অধ্যায় 292

292.1

বৈশংপায়ন উবাচ
ততো গর্ভঃ সমভবত্পৃথায়াঃ পৃথিবীপতে
শুক্লে দশোত্তরে পক্ষে তারাপতিরিবাম্বরে

292.2

সা বান্ধবভয়াদ্বালা তং গর্ভং বিনিগূহতী
ধারয়ামাস সুশ্রোণী ন চৈনাং বুবুধে জনঃ

292.3

ন হি তাং বেদ নার্যন্যা কাচিদ্ধাত্রেয়িকামৃতে
কন্যাপুরগতাং বালাং নিপুণাং পরিরক্ষণে

292.4

ততঃ কালেন সা গর্ভং সুষুবে বরবর্ণিনী
কন্যৈব তস্য দেবস্য প্রসাদাদমরপ্রভম্

292.5

তথৈব বদ্ধকবচং কনকোজ্জ্বলকুণ্ডলম্
হর্যক্ষং বৃষভস্কন্ধং যথাস্য পিতরং তথা

292.6

জাতমাত্রং চ তং গর্ভং ধাত্র্যা সংমন্ত্র্য ভামিনী
মঞ্জূষায়ামবদধে স্বাস্তীর্ণায়াং সমন্ততঃ

292.7

মধূচ্ছিষ্টস্থিতায়াং সা সুখায়াং রুদতী তথা
শ্লক্ষ্ণায়াং সুপিধানায়ামশ্বনদ্যামবাসৃজৎ

292.8

জানতী চাপ্যকর্তব্যং কন্যায়া গর্ভধারণম্
পুত্রস্নেহেন রাজেন্দ্র করুণং পর্যদেবয়ৎ

292.9

সমুত্সৃজন্তী মঞ্জূষামশ্বনদ্যাস্তদা জলে
উবাচ রুদতী কুন্তী যানি বাক্যানি তচ্ছৃণু

292.10

স্বস্তি তেঽস্ত্বান্তরিক্ষেভ্যঃ পার্থিবেভ্যশ্চ পুত্রক
দিব্যেভ্যশ্চৈব ভূতেভ্যস্তথা তোয়চরাশ্চ যে

292.11

শিবাস্তে সন্তু পন্থানো মা চ তে পরিপন্থিনঃ
আগমাশ্চ তথা পুত্র ভবন্ত্বদ্রোহচেতসঃ

292.12

পাতু ত্বাং বরুণো রাজা সলিলে সলিলেশ্বরঃ
অন্তরিক্ষেঽন্তরিক্ষস্থঃ পবনঃ সর্বগস্তথা

292.13

পিতা ত্বাং পাতু সর্বত্র তপনস্তপতাং বরঃ
যেন দত্তোঽসি মে পুত্র দিব্যেন বিধিনা কিল

292.14

আদিত্যা বসবো রুদ্রাঃ সাধ্যা বিশ্বে চ দেবতাঃ
মরুতশ্চ সহেন্দ্রেণ দিশশ্চ সদিগীশ্বরাঃ

292.15

রক্ষন্তু ত্বাং সুরাঃ সর্বে সমেষু বিষমেষু চ
বেত্স্যামি ত্বাং বিদেশেঽপি কবচেনোপসূচিতম্

292.16

ধন্যস্তে পুত্র জনকো দেবো ভানুর্বিভাবসুঃ
যস্ত্বাং দ্রক্ষ্যতি দিব্যেন চক্ষুষা বাহিনীগতম্

292.17

ধন্যা সা প্রমদা যা ত্বাং পুত্রত্বে কল্পয়িষ্যতি
যস্যাস্ত্বং তৃষিতঃ পুত্র স্তনং পাস্যসি দেবজ

292.18

কো নু স্বপ্নস্তয়া দৃষ্টো যা ত্বামাদিত্যবর্চসম্
দিব্যবর্মসমায়ুক্তং দিব্যকুণ্ডলভূষিতম্

292.19

পদ্মায়তবিশালাক্ষং পদ্মতাম্রতলোজ্জ্বলম্
সুললাটং সুকেশান্তং পুত্রত্বে কল্পয়িষ্যতি

292.20

ধন্যা দ্রক্ষ্যন্তি পুত্র ত্বাং ভূমৌ সংসর্পমাণকম্
অব্যক্তকলবাক্যানি বদন্তং রেণুগুণ্ঠিতম্

292.21

ধন্যা দ্রক্ষ্যন্তি পুত্র ত্বাং পুনর্যৌবনগে মুখে
হিমবদ্বনসংভূতং সিংহং কেসরিণং যথা

292.22

এবং বহুবিধং রাজন্বিলপ্য করুণং পৃথা
অবাসৃজত মঞ্জূষামশ্বনদ্যাস্তদা জলে

292.23

রুদতী পুত্রশোকার্তা নিশীথে কমলেক্ষণা
ধাত্র্যা সহ পৃথা রাজন্পুত্রদর্শনলালসা

292.24

বিসর্জয়িত্বা মঞ্জূষাং সংবোধনভয়াত্পিতুঃ
বিবেশ রাজভবনং পুনঃ শোকাতুরা ততঃ

292.25

মঞ্জূষা ত্বশ্বনদ্যাঃ সা যয়ৌ চর্মণ্বতীং নদীম্
চর্মণ্বত্যাশ্চ যমুনাং ততো গঙ্গাং জগাম হ

292.26

গঙ্গায়াঃ সূতবিষয়ং চম্পামভ্যায়য়ৌ পুরীম্
স মঞ্জূষাগতো গর্ভস্তরঙ্গৈরুহ্যমানকঃ

292.27

অমৃতাদুত্থিতং দিব্যং তত্তু বর্ম সকুণ্ডলম্
ধারয়ামাস তং গর্ভং দৈবং চ বিধিনির্মিতম্

Contains text from DharmicData, made available under the Open Database License (ODbL). Simple meanings are written by AI and can contain mistakes.