর্তিশ্চ বীর্যবান্
4.24
উদ্ভবঃ ক্ষেমকশ্চৈব বাটধানশ্চ পার্থিবঃ
শ্রুতায়ুশ্চ দৃঢায়ুশ্চ শাল্বপুত্রশ্চ বীর্যবান্
4.25
কুমারশ্চ কলিঙ্গানামীশ্বরো যুদ্ধদুর্মদঃ
এতেষাং প্রেষ্যতাং শীঘ্রমেতদ্ধি মম রোচতে
4.26
অয়ং চ ব্রাহ্মণঃ শীঘ্রং মম রাজন্পুরোহিতঃ
প্রেষ্যতাং ধৃতরাষ্ট্রায় বাক্যমস্মিন্সমর্প্যতাম্
4.27
যথা দুর্যোধনো বাচ্যো যথা শাংতনবো নৃপঃ
ধৃতরাষ্ট্রো যথা বাচ্যো দ্রোণশ্চ বিদুষাং বরঃ