Utshovঅধ্যায় 298
298.1
বৈশংপায়ন উবাচ
ততস্তে যক্ষবচনাদুদতিষ্ঠন্ত পাণ্ডবাঃ
ক্ষুত্পিপাসে চ সর্বেষাং ক্ষণে তস্মিন্ব্যগচ্ছতাম্
298.2
যুধিষ্ঠির উবাচ
সরস্যেকেন পাদেন তিষ্ঠন্তমপরাজিতম্
পৃচ্ছামি কো ভবান্দেবো ন মে যক্ষো মতো ভবান্
298.3
বসূনাং বা ভবানেকো রুদ্রাণামথ বা ভবান্
অথ বা মরুতাং শ্রেষ্ঠো বজ্রী বা ত্রিদশেশ্বরঃ
298.4
মম হি ভ্রাতর ইমে সহস্রশতয়োধিনঃ
ন তং যোগং প্রপশ্যামি যেন স্যুর্বিনিপাতিতাঃ
298.5
সুখং প্রতিবিবুদ্ধানামিন্দ্রিয়াণ্যুপলক্ষয়ে
স ভবান্সুহৃদস্মাকমথ বা নঃ পিতা ভবান্
298.6
যক্ষ উবাচ
অহং তে জনকস্তাত ধর্মো মৃদুপরাক্রম
ত্বাং দিদৃক্ষুরনুপ্রাপ্তো বিদ্ধি মাং ভরতর্ষভ
298.7
যশঃ সত্যং দমঃ শৌচমার্জবং হ্রীরচাপলম্
দানং তপো ব্রহ্মচর্যমিত্যেতাস্তনবো মম
298.8
অহিংসা সমতা শান্তিস্তপঃ শৌচমমত্সরঃ
দ্বারাণ্যেতানি মে বিদ্ধি প্রিয়ো হ্যসি সদা মম
298.9
দিষ্ট্যা পঞ্চসু রক্তোঽসি দিষ্ট্যা তে ষট্পদী জিতা
দ্বে পূর্বে মধ্যমে দ্বে চ দ্বে চান্তে সাংপরায়িকে
298.10
ধর্মোঽহমস্মি ভদ্রং তে জিজ্ঞাসুস্ত্বামিহাগতঃ
আনৃশংস্যেন তুষ্টোঽস্মি বরং দাস্যামি তেঽনঘ
298.11
বরং বৃণীষ্ব রাজেন্দ্র দাতা হ্যস্মি তবানঘ
যে হি মে পুরুষা ভক্তা ন তেষামস্তি দুর্গতিঃ
298.12
যুধিষ্ঠির উবাচ
অরণীসহিতং যস্য মৃগ আদায় গচ্ছতি
তস্যাগ্নয়ো ন লুপ্যেরন্প্রথমোঽস্তু বরো মম
298.13
ধর্ম উবাচ
অরণীসহিতং তস্য ব্রাহ্মণস্য হৃতং ময়া
মৃগবেষেণ কৌন্তেয় জিজ্ঞাসার্থং তব প্রভো
298.14
বৈশংপায়ন উবাচ
দদানীত্যেব ভগবানুত্তরং প্রত্যপদ্যত
অন্যং বরয় ভদ্রং তে বরং ত্বমমরোপম
298.15
যুধিষ্ঠির উবাচ
বর্ষাণি দ্বাদশারণ্যে ত্রয়োদশমুপস্থিতম্
তত্র নো নাভিজানীয়ুর্বসতো মনুজাঃ ক্বচিৎ
298.16
বৈশংপায়ন উবাচ
দদানীত্যেব ভগবানুত্তরং প্রত্যপদ্যত
ভূয়শ্চাশ্বাসয়ামাস কৌন্তেয়ং সত্যবিক্রমম্
298.17
যদ্যপি স্বেন রূপেণ চরিষ্যথ মহীমিমাম্
ন বো বিজ্ঞাস্যতে কশ্চিত্ত্রিষু লোকেষু ভারত
298.18
বর্ষং ত্রয়োদশং চেদং মত্প্রসাদাত্কুরূদ্বহাঃ
বিরাটনগরে গূঢা অবিজ্ঞাতাশ্চরিষ্যথ
298.19
যদ্বঃ সংকল্পিতং রূপং মনসা যস্য যাদৃশম্
তাদৃশং তাদৃশং সর্বে ছন্দতো ধারয়িষ্যথ
298.20
অরণীসহিতং চেদং ব্রাহ্মণায় প্রয়চ্ছত
জিজ্ঞাসার্থং ময়া হ্যেতদাহৃতং মৃগরূপিণা
298.21
তৃতীয়ং গৃহ্যতাং পুত্র বরমপ্রতিমং মহৎ
ত্বং হি মত্প্রভবো রাজন্বিদুরশ্চ মমাংশভাক্
298.22
যুধিষ্ঠির উবাচ
দেবদেবো ময়া দৃষ্টো ভবান্সাক্ষাত্সনাতনঃ
যং দদাসি বরং তুষ্টস্তং গ্রহীষ্যাম্যহং পিতঃ
298.23
জয়েয়ং লোভমোহৌ চ ক্রোধং চাহং সদা বিভো
দানে তপসি সত্যে চ মনো মে সততং ভবেৎ
298.24
ধর্ম উবাচ
উপপন্নো গুণৈঃ সর্বৈঃ স্বভাবেনাসি পাণ্ডব
ভবান্ধর্মঃ পুনশ্চৈব যথোক্তং তে ভবিষ্যতি
298.25
বৈশংপায়ন উবাচ
ইত্যুক্ত্বান্তর্দধে ধর্মো ভগবাঁল্লোকভাবনঃ
সমেতাঃ পাণ্ডবাশ্চৈব সুখসুপ্তা মনস্বিনঃ
298.26
অভ্যেত্য চাশ্রমং বীরাঃ সর্ব এব গতক্লমাঃ
আরণেয়ং দদুস্তস্মৈ ব্রাহ্মণায় তপস্বিনে
298.27
ইদং সমুত্থানসমাগমং মহ;ত্পিতুশ্চ পুত্রস্য চ কীর্তিবর্ধনম্
পঠন্নরঃ স্যাদ্বিজিতেন্দ্রিয়ো বশী; সপুত্রপৌত্রঃ শতবর্ষভাগ্ভবেৎ
298.28
ন চাপ্যধর্মে ন সুহৃদ্বিভেদনে; পরস্বহারে পরদারমর্শনে
কদর্যভাবে ন রমেন্মনঃ সদা; নৃণাং সদাখ্যানমিদং বিজানতাম্