Utshovঅধ্যায় 294
294.1
বৈশংপায়ন উবাচ
দেবরাজমনুপ্রাপ্তং ব্রাহ্মণচ্ছদ্মনা বৃষঃ
দৃষ্ট্বা স্বাগতমিত্যাহ ন বুবোধাস্য মানসম্
294.2
হিরণ্যকণ্ঠীঃ প্রমদা গ্রামান্বা বহুগোকুলান্
কিং দদানীতি তং বিপ্রমুবাচাধিরথিস্ততঃ
294.3
ব্রাহ্মণ উবাচ
হিরণ্যকণ্ঠ্যঃ প্রমদা যচ্চান্যত্প্রীতিবর্ধনম্
নাহং দত্তমিহেচ্ছামি তদর্থিভ্যঃ প্রদীয়তাম্
294.4
যদেতত্সহজং বর্ম কুণ্ডলে চ তবানঘ
এতদুত্কৃত্য মে দেহি যদি সত্যব্রতো ভবান্
294.5
এতদিচ্ছাম্যহং ক্ষিপ্রং ত্বয়া দত্তং পরংতপ
এষ মে সর্বলাভানাং লাভঃ পরমকো মতঃ
294.6
কর্ণ উবাচ
অবনিং প্রমদা গাশ্চ নির্বাপং বহুবার্ষিকম্
তত্তে বিপ্র প্রদাস্যামি ন তু বর্ম ন কুণ্ডলে
294.7
বৈশংপায়ন উবাচ
এবং বহুবিধৈর্বাক্যৈর্যাচ্যমানঃ স তু দ্বিজঃ
কর্ণেন ভরতশ্রেষ্ঠ নান্যং বরময়াচত
294.8
সান্ত্বিতশ্চ যথাশক্তি পূজিতশ্চ যথাবিধি
নৈবান্যং স দ্বিজশ্রেষ্ঠঃ কাময়ামাস বৈ বরম্
294.9
যদা নান্যং প্রবৃণুতে বরং বৈ দ্বিজসত্তমঃ
তদৈনমব্রবীদ্ভূয়ো রাধেয়ঃ প্রহসন্নিব
294.10
সহজং বর্ম মে বিপ্র কুণ্ডলে চামৃতোদ্ভবে
তেনাবধ্যোঽস্মি লোকেষু ততো নৈতদ্দদাম্যহম্
294.11
বিশালং পৃথিবীরাজ্যং ক্ষেমং নিহতকণ্টকম্
প্রতিগৃহ্ণীষ্ব মত্তস্ত্বং সাধু ব্রাহ্মণপুংগব
294.12
কুণ্ডলাভ্যাং বিমুক্তোঽহং বর্মণা সহজেন চ
গমনীয়ো ভবিষ্যামি শত্রূণাং দ্বিজসত্তম
294.13
যদা নান্যং বরং বব্রে ভগবান্পাকশাসনঃ
ততঃ প্রহস্য কর্ণস্তং পুনরিত্যব্রবীদ্বচঃ
294.14
বিদিতো দেবদেবেশ প্রাগেবাসি মম প্রভো
ন তু ন্যায্যং ময়া দাতুং তব শক্র বৃথা বরম্
294.15
ত্বং হি দেবেশ্বরঃ সাক্ষাত্ত্বয়া দেয়ো বরো মম
অন্যেষাং চৈব ভূতানামীশ্বরো হ্যসি ভূতকৃৎ
294.16
যদি দাস্যামি তে দেব কুণ্ডলে কবচং তথা
বধ্যতামুপয়াস্যামি ত্বং চ শক্রাবহাস্যতাম্
294.17
তস্মাদ্বিনিময়ং কৃত্বা কুণ্ডলে বর্ম চোত্তমম্
হরস্ব শক্র কামং মে ন দদ্যামহমন্যথা
294.18
শক্র উবাচ
বিদিতোঽহং রবেঃ পূর্বমায়ন্নেব তবান্তিকম্
তেন তে সর্বমাখ্যাতমেবমেতন্ন সংশয়ঃ
294.19
কামমস্তু তথা তাত তব কর্ণ যথেচ্ছসি
বর্জয়িত্বা তু মে বজ্রং প্রবৃণীষ্ব যদিচ্ছসি
294.20
বৈশংপায়ন উবাচ
ততঃ কর্ণঃ প্রহৃষ্টস্তু উপসংগম্য বাসবম্
অমোঘাং শক্তিমভ্যেত্য বব্রে সংপূর্ণমানসঃ
294.21
কর্ণ উবাচ
বর্মণা কুণ্ডলাভ্যাং চ শক্তিং মে দেহি বাসব
অমোঘাং শত্রুসংঘানাং ঘাতনীং পৃতনামুখে
294.22
বৈশংপায়ন উবাচ
ততঃ সংচিন্ত্য মনসা মুহূর্তমিব বাসবঃ
শক্ত্যর্থং পৃথিবীপাল কর্ণং বাক্যমথাব্রবীৎ
294.23
কুণ্ডলে মে প্রয়চ্ছস্ব বর্ম চৈব শরীরজম্
গৃহাণ কর্ণ শক্তিং ত্বমনেন সময়েন মে
294.24
অমোঘা হন্তি শতশঃ শত্রূন্মম করচ্যুতা
পুনশ্চ পাণিমভ্যেতি মম দৈত্যান্বিনিঘ্নতঃ
294.25
সেয়ং তব করং প্রাপ্য হত্বৈকং রিপুমূর্জিতম্
গর্জন্তং প্রতপন্তং চ মামেবৈষ্যতি সূতজ
294.26
কর্ণ উবাচ
একমেবাহমিচ্ছামি রিপুং হন্তুং মহাহবে
গর্জন্তং প্রতপন্তং চ যতো মম ভয়ং ভবেৎ
294.27
ইন্দ্র উবাচ
একং হনিষ্যসি রিপুং গর্জন্তং বলিনং রণে
ত্বং তু যং প্রার্থয়স্যেকং রক্ষ্যতে স মহাত্মনা
294.28
যমাহুর্বেদবিদ্বাংসো বরাহমজিতং হরিম্
নারায়ণমচিন্ত্যং চ তেন কৃষ্ণেন রক্ষ্যতে
294.29
কর্ণ উবাচ
এবমপ্যস্তু ভগবন্নেকবীরবধে মম
অমোঘা প্রবরা শক্তির্যেন হন্যাং প্রতাপিনম্
294.30
উত্কৃত্য তু প্রদাস্যামি কুণ্ডলে কবচং চ তে
নিকৃত্তেষু চ গাত্রেষু ন মে বীভত্সতা ভবেৎ
294.31
ইন্দ্র উবাচ
ন তে বীভত্সতা কর্ণ ভবিষ্যতি কথংচন
ব্রণশ্চাপি ন গাত্রেষু যস্ত্বং নানৃতমিচ্ছসি
294.32
যাদৃশস্তে পিতুর্বর্ণস্তেজশ্চ বদতাং বর
তাদৃশেনৈব বর্ণেন ত্বং কর্ণ ভবিতা পুনঃ
294.33
বিদ্যমানেষু শস্ত্রেষু যদ্যমোঘামসংশয়ে
প্রমত্তো মোক্ষ্যসে চাপি ত্বয্যেবৈষা পতিষ্যতি
294.34
কর্ণ উবাচ
সংশয়ং পরমং প্রাপ্য বিমোক্ষ্যে বাসবীমিমাম্
যথা মামাত্থ শক্র ত্বং সত্যমেতদ্ব্রবীমি তে
294.35
বৈশংপায়ন উবাচ
ততঃ শক্তিং প্রজ্বলিতাং প্রতিগৃহ্য বিশাং পতে
শস্ত্রং গৃহীত্বা নিশিতং সর্বগাত্রাণ্যকৃন্তত
294.36
ততো দেবা মানবা দানবাশ্চ; নিকৃন্তন্তং কর্ণমাত্মানমেবম্
দৃষ্ট্বা সর্বে সিদ্ধসংঘাশ্চ নেদু;র্ন হ্যস্যাসীদ্দুঃখজো বৈ বিকারঃ
294.37
ততো দিব্যা দুন্দুভয়ঃ প্রণেদুঃ; পপাতোচ্চৈঃ পুষ্পবর্ষং চ দিব্যম্
দৃষ্ট্বা কর্ণং শস্ত্রসংকৃত্তগাত্রং; মুহুশ্চাপি স্ময়মানং নৃবীরম্
294.38
ততশ্ছিত্ত্বা কবচং দিব্যমঙ্গা;ত্তথৈবার্দ্রং প্রদদৌ বাসবায়
তথোত্কৃত্য প্রদদৌ কুণ্ডলে তে; বৈকর্তনঃ কর্মণা তেন কর্ণঃ
294.39
ততঃ শক্রঃ প্রহসন্বঞ্চয়িত্বা; কর্ণং লোকে যশসা যোজয়িত্বা
কৃতং কার্যং পাণ্ডবানাং হি মেনে; ততঃ পশ্চাদ্দিবমেবোত্পপাত
294.40
শ্রুত্বা কর্ণং মুষিতং ধার্তরাষ্ট্রা; দীনাঃ সর্বে ভগ্নদর্পা ইবাসন্
তাং চাবস্থাং গমিতং সূতপুত্রং; শ্রুত্বা পার্থা জহৃষুঃ কাননস্থাঃ
294.41
জনমেজয় উবাচ
ক্বস্থা বীরাঃ পাণ্ডবাস্তে বভূবুঃ; কুতশ্চৈতচ্ছ্রুতবন্তঃ প্রিয়ং তে
কিং বাকার্ষুর্দ্বাদশেঽব্দে ব্যতীতে; তন্মে সর্বং ভগবান্ব্যাকরোতু
294.42
বৈশংপায়ন উবাচ
লব্ধ্বা কৃষ্ণাং সৈন্ধবং দ্রাবয়িত্বা; বিপ্রৈঃ সার্ধং কাম্যকাদাশ্রমাত্তে
মার্কণ্ডেয়াচ্ছ্রুতবন্তঃ পুরাণং; দেবর্ষীণাং চরিতং বিস্তরেণ
294.43
প্রত্যাজগ্মুঃ সরথাঃ সানুয়াত্রাঃ; সর্বৈঃ সার্ধং সূদপৌরোগবৈশ্চ
ততঃ পুণ্যং দ্বৈতবনং নৃবীরা; নিস্তীর্যোগ্রং বনবাসং সমগ্রম্