অধ্যায় 289

289.1

বৈশংপায়ন উবাচ
সা তু কন্যা মহারাজ ব্রাহ্মণং সংশিতব্রতম্
তোষয়ামাস শুদ্ধেন মনসা সংশিতব্রতা

প্রাতরায়াস্য ইত্যুক্ত্বা কদাচিদ্দ্বিজসত্তমঃ
তত আয়াতি রাজেন্দ্র সায়ে রাত্রাবথো পুনঃ

তং চ সর্বাসু বেলাসু ভক্ষ্যভোজ্যপ্রতিশ্রয়ৈঃ
পূজয়ামাস সা কন্যা বর্ধমানৈস্তু সর্বদা

অন্নাদিসমুদাচারঃ শয্যাসনকৃতস্তথা
দিবসে দিবসে তস্য বর্ধতে ন তু হীয়তে

নির্ভর্ত্সনাপবাদৈশ্চ তথৈবাপ্রিয়য়া গিরা
ব্রাহ্মণস্য পৃথা রাজন্ন চকারাপ্রিয়ং তদা

ব্যস্তে কালে পুনশ্চৈতি ন চৈতি বহুশো দ্বিজঃ
দুর্লভ্যমপি চৈবান্নং দীয়তামিতি সোঽব্রবীৎ

কৃতমেব চ তত্সর্বং পৃথা তস্মৈ ন্যবেদয়ৎ
শিষ্যবত্পুত্রবচ্চৈব স্বসৃবচ্চ সুসংয়তা

যথোপজোষং রাজেন্দ্র দ্বিজাতিপ্রবরস্য সা
প্রীতিমুত্পাদয়ামাস কন্যা যত্নৈরনিন্দিতা

তস্যাস্তু শীলবৃত্তেন তুতোষ দ্বিজসত্তমঃ
অবধানেন ভূয়োঽস্য পরং যত্নমথাকরোৎ

তাং প্রভাতে চ সায়ে চ পিতা পপ্রচ্ছ ভারত
অপি তুষ্যতি তে পুত্রি ব্রাহ্মণঃ পরিচর্যয়া

তং সা পরমমিত্যেব প্রত্যুবাচ যশস্বিনী
ততঃ প্রীতিমবাপাগ্র্যাং কুন্তিভোজো মহামনাঃ

ততঃ সংবত্সরে পূর্ণে যদাসৌ জপতাং বরঃ
নাপশ্যদ্দুষ্কৃতং কিংচিত্পৃথায়াঃ সৌহৃদে রতঃ

ততঃ প্রীতমনা ভূত্বা স এনাং ব্রাহ্মণোঽব্রবীৎ
প্রীতোঽস্মি পরমং ভদ্রে পরিচারেণ তে শুভে

বরান্বৃণীষ্ব কল্যাণি দুরাপান্মানুষৈরিহ
যৈস্ত্বং সীমন্তিনীঃ সর্বা যশসাভিভবিষ্যসি

কুন্ত্যুবাচ
কৃতানি মম সর্বাণি যস্যা মে বেদবিত্তম
ত্বং প্রসন্নঃ পিতা চৈব কৃতং বিপ্র বরৈর্মম

ব্রাহ্মণ উবাচ
যদি নেচ্ছসি ভদ্রে ত্বং বরং মত্তঃ শুচিস্মিতে
ইমং মন্ত্রং গৃহাণ ত্বমাহ্বানায় দিবৌকসাম্

যং যং দেবং ত্বমেতেন মন্ত্রেণাবাহয়িষ্যসি
তেন তেন বশে ভদ্রে স্থাতব্যং তে ভবিষ্যতি

অকামো বা সকামো বা ন স নৈষ্যতি তে বশম্
বিবুধো মন্ত্রসংশান্তো বাক্যে ভৃত্য ইবানতঃ

বৈশংপায়ন উবাচ
ন শশাক দ্বিতীয়ং সা প্রত্যাখ্যাতুমনিন্দিতা
তং বৈ দ্বিজাতিপ্রবরং তদা শাপভয়ান্নৃপ

ততস্তামনবদ্যাঙ্গীং গ্রাহয়ামাস বৈ দ্বিজঃ
মন্ত্রগ্রামং তদা রাজন্নথর্বশিরসি শ্রুতম্

তং প্রদায় তু রাজেন্দ্র কুন্তিভোজমুবাচ হ
উষিতোঽস্মি সুখং রাজন্কন্যয়া পরিতোষিতঃ

তব গেহে সুবিহিতঃ সদা সুপ্রতিপূজিতঃ
সাধয়িষ্যামহে তাবদিত্যুক্ত্বান্তরধীয়ত

স তু রাজা দ্বিজং দৃষ্ট্বা তত্রৈবান্তর্হিতং তদা
বভূব বিস্ময়াবিষ্টঃ পৃথাং চ সমপূজয়ৎ