Utshovঅধ্যায় 296
296.1
যুধিষ্ঠির উবাচ
নাপদামস্তি মর্যাদা ন নিমিত্তং ন কারণম্
ধর্মস্তু বিভজত্যত্র উভয়োঃ পুণ্যপাপয়োঃ
296.2
ভীম উবাচ
প্রাতিকাম্যনয়ত্কৃষ্ণাং সভায়াং প্রেষ্যবত্তদা
ন ময়া নিহতস্তত্র তেন প্রাপ্তাঃ স্ম সংশয়ম্
296.3
অর্জুন উবাচ
বাচস্তীক্ষ্ণাস্থিভেদিন্যঃ সূতপুত্রেণ ভাষিতাঃ
অতিতীক্ষ্ণা ময়া ক্ষান্তাস্তেন প্রাপ্তাঃ স্ম সংশয়ম্
296.4
সহদেব উবাচ
শকুনিস্ত্বাং যদাজৈষীদক্ষদ্যূতেন ভারত
স ময়া ন হতস্তত্র তেন প্রাপ্তাঃ স্ম সংশয়ম্
296.5
বৈশংপায়ন উবাচ
ততো যুধিষ্ঠিরো রাজা নকুলং বাক্যমব্রবীৎ
আরুহ্য বৃক্ষং মাদ্রেয় নিরীক্ষস্ব দিশো দশ
296.6
পানীয়মন্তিকে পশ্য বৃক্ষান্বাপ্যুদকাশ্রয়ান্
ইমে হি ভ্রাতরঃ শ্রান্তাস্তব তাত পিপাসিতাঃ
296.7
নকুলস্তু তথেত্যুক্ত্বা শীঘ্রমারুহ্য পাদপম্
অব্রবীদ্ভ্রাতরং জ্যেষ্ঠমভিবীক্ষ্য সমন্ততঃ
296.8
পশ্যামি বহুলান্রাজন্বৃক্ষানুদকসংশ্রয়ান্
সারসানাং চ নির্হ্রাদমত্রোদকমসংশয়ম্
296.9
ততোঽব্রবীত্সত্যধৃতিঃ কুন্তীপুত্রো যুধিষ্ঠিরঃ
গচ্ছ সৌম্য ততঃ শীঘ্রং তূর্ণং পানীয়মানয়
296.10
নকুলস্তু তথেত্যুক্ত্বা ভ্রাতুর্জ্যেষ্ঠস্য শাসনাৎ
প্রাদ্রবদ্যত্র পানীয়ং শীঘ্রং চৈবান্বপদ্যত
296.11
স দৃষ্ট্বা বিমলং তোয়ং সারসৈঃ পরিবারিতম্
পাতুকামস্ততো বাচমন্তরিক্ষাত্স শুশ্রুবে
296.12
মা তাত সাহসং কার্ষীর্মম পূর্বপরিগ্রহঃ
প্রশ্নানুক্ত্বা তু মাদ্রেয় ততঃ পিব হরস্ব চ
296.13
অনাদৃত্য তু তদ্বাক্যং নকুলঃ সুপিপাসিতঃ
অপিবচ্ছীতলং তোয়ং পীত্বা চ নিপপাত হ
296.14
চিরায়মাণে নকুলে কুন্তীপুত্রো যুধিষ্ঠিরঃ
অব্রবীদ্ভ্রাতরং বীরং সহদেবমরিংদমম্
296.15
ভ্রাতা চিরায়তে তাত সহদেব তবাগ্রজঃ
তং চৈবানয় সোদর্যং পানীয়ং চ ত্বমানয়
296.16
সহদেবস্তথেত্যুক্ত্বা তাং দিশং প্রত্যপদ্যত
দদর্শ চ হতং ভূমৌ ভ্রাতরং নকুলং তদা
296.17
ভ্রাতৃশোকাভিসংতপ্তস্তৃষয়া চ প্রপীডিতঃ
অভিদুদ্রাব পানীয়ং ততো বাগভ্যভাষত
296.18
মা তাত সাহসং কার্ষীর্মম পূর্বপরিগ্রহঃ
প্রশ্নানুক্ত্বা যথাকামং ততঃ পিব হরস্ব চ
296.19
অনাদৃত্য তু তদ্বাক্যং সহদেবঃ পিপাসিতঃ
অপিবচ্ছীতলং তোয়ং পীত্বা চ নিপপাত হ
296.20
অথাব্রবীত্স বিজয়ং কুন্তীপুত্রো যুধিষ্ঠিরঃ
ভ্রাতরৌ তে চিরগতৌ বীভত্সো শত্রুকর্শন
তৌ চৈবানয় ভদ্রং তে পানীয়ং চ ত্বমানয়
296.21
এবমুক্তো গুডাকেশঃ প্রগৃহ্য সশরং ধনুঃ
আমুক্তখড্গো মেধাবী তত্সরঃ প্রত্যপদ্যত
296.22
যতঃ পুরুষশার্দূলৌ পানীয়হরণে গতৌ
তৌ দদর্শ হতৌ তত্র ভ্রাতরৌ শ্বেতবাহনঃ
296.23
প্রসুপ্তাবিব তৌ দৃষ্ট্বা নরসিংহঃ সুদুঃখিতঃ
ধনুরুদ্যম্য কৌন্তেয়ো ব্যলোকয়ত তদ্বনম্
296.24
নাপশ্যত্তত্র কিংচিত্স ভূতং তস্মিন্মহাবনে
সব্যসাচী ততঃ শ্রান্তঃ পানীয়ং সোঽভ্যধাবত
296.25
অভিধাবংস্ততো বাচমন্তরিক্ষাত্স শুশ্রুবে
কিমাসীদসি পানীয়ং নৈতচ্ছক্যং বলাত্ত্বয়া
296.26
কৌন্তেয় যদি বৈ প্রশ্নান্ময়োক্তান্প্রতিপত্স্যসে
ততঃ পাস্যসি পানীয়ং হরিষ্যসি চ ভারত
296.27
বারিতস্ত্বব্রবীত্পার্থো দৃশ্যমানো নিবারয়
যাবদ্বাণৈর্বিনির্ভিন্নঃ পুনর্নৈবং বদিষ্যসি
296.28
এবমুক্ত্বা ততঃ পার্থঃ শরৈরস্ত্রানুমন্ত্রিতৈঃ
ববর্ষ তাং দিশং কৃত্স্নাং শব্দবেধং চ দর্শয়ন্
296.29
কর্ণিনালীকনারাচানুত্সৃজন্ভরতর্ষভ
অনেকৈরিষুসংঘাতৈরন্তরিক্ষং ববর্ষ হ
296.30
যক্ষ উবাচ
কিং বিঘাতেন তে পার্থ প্রশ্নানুক্ত্বা ততঃ পিব
অনুক্ত্বা তু ততঃ প্রশ্নান্পীত্বৈব ন ভবিষ্যসি
296.31
বৈশংপায়ন উবাচ
স ত্বমোঘানিষূন্মুক্ত্বা তৃষ্ণয়াভিপ্রপীডিতঃ
অবিজ্ঞায়ৈব তান্প্রশ্নান্পীত্বৈব নিপপাত হ
296.32
অথাব্রবীদ্ভীমসেনং কুন্তীপুত্রো যুধিষ্ঠিরঃ
নকুলঃ সহদেবশ্চ বীভত্সুশ্চাপরাজিতঃ
296.33
চিরং গতাস্তোয়হেতোর্ন চাগচ্ছন্তি ভারত
তাংশ্চৈবানয় ভদ্রং তে পানীয়ং চ ত্বমানয়
296.34
ভীমসেনস্তথেত্যুক্ত্বা তাং দিশং প্রত্যপদ্যত
যত্র তে পুরুষব্যাঘ্রা ভ্রাতরোঽস্য নিপাতিতাঃ
296.35
তান্দৃষ্ট্বা দুঃখিতো ভীমস্তৃষয়া চ প্রপীডিতঃ
অমন্যত মহাবাহুঃ কর্ম তদ্যক্ষরক্ষসাম্
স চিন্তয়ামাস তদা যোদ্ধব্যং ধ্রুবমদ্য মে
296.36
পাস্যামি তাবত্পানীয়মিতি পার্থো বৃকোদরঃ
ততোঽভ্যধাবত্পানীয়ং পিপাসুঃ পুরুষর্ষভঃ
296.37
যক্ষ উবাচ
মা তাত সাহসং কার্ষীর্মম পূর্বপরিগ্রহঃ
প্রশ্নানুক্ত্বা তু কৌন্তেয় ততঃ পিব হরস্ব চ
296.38
বৈশংপায়ন উবাচ
এবমুক্তস্ততো ভীমো যক্ষেণামিততেজসা
অবিজ্ঞায়ৈব তান্প্রশ্নান্পীত্বৈব নিপপাত হ
296.39
ততঃ কুন্তীসুতো রাজা বিচিন্ত্য পুরুষর্ষভঃ
সমুত্থায় মহাবাহুর্দহ্যমানেন চেতসা
296.40
অপেতজননির্ঘোষং প্রবিবেশ মহাবনম্
রুরুভিশ্চ বরাহৈশ্চ পক্ষিভিশ্চ নিষেবিতম্
296.41
নীলভাস্বরবর্ণৈশ্চ পাদপৈরুপশোভিতম্
ভ্রমরৈরুপগীতং চ পক্ষিভিশ্চ মহায়শাঃ
296.42
স গচ্ছন্কাননে তস্মিন্হেমজালপরিষ্কৃতম্
দদর্শ তত্সরঃ শ্রীমান্বিশ্বকর্মকৃতং যথা
296.43
উপেতং নলিনীজালৈঃ সিন্ধুবারৈশ্চ বেতসৈঃ
কেতকৈঃ করবীরৈশ্চ পিপ্পলৈশ্চৈব সংবৃতম্
শ্রমার্তস্তদুপাগম্য সরো দৃষ্ট্বাথ বিস্মিতঃ