অধ্যায় 295

295.1

জনমেজয় উবাচ
এবং হৃতায়াং কৃষ্ণায়াং প্রাপ্য ক্লেশমনুত্তমম্
প্রতিলভ্য ততঃ কৃষ্ণাং কিমকুর্বত পাণ্ডবাঃ

বৈশংপায়ন উবাচ
এবং হৃতায়াং কৃষ্ণায়াং প্রাপ্য ক্লেশমনুত্তমম্
বিহায় কাম্যকং রাজা সহ ভ্রাতৃভিরচ্যুতঃ

পুনর্দ্বৈতবনং রম্যমাজগাম যুধিষ্ঠিরঃ
স্বাদুমূলফলং রম্যং মার্কণ্ডেয়াশ্রমং প্রতি

অনুগুপ্তফলাহারাঃ সর্ব এব মিতাশনাঃ
ন্যবসন্পাণ্ডবাস্তত্র কৃষ্ণয়া সহ ভারত

বসন্দ্বৈতবনে রাজা কুন্তীপুত্রো যুধিষ্ঠিরঃ
ভীমসেনোঽর্জুনশ্চৈব মাদ্রীপুত্রৌ চ পাণ্ডবৌ

ব্রাহ্মণার্থে পরাক্রান্তা ধর্মাত্মানো যতব্রতাঃ
ক্লেশমার্ছন্ত বিপুলং সুখোদর্কং পরংতপাঃ

অজাতশত্রুমাসীনং ভ্রাতৃভিঃ সহিতং বনে
আগম্য ব্রাহ্মণস্তূর্ণং সংতপ্ত ইদমব্রবীৎ

অরণীসহিতং মহ্যং সমাসক্তং বনস্পতৌ
মৃগস্য ঘর্ষমাণস্য বিষাণে সমসজ্জত

তদাদায় গতো রাজংস্ত্বরমাণো মহামৃগঃ
আশ্রমাত্ত্বরিতঃ শীঘ্রং প্লবমানো মহাজবঃ

তস্য গত্বা পদং শীঘ্রমাসাদ্য চ মহামৃগম্
অগ্নিহোত্রং ন লুপ্যেত তদানয়ত পাণ্ডবাঃ

ব্রাহ্মণস্য বচঃ শ্রুত্বা সংতপ্তোঽথ যুধিষ্ঠিরঃ
ধনুরাদায় কৌন্তেয়ঃ প্রাদ্রবদ্ভ্রাতৃভিঃ সহ

সন্নদ্ধা ধন্বিনঃ সর্বে প্রাদ্রবন্নরপুংগবাঃ
ব্রাহ্মণার্থে যতন্তস্তে শীঘ্রমন্বগমন্মৃগম্

কর্ণিনালীকনারাচানুত্সৃজন্তো মহারথাঃ
নাবিধ্যন্পাণ্ডবাস্তত্র পশ্যন্তো মৃগমন্তিকাৎ

তেষাং প্রয়তমানানাং নাদৃশ্যত মহামৃগঃ
অপশ্যন্তো মৃগং শ্রান্তা দুঃখং প্রাপ্তা মনস্বিনঃ

শীতলচ্ছায়মাসাদ্য ন্যগ্রোধং গহনে বনে
ক্ষুত্পিপাসাপরীতাঙ্গাঃ পাণ্ডবাঃ সমুপাবিশন্

তেষাং সমুপবিষ্টানাং নকুলো দুঃখিতস্তদা
অব্রবীদ্ভ্রাতরং জ্যেষ্ঠমমর্ষাত্কুরুসত্তম

নাস্মিন্কুলে জাতু মমজ্জ ধর্মো; ন চালস্যাদর্থলোপো বভূব
অনুত্তরাঃ সর্বভূতেষু ভূয়ঃ; সংপ্রাপ্তাঃ স্মঃ সংশয়ং কেন রাজন্