Utshovঅধ্যায় 297
297.1
বৈশংপায়ন উবাচ
স দদর্শ হতান্ভ্রাতৄঁল্লোকপালানিব চ্যুতান্
যুগান্তে সমনুপ্রাপ্তে শক্রপ্রতিমগৌরবান্
297.2
বিপ্রকীর্ণধনুর্বাণং দৃষ্ট্বা নিহতমর্জুনম্
ভীমসেনং যমৌ চোভৌ নির্বিচেষ্টান্গতায়ুষঃ
297.3
স দীর্ঘমুষ্ণং নিঃশ্বস্য শোকবাষ্পপরিপ্লুতঃ
বুদ্ধ্যা বিচিন্তয়ামাস বীরাঃ কেন নিপাতিতাঃ
297.4
নৈষাং শস্ত্রপ্রহারোঽস্তি পদং নেহাস্তি কস্যচিৎ
ভূতং মহদিদং মন্যে ভ্রাতরো যেন মে হতাঃ
একাগ্রং চিন্তয়িষ্যামি পীত্বা বেত্স্যামি বা জলম্
297.5
স্যাত্তু দুর্যোধনেনেদমুপাংশুবিহিতং কৃতম্
গান্ধাররাজরচিতং সততং জিহ্মবুদ্ধিনা
297.6
যস্য কার্যমকার্যং বা সমমেব ভবত্যুত
কস্তস্য বিশ্বসেদ্বীরো দুর্মতেরকৃতাত্মনঃ
297.7
অথ বা পুরুষৈর্গূঢৈঃ প্রয়োগোঽয়ং দুরাত্মনঃ
ভবেদিতি মহাবাহুর্বহুধা সমচিন্তয়ৎ
297.8
তস্যাসীন্ন বিষেণেদমুদকং দূষিতং যথা
মুখবর্ণাঃ প্রসন্না মে ভ্রাতৄণামিত্যচিন্তয়ৎ
297.9
একৈকশশ্চৌঘবলানিমান্পুরুষসত্তমান্
কোঽন্যঃ প্রতিসমাসেত কালান্তকয়মাদৃতে
297.10
এতেনাধ্যবসায়েন তত্তোয়মবগাঢবান্
গাহমানশ্চ তত্তোয়মন্তরিক্ষাত্স শুশ্রুবে
297.11
যক্ষ উবাচ
অহং বকঃ শৈবলমত্স্যভক্ষো; ময়া নীতাঃ প্রেতবশং তবানুজাঃ
ত্বং পঞ্চমো ভবিতা রাজপুত্র; ন চেত্প্রশ্নান্পৃচ্ছতো ব্যাকরোষি
297.12
মা তাত সাহসং কার্ষীর্মম পূর্বপরিগ্রহঃ
প্রশ্নানুক্ত্বা তু কৌন্তেয় ততঃ পিব হরস্ব চ
297.13
যুধিষ্ঠির উবাচ
রুদ্রাণাং বা বসূনাং বা মরুতাং বা প্রধানভাক্
পৃচ্ছামি কো ভবান্দেবো নৈতচ্ছকুনিনা কৃতম্
297.14
হিমবান্পারিয়াত্রশ্চ বিন্ধ্যো মলয় এব চ
চত্বারঃ পর্বতাঃ কেন পাতিতা ভুবি তেজসা
297.15
অতীব তে মহত্কর্ম কৃতং বলবতাং বর
যন্ন দেবা ন গন্ধর্বা নাসুরা ন চ রাক্ষসাঃ
বিষহেরন্মহায়ুদ্ধে কৃতং তে তন্মহাদ্ভুতম্
297.16
ন তে জানামি যত্কার্যং নাভিজানামি কাঙ্ক্ষিতম্
কৌতূহলং মহজ্জাতং সাধ্বসং চাগতং মম
297.17
যেনাস্ম্যুদ্বিগ্নহৃদয়ঃ সমুত্পন্নশিরোজ্বরঃ
পৃচ্ছামি ভগবংস্তস্মাত্কো ভবানিহ তিষ্ঠতি
297.18
যক্ষ উবাচ
যক্ষোঽহমস্মি ভদ্রং তে নাস্মি পক্ষী জলেচরঃ
ময়ৈতে নিহতাঃ সর্বে ভ্রাতরস্তে মহৌজসঃ
297.19
বৈশংপায়ন উবাচ
ততস্তামশিবাং শ্রুত্বা বাচং স পরুষাক্ষরাম্
যক্ষস্য ব্রুবতো রাজন্নুপক্রম্য তদা স্থিতঃ
297.20
বিরূপাক্ষং মহাকায়ং যক্ষং তালসমুচ্ছ্রয়ম্
জ্বলনার্কপ্রতীকাশমধৃষ্যং পর্বতোপমম্
297.21
সেতুমাশ্রিত্য তিষ্ঠন্তং দদর্শ ভরতর্ষভঃ
মেঘগম্ভীরয়া বাচা তর্জয়ন্তং মহাবলম্
297.22
যক্ষ উবাচ
ইমে তে ভ্রাতরো রাজন্বার্যমাণা ময়াসকৃৎ
বলাত্তোয়ং জিহীর্ষন্তস্ততো বৈ সূদিতা ময়া
297.23
ন পেয়মুদকং রাজন্প্রাণানিহ পরীপ্সতা
পার্থ মা সাহসং কার্ষীর্মম পূর্বপরিগ্রহঃ
প্রশ্নানুক্ত্বা তু কৌন্তেয় ততঃ পিব হরস্ব চ
297.24
যুধিষ্ঠির উবাচ
নৈবাহং কাময়ে যক্ষ তব পূর্বপরিগ্রহম্
কামং নৈতত্প্রশংসন্তি সন্তো হি পুরুষাঃ সদা
297.25
যদাত্মনা স্বমাত্মানং প্রশংসেত্পুরুষঃ প্রভো
যথাপ্রজ্ঞং তু তে প্রশ্নান্প্রতিবক্ষ্যামি পৃচ্ছ মাম্
297.26
যক্ষ উবাচ
কিং স্বিদাদিত্যমুন্নয়তি কে চ তস্যাভিতশ্চরাঃ
কশ্চৈনমস্তং নয়তি কস্মিংশ্চ প্রতিতিষ্ঠতি
297.27
যুধিষ্ঠির উবাচ
ব্রহ্মাদিত্যমুন্নয়তি দেবাস্তস্যাভিতশ্চরাঃ
ধর্মশ্চাস্তং নয়তি চ সত্যে চ প্রতিতিষ্ঠতি
297.28
যক্ষ উবাচ
কেন স্বিচ্ছ্রোত্রিয়ো ভবতি কেন স্বিদ্বিন্দতে মহৎ
কেন দ্বিতীয়বান্ভবতি রাজন্কেন চ বুদ্ধিমান্
297.29
যুধিষ্ঠির উবাচ
শ্রুতেন শ্রোত্রিয়ো ভবতি তপসা বিন্দতে মহৎ
ধৃত্যা দ্বিতীয়বান্ভবতি বুদ্ধিমান্বৃদ্ধসেবয়া
297.30
যক্ষ উবাচ
কিং ব্রাহ্মণানাং দেবত্বং কশ্চ ধর্মঃ সতামিব
কশ্চৈষাং মানুষো ভাবঃ কিমেষামসতামিব
297.31
যুধিষ্ঠির উবাচ
স্বাধ্যায় এষাং দেবত্বং তপ এষাং সতামিব
মরণং মানুষো ভাবঃ পরিবাদোঽসতামিব
297.32
যক্ষ উবাচ
কিং ক্ষত্রিয়াণাং দেবত্বং কশ্চ ধর্মঃ সতামিব
কশ্চৈষাং মানুষো ভাবঃ কিমেষামসতামিব
297.33
যুধিষ্ঠির উবাচ
ইষ্বস্ত্রমেষাং দেবত্বং যজ্ঞ এষাং সতামিব
ভয়ং বৈ মানুষো ভাবঃ পরিত্যাগোঽসতামিব
297.34
যক্ষ উবাচ
কিমেকং যজ্ঞিয়ং সাম কিমেকং যজ্ঞিয়ং যজুঃ
কা চৈকা বৃশ্চতে যজ্ঞং কাং যজ্ঞো নাতিবর্ততে
297.35
যুধিষ্ঠির উবাচ
প্রাণো বৈ যজ্ঞিয়ং সাম মনো বৈ যজ্ঞিয়ং যজুঃ
বাগেকা বৃশ্চতে যজ্ঞং তাং যজ্ঞো নাতিবর্ততে
297.36
যক্ষ উবাচ
কিং স্বিদাপততাং শ্রেষ্ঠং কিং স্বিন্নিপততাং বরম্
কিং স্বিত্প্রতিষ্ঠমানানাং কিং স্বিত্প্রবদতাং বরম্
297.37
যুধিষ্ঠির উবাচ
বর্ষমাপততাং শ্রেষ্ঠং বীজং নিপততাং বরম্
গাবঃ প্রতিষ্ঠমানানাং পুত্রঃ প্রবদতাং বরঃ
297.38
যক্ষ উবাচ
ইন্দ্রিয়ার্থাননুভবন্বুদ্ধিমাঁল্লোকপূজিতঃ
সংমতঃ সর্বভূতানামুচ্ছ্বসন্কো ন জীবতি
297.39
যুধিষ্ঠির উবাচ
দেবতাতিথিভৃত্যানাং পিতৄণামাত্মনশ্চ যঃ
ন নির্বপতি পঞ্চানামুচ্ছ্বসন্ন স জীবতি
297.40
যক্ষ উবাচ
কিং স্বিদ্গুরুতরং ভূমেঃ কিং স্বিদুচ্চতরং চ খাৎ
কিং স্বিচ্ছীঘ্রতরং বায়োঃ কিং স্বিদ্বহুতরং নৃণাম্
297.41
যুধিষ্ঠির উবাচ
মাতা গুরুতরা ভূমেঃ পিতা উচ্চতরশ্চ খাৎ
মনঃ শীঘ্রতরং বায়োশ্চিন্তা বহুতরী নৃণাম্
297.42
যক্ষ উবাচ
কিং স্বিত্সুপ্তং ন নিমিষতি কিং স্বিজ্জাতং ন চোপতি
কস্য স্বিদ্ধৃদয়ং নাস্তি কিং স্বিদ্বেগেন বর্ধতে
297.43
যুধিষ্ঠির উবাচ
মত্স্যঃ সুপ্তো ন নিমিষত্যণ্ডং জাতং ন চোপতি
অশ্মনো হৃদয়ং নাস্তি নদী বেগেন বর্ধতে
297.44
যক্ষ উবাচ
কিং স্বিত্প্রবসতো মিত্রং কিং স্বিন্মিত্রং গৃহে সতঃ
আতুরস্য চ কিং মিত্রং কিং স্বিন্মিত্রং মরিষ্যতঃ
297.45
যুধিষ্ঠির উবাচ
সার্থঃ প্রবসতো মিত্রং ভার্যা মিত্রং গৃহে সতঃ
আতুরস্য ভিষঙ্মিত্রং দানং মিত্রং মরিষ্যতঃ
297.46
যক্ষ উবাচ
কিং স্বিদেকো বিচরতি জাতঃ কো জায়তে পুনঃ
কিং স্বিদ্ধিমস্য ভৈষজ্যং কিং স্বিদাবপনং মহৎ
297.47
যুধিষ্ঠির উবাচ
সূর্য একো বিচরতি চন্দ্রমা জায়তে পুনঃ
অগ্নির্হিমস্য ভৈষজ্যং ভূমিরাবপনং মহৎ
297.48
যক্ষ উবাচ
কিং স্বিদেকপদং ধর্ম্যং কিং স্বিদেকপদং যশঃ
কিং স্বিদেকপদং স্বর্গ্যং কিং স্বিদেকপদং সুখম্
297.49
যুধিষ্ঠির উবাচ
দাক্ষ্যমেকপদং ধর্ম্যং দানমেকপদং যশঃ
সত্যমেকপদং স্বর্গ্যং শীলমেকপদং সুখম্
297.50
যক্ষ উবাচ
কিং স্বিদাত্মা মনুষ্যস্য কিং স্বিদ্দৈবকৃতঃ সখা
উপজীবনং কিং স্বিদস্য কিং স্বিদস্য পরায়ণম্
297.51
যুধিষ্ঠির উবাচ
পুত্র আত্মা মনুষ্যস্য ভার্যা দৈবকৃতঃ সখা
উপজীবনং চ পর্জন্যো দানমস্য পরায়ণম্
297.52
যক্ষ উবাচ
ধন্যানামুত্তমং কিং স্বিদ্ধনানাং কিং স্বিদুত্তমম্
লাভানামুত্তমং কিং স্বিত্কিং সুখানাং তথোত্তমম্
297.53
যুধিষ্ঠির উবাচ
ধন্যানামুত্তমং দাক্ষ্যং ধনানামুত্তমং শ্রুতম্
লাভানাং শ্রেষ্ঠমারোগ্যং সুখানাং তুষ্টিরুত্তমা
297.54
যক্ষ উবাচ
কশ্চ ধর্মঃ পরো লোকে কশ্চ ধর্মঃ সদাফলঃ
কিং নিয়ম্য ন শোচন্তি কৈশ্চ সংধির্ন জীর্যতে
297.55
যুধিষ্ঠির উবাচ
আনৃশংস্যং পরো ধর্মস্ত্রয়ীধর্মঃ সদাফলঃ
মনো যম্য ন শোচন্তি সদ্ভিঃ সংধির্ন জীর্যতে
297.56
যক্ষ উবাচ
কিং নু হিত্বা প্রিয়ো ভবতি কিং নু হিত্বা ন শোচতি
কিং নু হিত্বার্থবান্ভবতি কিং নু হিত্বা সুখী ভবেৎ
297.57
যুধিষ্ঠির উবাচ
মানং হিত্বা প্রিয়ো ভবতি ক্রোধং হিত্বা ন শোচতি
কামং হিত্বার্থবান্ভবতি লোভং হিত্বা সুখী ভবেৎ
297.58
যক্ষ উবাচ
মৃতঃ কথং স্যাত্পুরুষঃ কথং রাষ্ট্রং মৃতং ভবেৎ
শ্রাদ্ধং মৃতং কথং চ স্যাত্কথং যজ্ঞো মৃতো ভবেৎ
297.59
যুধিষ্ঠির উবাচ
মৃতো দরিদ্রঃ পুরুষো মৃতং রাষ্ট্রমরাজকম্
মৃতমশ্রোত্রিয়ং শ্রাদ্ধং মৃতো যজ্ঞস্ত্বদক্ষিণঃ
297.60
যক্ষ উবাচ
কা দিক্কিমুদকং প্রোক্তং কিমন্নং পার্থ কিং বিষম্
শ্রাদ্ধস্য কালমাখ্যাহি ততঃ পিব হরস্ব চ
297.61
যুধিষ্ঠির উবাচ
সন্তো দিগ্জলমাকাশং গৌরন্নং প্রার্থনা বিষম্
শ্রাদ্ধস্য ব্রাহ্মণঃ কালঃ কথং বা যক্ষ মন্যসে
297.62
যক্ষ উবাচ
ব্যাখ্যাতা মে ত্বয়া প্রশ্না যাথাতথ্যং পরংতপ
পুরুষং ত্বিদানীমাখ্যাহি যশ্চ সর্বধনী নরঃ
297.63
যুধিষ্ঠির উবাচ
দিবং স্পৃশতি ভূমিং চ শব্দঃ পুণ্যস্য কর্মণঃ
যাবত্স শব্দো ভবতি তাবত্পুরুষ উচ্যতে
297.64
তুল্যে প্রিয়াপ্রিয়ে যস্য সুখদুঃখে তথৈব চ
অতীতানাগতে চোভে স বৈ সর্বধনী নরঃ
297.65
যক্ষ উবাচ
ব্যাখ্যাতঃ পুরুষো রাজন্যশ্চ সর্বধনী নরঃ
তস্মাত্তবৈকো ভ্রাতৄণাং যমিচ্ছসি স জীবতু
297.66
যুধিষ্ঠির উবাচ
শ্যামো য এষ রক্তাক্ষো বৃহচ্ছাল ইবোদ্গতঃ
ব্যূঢোরস্কো মহাবাহুর্নকুলো যক্ষ জীবতু
297.67
যক্ষ উবাচ
প্রিয়স্তে ভীমসেনোঽয়মর্জুনো বঃ পরায়ণম্
স কস্মান্নকুলং রাজন্সাপত্নং জীবমিচ্ছসি
297.68
যস্য নাগসহস্রেণ দশসংখ্যেন বৈ বলম্
তুল্যং তং ভীমমুত্সৃজ্য নকুলং জীবমিচ্ছসি
297.69
তথৈনং মনুজাঃ প্রাহুর্ভীমসেনং প্রিয়ং তব
অথ কেনানুভাবেন সাপত্নং জীবমিচ্ছসি
297.70
যস্য বাহুবলং সর্বে পাণ্ডবাঃ সমুপাশ্রিতাঃ
অর্জুনং তমপাহায় নকুলং জীবমিচ্ছসি
297.71
যুধিষ্ঠির উবাচ
আনৃশংস্যং পরো ধর্মঃ পরমার্থাচ্চ মে মতম্
আনৃশংস্যং চিকীর্ষামি নকুলো যক্ষ জীবতু
297.72
ধর্মশীলঃ সদা রাজা ইতি মাং মানবা বিদুঃ
স্বধর্মান্ন চলিষ্যামি নকুলো যক্ষ জীবতু
297.73
যথা কুন্তী তথা মাদ্রী বিশেষো নাস্তি মে তয়োঃ
মাতৃভ্যাং সমমিচ্ছামি নকুলো যক্ষ জীবতু
297.74
যক্ষ উবাচ
যস্য তেঽর্থাচ্চ কামাচ্চ আনৃশংস্যং পরং মতম্
তস্মাত্তে ভ্রাতরঃ সর্বে জীবন্তু ভরতর্ষভ