Utshovঅধ্যায় 290
290.1
বৈশংপায়ন উবাচ
গতে তস্মিন্দ্বিজশ্রেষ্ঠে কস্মিংশ্চিত্কালপর্যয়ে
চিন্তয়ামাস সা কন্যা মন্ত্রগ্রামবলাবলম্
290.2
অয়ং বৈ কীদৃশস্তেন মম দত্তো মহাত্মনা
মন্ত্রগ্রামো বলং তস্য জ্ঞাস্যে নাতিচিরাদিব
290.3
এবং সংচিন্তয়ন্তী সা দদর্শর্তুং যদৃচ্ছয়া
ব্রীডিতা সাভবদ্বালা কন্যাভাবে রজস্বলা
290.4
অথোদ্যন্তং সহস্রাংশুং পৃথা দীপ্তং দদর্শ হ
ন ততর্প চ রূপেণ ভানোঃ সংধ্যাগতস্য সা
290.5
তস্যা দৃষ্টিরভূদ্দিব্যা সাপশ্যদ্দিব্যদর্শনম্
আমুক্তকবচং দেবং কুণ্ডলাভ্যাং বিভূষিতম্
290.6
তস্যাঃ কৌতূহলং ত্বাসীন্মন্ত্রং প্রতি নরাধিপ
আহ্বানমকরোত্সাথ তস্য দেবস্য ভামিনী
290.7
প্রাণানুপস্পৃশ্য তদা আজুহাব দিবাকরম্
আজগাম ততো রাজংস্ত্বরমাণো দিবাকরঃ
290.8
মধুপিঙ্গো মহাবাহুঃ কম্বুগ্রীবো হসন্নিব
অঙ্গদী বদ্ধমুকুটো দিশঃ প্রজ্বালয়ন্নিব
290.9
যোগাত্কৃত্বা দ্বিধাত্মানমাজগাম ততাপ চ
আবভাষে ততঃ কুন্তীং সাম্না পরমবল্গুনা
290.10
আগতোঽস্মি বশং ভদ্রে তব মন্ত্রবলাত্কৃতঃ
কিং করোম্যবশো রাজ্ঞি ব্রূহি কর্তা তদস্মি তে
290.11
কুন্ত্যুবাচ
গম্যতাং ভগবংস্তত্র যতোঽসি সমুপাগতঃ
কৌতূহলাত্সমাহূতঃ প্রসীদ ভগবন্নিতি
290.12
সূর্য উবাচ
গমিষ্যেঽহং যথা মাং ত্বং ব্রবীষি তনুমধ্যমে
ন তু দেবং সমাহূয় ন্যায্যং প্রেষয়িতুং বৃথা
290.13
তবাভিসংধিঃ সুভগে সূর্যাত্পুত্রো ভবেদিতি
বীর্যেণাপ্রতিমো লোকে কবচী কুণ্ডলীতি চ
290.14
সা ত্বমাত্মপ্রদানং বৈ কুরুষ্ব গজগামিনি
উত্পত্স্যতি হি পুত্রস্তে যথাসংকল্পমঙ্গনে
290.15
অথ গচ্ছাম্যহং ভদ্রে ত্বয়াসংগম্য সুস্মিতে
শপ্স্যামি ত্বামহং ক্রুদ্ধো ব্রাহ্মণং পিতরং চ তে
290.16
ত্বত্কৃতে তান্প্রধক্ষ্যামি সর্বানপি ন সংশয়ঃ
পিতরং চৈব তে মূঢং যো ন বেত্তি তবানয়ম্
290.17
তস্য চ ব্রাহ্মণস্যাদ্য যোঽসৌ মন্ত্রমদাত্তব
শীলবৃত্তমবিজ্ঞায় ধাস্যামি বিনয়ং পরম্
290.18
এতে হি বিবুধাঃ সর্বে পুরংদরমুখা দিবি
ত্বয়া প্রলব্ধং পশ্যন্তি স্ময়ন্ত ইব ভামিনি
290.19
পশ্য চৈনান্সুরগণান্দিব্যং চক্ষুরিদং হি তে
পূর্বমেব ময়া দত্তং দৃষ্টবত্যসি যেন মাম্
290.20
বৈশংপায়ন উবাচ
ততোঽপশ্যত্ত্রিদশান্রাজপুত্রী; সর্বানেব স্বেষু ধিষ্ণ্যেষু খস্থান্
প্রভাসন্তং ভানুমন্তং মহান্তং; যথাদিত্যং রোচমানং তথৈব
290.21
সা তান্দৃষ্ট্বা ব্রীডমানেব বালা; সূর্যং দেবী বচনং প্রাহ ভীতা
গচ্ছ ত্বং বৈ গোপতে স্বং বিমানং; কন্যাভাবাদ্দুঃখ এষোপচারঃ
290.22
পিতা মাতা গুরবশ্চৈব যেঽন্যে; দেহস্যাস্য প্রভবন্তি প্রদানে
নাহং ধর্মং লোপয়িষ্যামি লোকে; স্ত্রীণাং বৃত্তং পূজ্যতে দেহরক্ষা
290.23
ময়া মন্ত্রবলং জ্ঞাতুমাহূতস্ত্বং বিভাবসো
বাল্যাদ্বালেতি কৃত্বা তত্ক্ষন্তুমর্হসি মে বিভো
290.24
সূর্য উবাচ
বালেতি কৃত্বানুনয়ং তবাহং; দদানি নান্যানুনয়ং লভেত
আত্মপ্রদানং কুরু কুন্তিকন্যে; শান্তিস্তবৈবং হি ভবেচ্চ ভীরু
290.25
ন চাপি যুক্তং গন্তুং হি ময়া মিথ্যাকৃতেন বৈ
গমিষ্যাম্যনবদ্যাঙ্গি লোকে সমবহাস্যতাম্
সর্বেষাং বিবুধানাং চ বক্তব্যঃ স্যামহং শুভে
290.26
সা ত্বং ময়া সমাগচ্ছ পুত্রং লপ্স্যসি মাদৃশম্
বিশিষ্টা সর্বলোকেষু ভবিষ্যসি চ ভামিনি