Utshovঅধ্যায় 291
291.1
বৈশংপায়ন উবাচ
সা তু কন্যা বহুবিধং ব্রুবন্তী মধুরং বচঃ
অনুনেতুং সহস্রাংশুং ন শশাক মনস্বিনী
291.2
ন শশাক যদা বালা প্রত্যাখ্যাতুং তমোনুদম্
ভীতা শাপাত্ততো রাজন্দধ্যৌ দীর্ঘমথান্তরম্
291.3
অনাগসঃ পিতুঃ শাপো ব্রাহ্মণস্য তথৈব চ
মন্নিমিত্তঃ কথং ন স্যাত্ক্রুদ্ধাদস্মাদ্বিভাবসোঃ
291.4
বালেনাপি সতা মোহাদ্ভৃশং সাপহ্নবান্যপি
নাত্যাসাদয়িতব্যানি তেজাংসি চ তপাংসি চ
291.5
সাহমদ্য ভৃশং ভীতা গৃহীতা চ করে ভৃশম্
কথং ত্বকার্যং কুর্যাং বৈ প্রদানং হ্যাত্মনঃ স্বয়ম্
291.6
সৈবং শাপপরিত্রস্তা বহু চিন্তয়তী তদা
মোহেনাভিপরীতাঙ্গী স্ময়মানা পুনঃ পুনঃ
291.7
তং দেবমব্রবীদ্ভীতা বন্ধূনাং রাজসত্তম
ব্রীডাবিহ্বলয়া বাচা শাপত্রস্তা বিশাং পতে
291.8
কুন্ত্যুবাচ
পিতা মে ধ্রিয়তে দেব মাতা চান্যে চ বান্ধবাঃ
ন তেষু ধ্রিয়মাণেষু বিধিলোপো ভবেদয়ম্
291.9
ত্বয়া মে সংগমো দেব যদি স্যাদ্বিধিবর্জিতঃ
মন্নিমিত্তং কুলস্যাস্য লোকে কীর্তির্নশেত্ততঃ
291.10
অথ বা ধর্মমেতং ত্বং মন্যসে তপতাং বর
ঋতে প্রদানাদ্বন্ধুভ্যস্তব কামং করোম্যহম্
291.11
আত্মপ্রদানং দুর্ধর্ষ তব কৃত্বা সতী ত্বহম্
ত্বয়ি ধর্মো যশশ্চৈব কীর্তিরায়ুশ্চ দেহিনাম্
291.12
সূর্য উবাচ
ন তে পিতা ন তে মাতা গুরবো বা শুচিস্মিতে
প্রভবন্তি বরারোহে ভদ্রং তে শৃণু মে বচঃ
291.13
সর্বান্কাময়তে যস্মাত্কনের্ধাতোশ্চ ভামিনি
তস্মাত্কন্যেহ সুশ্রোণি স্বতন্ত্রা বরবর্ণিনি
291.14
নাধর্মশ্চরিতঃ কশ্চিত্ত্বয়া ভবতি ভামিনি
অধর্মং কুত এবাহং চরেয়ং লোককাম্যয়া
291.15
অনাবৃতাঃ স্ত্রিয়ঃ সর্বা নরাশ্চ বরবর্ণিনি
স্বভাব এষ লোকানাং বিকারোঽন্য ইতি স্মৃতঃ
291.16
সা ময়া সহ সংগম্য পুনঃ কন্যা ভবিষ্যসি
পুত্রশ্চ তে মহাবাহুর্ভবিষ্যতি মহায়শাঃ
291.17
কুন্ত্যুবাচ
যদি পুত্রো মম ভবেত্ত্বত্তঃ সর্বতমোপহ
কুণ্ডলী কবচী শূরো মহাবাহুর্মহাবলঃ
291.18
সূর্য উবাচ
ভবিষ্যতি মহাবাহুঃ কুণ্ডলী দিব্যবর্মভৃৎ
উভয়ং চামৃতময়ং তস্য ভদ্রে ভবিষ্যতি
291.19
কুন্ত্যুবাচ
যদ্যেতদমৃতাদস্তি কুণ্ডলে বর্ম চোত্তমম্
মম পুত্রস্য যং বৈ ত্বং মত্ত উত্পাদয়িষ্যসি
291.20
অস্তু মে সংগমো দেব যথোক্তং ভগবংস্ত্বয়া
ত্বদ্বীর্যরূপসত্ত্বৌজা ধর্ময়ুক্তো ভবেত্স চ
291.21
সূর্য উবাচ
অদিত্যা কুণ্ডলে রাজ্ঞি দত্তে মে মত্তকাশিনি
তেঽস্য দাস্যামি বৈ ভীরু বর্ম চৈবেদমুত্তমম্
291.22
পৃথোবাচ
পরমং ভগবন্দেব সংগমিষ্যে ত্বয়া সহ
যদি পুত্রো ভবেদেবং যথা বদসি গোপতে
291.23
বৈশংপায়ন উবাচ
তথেত্যুক্ত্বা তু তাং কুন্তীমাবিবেশ বিহংগমঃ
স্বর্ভানুশত্রুর্যোগাত্মা নাভ্যাং পস্পর্শ চৈব তাম্
291.24
ততঃ সা বিহ্বলেবাসীত্কন্যা সূর্যস্য তেজসা
পপাতাথ চ সা দেবী শয়নে মূঢচেতনা
291.25
সূর্য উবাচ
সাধয়িষ্যামি সুশ্রোণি পুত্রং বৈ জনয়িষ্যসি
সর্বশস্ত্রভৃতাং শ্রেষ্ঠং কন্যা চৈব ভবিষ্যসি
291.26
বৈশংপায়ন উবাচ
ততঃ সা ব্রীডিতা বালা তদা সূর্যমথাব্রবীৎ
এবমস্ত্বিতি রাজেন্দ্র প্রস্থিতং ভূরিবর্চসম্
291.27
ইতি স্মোক্তা কুন্তিরাজাত্মজা সা; বিবস্বন্তং যাচমানা সলজ্জা
তস্মিন্পুণ্যে শয়নীয়ে পপাত; মোহাবিষ্টা ভজ্যমানা লতেব
291.28
তাং তিগ্মাংশুস্তেজসা মোহয়িত্বা; যোগেনাবিশ্যাত্মসংস্থাং চকার
ন চৈবৈনাং দূষয়ামাস ভানুঃ; সংজ্ঞাং লেভে ভূয় এবাথ বালা