অধ্যায় 1

1.1

বৈশংপায়ন উবাচ
কৃত্বা বিবাহং তু কুরুপ্রবীরা;স্তদাভিমন্যোর্মুদিতস্বপক্ষাঃ
বিশ্রম্য চত্বার্যুষসঃ প্রতীতাঃ; সভাং বিরাটস্য ততোঽভিজগ্মুঃ

1.2

সভা তু সা মত্স্যপতেঃ সমৃদ্ধা; মণিপ্রবেকোত্তমরত্নচিত্রা
ন্যস্তাসনা মাল্যবতী সুগন্ধা; তামভ্যয়ুস্তে নররাজবর্যাঃ

1.3

অথাসনান্যাবিশতাং পুরস্তা;দুভৌ বিরাটদ্রুপদৌ নরেন্দ্রৌ
বৃদ্ধশ্চ মান্যঃ পৃথিবীপতীনাং; পিতামহো রামজনার্দনাভ্যাম্

1.4

পাঞ্চালরাজস্য সমীপতস্তু; শিনিপ্রবীরঃ সহরৌহিণেয়ঃ
মত্স্যস্য রাজ্ঞস্তু সুসংনিকৃষ্টৌ; জনার্দনশ্চৈব যুধিষ্ঠিরশ্চ

1.5

সুতাশ্চ সর্বে দ্রুপদস্য রাজ্ঞো; ভীমার্জুনৌ মাদ্রবতীসুতৌ চ
প্রদ্যুম্নসাম্বৌ চ যুধি প্রবীরৌ; বিরাটপুত্রশ্চ সহাভিমন্যুঃ

1.6

সর্বে চ শূরাঃ পিতৃভিঃ সমানা; বীর্যেণ রূপেণ বলেন চৈব
উপাবিশন্দ্রৌপদেয়াঃ কুমারাঃ; সুবর্ণচিত্রেষু বরাসনেষু

1.7

তথোপবিষ্টেষু মহারথেষু; বিভ্রাজমানাম্বরভূষণেষু
ররাজ সা রাজবতী সমৃদ্ধা; গ্রহৈরিব দ্যৌর্বিমলৈরুপেতা

1.8

ততঃ কথাস্তে সমবায়য়ুক্তাঃ; কৃত্বা বিচিত্রাঃ পুরুষপ্রবীরাঃ
তস্থুর্মুহূর্তং পরিচিন্তয়ন্তঃ; কৃষ্ণং নৃপাস্তে সমুদীক্ষমাণাঃ

1.9

কথান্তমাসাদ্য চ মাধবেন; সংঘট্টিতাঃ পাণ্ডবকার্যহেতোঃ
তে রাজসিংহাঃ সহিতা হ্যশৃণ্ব;ন্বাক্যং মহার্থং চ মহোদয়ং চ

1.10

কৃষ্ণ উবাচ
সর্বৈর্ভবদ্ভির্বিদিতং যথায়ং; যুধিষ্ঠিরঃ সৌবলেনাক্ষবত্যাম্
জিতো নিকৃত্যাপহৃতং চ রাজ্যং; পুনঃ প্রবাসে সময়ঃ কৃতশ্চ

1.11

শক্তৈর্বিজেতুং তরসা মহীং চ; সত্যে স্থিতৈস্তচ্চরিতং যথাবৎ
পাণ্ডোঃ সুতৈস্তদ্ব্রতমুগ্ররূপং; বর্ষাণি ষট্সপ্ত চ ভারতাগ্র্যৈঃ

1.12

ত্রয়োদশশ্চৈব সুদুস্তরোঽয়;মজ্ঞায়মানৈর্ভবতাং সমীপে
ক্লেশানসহ্যাংশ্চ তিতিক্ষমাণৈ;র্যথোষিতং তদ্বিদিতং চ সর্বম্

1.13

এবং গতে ধর্মসুতস্য রাজ্ঞো; দুর্যোধনস্যাপি চ যদ্ধিতং স্যাৎ
তচ্চিন্তয়ধ্বং কুরুপাণ্ডবানাং; ধর্ম্যং চ যুক্তং চ যশস্করং চ

1.14

অধর্ময়ুক্তং চ ন কাময়েত; রাজ্যং সুরাণামপি ধর্মরাজঃ
ধর্মার্থয়ুক্তং চ মহীপতিত্বং; গ্রামেঽপি কস্মিংশ্চিদয়ং বুভূষেৎ

1.15

পিত্র্যং হি রাজ্যং বিদিতং নৃপাণাং; যথাপকৃষ্টং ধৃতরাষ্ট্রপুত্রৈঃ
মিথ্যোপচারেণ তথাপ্যনেন; কৃচ্ছ্রং মহত্প্রাপ্তমসহ্যরূপম্

1.16

ন চাপি পার্থো বিজিতো রণে তৈঃ; স্বতেজসা ধৃতরাষ্ট্রস্য পুত্রৈঃ
তথাপি রাজা সহিতঃ সুহৃদ্ভি;রভীপ্সতেঽনাময়মেব তেষাম্

1.17

যত্তত্স্বয়ং পাণ্ডুসুতৈর্বিজিত্য; সমাহৃতং ভূমিপতীন্নিপীড্য
তত্প্রার্থয়ন্তে পুরুষপ্রবীরাঃ; কুন্তীসুতা মাদ্রবতীসুতৌ চ

1.18

বালাস্ত্বিমে তৈর্বিবিধৈরুপায়ৈঃ; সংপ্রার্থিতা হন্তুমমিত্রসাহাঃ
রাজ্যং জিহীর্ষদ্ভিরসদ্ভিরুগ্রৈঃ; সর্বং চ তদ্বো বিদিতং যথাবৎ

1.19

তেষাং চ লোভং প্রসমীক্ষ্য বৃদ্ধং; ধর্মাত্মতাং চাপি যুধিষ্ঠিরস্য
সংবন্ধিতাং চাপি সমীক্ষ্য তেষাং; মতিং কুরুধ্বং সহিতাঃ পৃথক্চ

1.20

ইমে চ সত্যেঽভিরতাঃ সদৈব; তং পারয়িত্বা সময়ং যথাবৎ
অতোঽন্যথা তৈরুপচর্যমাণা; হন্যুঃ সমেতান্ধৃতরাষ্ট্রপুত্রান্

1.21

তৈর্বিপ্রকারং চ নিশম্য রাজ্ঞঃ; সুহৃজ্জনাস্তান্পরিবারয়েয়ুঃ
যুদ্ধেন বাধেয়ুরিমাংস্তথৈব; তৈর্বধ্যমানা যুধি তাংশ্চ হন্যুঃ

1.22

তথাপি নেমেঽল্পতয়া সমর্থা;স্তেষাং জয়ায়েতি ভবেন্মতং বঃ
সমেত্য সর্বে সহিতাঃ সুহৃদ্ভি;স্তেষাং বিনাশায় যতেয়ুরেব

1.23

দুর্যোধনস্যাপি মতং যথাব;ন্ন জ্ঞায়তে কিং নু করিষ্যতীতি
অজ্ঞায়মানে চ মতে পরস্য; কিং স্যাত্সমারভ্যতমং মতং বঃ

1.24

তস্মাদিতো গচ্ছতু ধর্মশীলঃ; শুচিঃ কুলীনঃ পুরুষোঽপ্রমত্তঃ
দূতঃ সমর্থঃ প্রশমায় তেষাং; রাজ্যার্ধদানায় যুধিষ্ঠিরস্য

1.25

নিশম্য বাক্যং তু জনার্দনস্য; ধর্মার্থয়ুক্তং মধুরং সমং চ
সমাদদে বাক্যমথাগ্রজোঽস্য; সংপূজ্য বাক্যং তদতীব রাজন্

Contains text from DharmicData, made available under the Open Database License (ODbL). Simple meanings are written by AI and can contain mistakes.