UtshovChapter 2
2.1
बलदेव उवाच
श्रुतं भवद्भिर्गदपूर्वजस्य; वाक्यं यथा धर्मवदर्थवच्च
अजातशत्रोश्च हितं हितं च; दुर्योधनस्यापि तथैव राज्ञः
Baladeva uvacha
Shrutam bhavadbhirgadapurvajasya; vakyam yatha dharmavadarthavachcha
Ajatashatroshcha hitam hitam cha; duryodhanasyapi tathaiva ragyah
2.2
अर्धं हि राज्यस्य विसृज्य वीराः; कुन्तीसुतास्तस्य कृते यतन्ते
प्रदाय चार्धं धृतराष्ट्रपुत्रः; सुखी सहास्माभिरतीव मोदेत्
Ardham hi rajyasya visrijya virah; kuntisutastasya krite yatante
Pradaya chardham dhritarashtraputrah; sukhi sahasmabhirativa modet
2.3
लब्ध्वा हि राज्यं पुरुषप्रवीराः; सम्यक्प्रवृत्तेषु परेषु चैव
ध्रुवं प्रशान्ताः सुखमाविशेयु;स्तेषां प्रशान्तिश्च हितं प्रजानाम्
Labdhva hi rajyam purushapravirah; samyakpravritteshu pareshu chaiva
Dhruvam prashantah sukhamavisheyu;stesham prashantishcha hitam prajanam
2.4
दुर्योधनस्यापि मतं च वेत्तुं; वक्तुं च वाक्यानि युधिष्ठिरस्य
प्रियं मम स्याद्यदि तत्र कश्चि;द्व्रजेच्छमार्थं कुरुपाण्डवानाम्
Duryodhanasyapi matam cha vettum; vaktum cha vakyani yudhishthirasya
Priyam mama syadyadi tatra kashchi;dvrajechchhamartham kurupandavanam
2.5
स भीष्ममामन्त्र्य कुरुप्रवीरं; वैचित्रवीर्यं च महानुभावम्
द्रोणं सपुत्रं विदुरं कृपं च; गान्धारराजं च ससूतपुत्रम्
Sa bhishmamamantrya kurupraviram; vaichitraviryam cha mahanubhavam
Dronam saputram viduram kripam cha; gandhararajam cha sasutaputram
2.6
सर्वे च येऽन्ये धृतराष्ट्रपुत्रा; बलप्रधाना निगमप्रधानाः
स्थिताश्च धर्मेषु यथा स्वकेषु; लोकप्रवीराः श्रुतकालवृद्धाः
Sarve cha yenye dhritarashtraputra; balapradhana nigamapradhanah
Sthitashcha dharmeshu yatha svakeshu; lokapravirah shrutakalavriddhah
2.7
एतेषु सर्वेषु समागतेषु; पौरेषु वृद्धेषु च संगतेषु
ब्रवीतु वाक्यं प्रणिपातयुक्तं; कुन्तीसुतस्यार्थकरं यथा स्यात्
Eteshu sarveshu samagateshu; paureshu vriddheshu cha sangateshu
Bravitu vakyam pranipatayuktam; kuntisutasyarthakaram yatha syat
2.8
सर्वास्ववस्थासु च ते न कौट्या;द्ग्रस्तो हि सोऽर्थो बलमाश्रितैस्तैः
प्रियाभ्युपेतस्य युधिष्ठिरस्य; द्यूते प्रमत्तस्य हृतं च राज्यम्
Sarvasvavasthasu cha te na kautya;dgrasto hi sortho balamashritaistaih
Priyabhyupetasya yudhishthirasya; dyute pramattasya hritam cha rajyam
2.9
निवार्यमाणश्च कुरुप्रवीरैः; सर्वैः सुहृद्भिर्ह्ययमप्यतज्ज्ञः
गान्धारराजस्य सुतं मताक्षं; समाह्वयेद्देवितुमाजमीढः
Nivaryamanashcha kurupraviraih; sarvaih suhridbhirhyayamapyatajgyah
Gandhararajasya sutam mataksham; samahvayeddevitumajamidhah
2.10
दुरोदरास्तत्र सहस्रशोऽन्ये; युधिष्ठिरो यान्विषहेत जेतुम्
उत्सृज्य तान्सौबलमेव चायं; समाह्वयत्तेन जितोऽक्षवत्याम्
Durodarastatra sahasrashonye; yudhishthiro yanvishaheta jetum
Utsrijya tansaubalameva chayam; samahvayattena jitokshavatyam
2.11
स दीव्यमानः प्रतिदेवनेन; अक्षेषु नित्यं सुपराङ्मुखेषु
संरम्भमाणो विजितः प्रसह्य; तत्रापराधः शकुनेर्न कश्चित्
Sa divyamanah pratidevanena; aksheshu nityam suparanmukheshu
Sanrambhamano vijitah prasahya; tatraparadhah shakunerna kashchit
2.12
तस्मात्प्रणम्यैव वचो ब्रवीतु; वैचित्रवीर्यं बहुसामयुक्तम्
तथा हि शक्यो धृतराष्ट्रपुत्रः; स्वार्थे नियोक्तुं पुरुषेण तेन
Tasmatpranamyaiva vacho bravitu; vaichitraviryam bahusamayuktam
Tatha hi shakyo dhritarashtraputrah; svarthe niyoktum purushena tena
2.13
वैशंपायन उवाच
एवं ब्रुवत्येव मधुप्रवीरे; शिनिप्रवीरः सहसोत्पपात
तच्चापि वाक्यं परिनिन्द्य तस्य; समाददे वाक्यमिदं समन्युः
Vaishampayana uvacha
Evam bruvatyeva madhupravire; shinipravirah sahasotpapata
Tachchapi vakyam parinindya tasya; samadade vakyamidam samanyuh