অধ্যায় 293

293.1

বৈশংপায়ন উবাচ
এতস্মিন্নেব কালে তু ধৃতরাষ্ট্রস্য বৈ সখা
সূতোঽধিরথ ইত্যেব সদারো জাহ্নবীং যয়ৌ

তস্য ভার্যাভবদ্রাজন্রূপেণাসদৃশী ভুবি
রাধা নাম মহাভাগা ন সা পুত্রমবিন্দত
অপত্যার্থে পরং যত্নমকরোচ্চ বিশেষতঃ

সা দদর্শাথ মঞ্জূষামুহ্যমানাং যদৃচ্ছয়া
দত্তরক্ষাপ্রতিসরামন্বালভনশোভিতাম্
ঊর্মীতরঙ্গৈর্জাহ্নব্যাঃ সমানীতামুপহ্বরম্

সা তাং কৌতূহলাত্প্রাপ্তাং গ্রাহয়ামাস ভামিনী
ততো নিবেদয়ামাস সূতস্যাধিরথস্য বৈ

স তামুদ্ধৃত্য মঞ্জূষামুত্সার্য জলমন্তিকাৎ
যন্ত্রৈরুদ্ঘাটয়ামাস সোঽপশ্যত্তত্র বালকম্

তরুণাদিত্যসংকাশং হেমবর্মধরং তথা
মৃষ্টকুণ্ডলয়ুক্তেন বদনেন বিরাজতা

স সূতো ভার্যয়া সার্ধং বিস্ময়োত্ফুল্ললোচনঃ
অঙ্কমারোপ্য তং বালং ভার্যাং বচনমব্রবীৎ

ইদমত্যদ্ভুতং ভীরু যতো জাতোঽস্মি ভামিনি
দৃষ্টবান্দেবগর্ভোঽয়ং মন্যেঽস্মান্সমুপাগতঃ

অনপত্যস্য পুত্রোঽয়ং দেবৈর্দত্তো ধ্রুবং মম
ইত্যুক্ত্বা তং দদৌ পুত্রং রাধায়ৈ স মহীপতে

প্রতিজগ্রাহ তং রাধা বিধিবদ্দিব্যরূপিণম্
পুত্রং কমলগর্ভাভং দেবগর্ভং শ্রিয়া বৃতম্

পুপোষ চৈনং বিধিবদ্ববৃধে স চ বীর্যবান্
ততঃ প্রভৃতি চাপ্যন্যে প্রাভবন্নৌরসাঃ সুতাঃ

বসুবর্মধরং দৃষ্ট্বা তং বালং হেমকুণ্ডলম্
নামাস্য বসুষেণেতি ততশ্চক্রুর্দ্বিজাতয়ঃ

এবং স সূতপুত্রত্বং জগামামিতবিক্রমঃ
বসুষেণ ইতি খ্যাতো বৃষ ইত্যেব চ প্রভুঃ

স জ্যেষ্ঠপুত্রঃ সূতস্য ববৃধেঽঙ্গেষু বীর্যবান্
চারেণ বিদিতশ্চাসীত্পৃথায়া দিব্যবর্মভৃৎ

সূতস্ত্বধিরথঃ পুত্রং বিবৃদ্ধং সময়ে ততঃ
দৃষ্ট্বা প্রস্থাপয়ামাস পুরং বারণসাহ্বয়ম্

তত্রোপসদনং চক্রে দ্রোণস্যেষ্বস্ত্রকর্মণি
সখ্যং দুর্যোধনেনৈবমগচ্ছত্স চ বীর্যবান্

দ্রোণাত্কৃপাচ্চ রামাচ্চ সোঽস্ত্রগ্রামং চতুর্বিধম্
লব্ধ্বা লোকেঽভবত্খ্যাতঃ পরমেষ্বাসতাং গতঃ

সংধায় ধার্তরাষ্ট্রেণ পার্থানাং বিপ্রিয়ে স্থিতঃ
যোদ্ধুমাশংসতে নিত্যং ফল্গুনেন মহাত্মনা

সদা হি তস্য স্পর্ধাসীদর্জুনেন বিশাং পতে
অর্জুনস্য চ কর্ণেন যতো দৃষ্টো বভূব সঃ

তং তু কুণ্ডলিনং দৃষ্ট্বা বর্মণা চ সমন্বিতম্
অবধ্যং সমরে মত্বা পর্যতপ্যদ্যুধিষ্ঠিরঃ

যদা তু কর্ণো রাজেন্দ্র ভানুমন্তং দিবাকরম্
স্তৌতি মধ্যংদিনে প্রাপ্তে প্রাঞ্জলিঃ সলিলে স্থিতঃ

তত্রৈনমুপতিষ্ঠন্তি ব্রাহ্মণা ধনহেতবঃ
নাদেয়ং তস্য তত্কালে কিংচিদস্তি দ্বিজাতিষু

তমিন্দ্রো ব্রাহ্মণো ভূত্বা ভিক্ষাং দেহীত্যুপস্থিতঃ
স্বাগতং চেতি রাধেয়স্তমথ প্রত্যভাষত