UtshovChapter 289
289.1
वैशंपायन उवाच
सा तु कन्या महाराज ब्राह्मणं संशितव्रतम्
तोषयामास शुद्धेन मनसा संशितव्रता
Vaishampayana uvacha
Sa tu kanya maharaja brahmanam sanshitavratam
Toshayamasa shuddhena manasa sanshitavrata
289.2
प्रातरायास्य इत्युक्त्वा कदाचिद्द्विजसत्तमः
तत आयाति राजेन्द्र साये रात्रावथो पुनः
Pratarayasya ityuktva kadachiddvijasattamah
Tata ayati rajendra saye ratravatho punah
289.3
तं च सर्वासु वेलासु भक्ष्यभोज्यप्रतिश्रयैः
पूजयामास सा कन्या वर्धमानैस्तु सर्वदा
Tam cha sarvasu velasu bhakshyabhojyapratishrayaih
Pujayamasa sa kanya vardhamanaistu sarvada
289.4
अन्नादिसमुदाचारः शय्यासनकृतस्तथा
दिवसे दिवसे तस्य वर्धते न तु हीयते
Annadisamudacharah shayyasanakritastatha
Divase divase tasya vardhate na tu hiyate
289.5
निर्भर्त्सनापवादैश्च तथैवाप्रियया गिरा
ब्राह्मणस्य पृथा राजन्न चकाराप्रियं तदा
Nirbhartsanapavadaishcha tathaivapriyaya gira
Brahmanasya pritha rajanna chakarapriyam tada
289.6
व्यस्ते काले पुनश्चैति न चैति बहुशो द्विजः
दुर्लभ्यमपि चैवान्नं दीयतामिति सोऽब्रवीत्
Vyaste kale punashchaiti na chaiti bahusho dvijah
Durlabhyamapi chaivannam diyatamiti sobravit
289.7
कृतमेव च तत्सर्वं पृथा तस्मै न्यवेदयत्
शिष्यवत्पुत्रवच्चैव स्वसृवच्च सुसंयता
Kritameva cha tatsarvam pritha tasmai nyavedayat
Shishyavatputravachchaiva svasrivachcha susanyata
289.8
यथोपजोषं राजेन्द्र द्विजातिप्रवरस्य सा
प्रीतिमुत्पादयामास कन्या यत्नैरनिन्दिता
Yathopajosham rajendra dvijatipravarasya sa
Pritimutpadayamasa kanya yatnairanindita
289.9
तस्यास्तु शीलवृत्तेन तुतोष द्विजसत्तमः
अवधानेन भूयोऽस्य परं यत्नमथाकरोत्
Tasyastu shilavrittena tutosha dvijasattamah
Avadhanena bhuyosya param yatnamathakarot
289.10
तां प्रभाते च साये च पिता पप्रच्छ भारत
अपि तुष्यति ते पुत्रि ब्राह्मणः परिचर्यया
Tam prabhate cha saye cha pita paprachchha bharata
Api tushyati te putri brahmanah paricharyaya
289.11
तं सा परममित्येव प्रत्युवाच यशस्विनी
ततः प्रीतिमवापाग्र्यां कुन्तिभोजो महामनाः
Tam sa paramamityeva pratyuvacha yashasvini
Tatah pritimavapagryam kuntibhojo mahamanah
289.12
ततः संवत्सरे पूर्णे यदासौ जपतां वरः
नापश्यद्दुष्कृतं किंचित्पृथायाः सौहृदे रतः
Tatah sanvatsare purne yadasau japatam varah
Napashyaddushkritam kinchitprithayah sauhride ratah
289.13
ततः प्रीतमना भूत्वा स एनां ब्राह्मणोऽब्रवीत्
प्रीतोऽस्मि परमं भद्रे परिचारेण ते शुभे
Tatah pritamana bhutva sa enam brahmanobravit
Pritosmi paramam bhadre paricharena te shubhe
289.14
वरान्वृणीष्व कल्याणि दुरापान्मानुषैरिह
यैस्त्वं सीमन्तिनीः सर्वा यशसाभिभविष्यसि
Varanvrinishva kalyani durapanmanushairiha
Yaistvam simantinih sarva yashasabhibhavishyasi
289.15
कुन्त्युवाच
कृतानि मम सर्वाणि यस्या मे वेदवित्तम
त्वं प्रसन्नः पिता चैव कृतं विप्र वरैर्मम
Kuntyuvacha
Kritani mama sarvani yasya me vedavittama
Tvam prasannah pita chaiva kritam vipra varairmama
289.16
ब्राह्मण उवाच
यदि नेच्छसि भद्रे त्वं वरं मत्तः शुचिस्मिते
इमं मन्त्रं गृहाण त्वमाह्वानाय दिवौकसाम्
Brahmana uvacha
Yadi nechchhasi bhadre tvam varam mattah shuchismite
Imam mantram grihana tvamahvanaya divaukasam
289.17
यं यं देवं त्वमेतेन मन्त्रेणावाहयिष्यसि
तेन तेन वशे भद्रे स्थातव्यं ते भविष्यति
Yam yam devam tvametena mantrenavahayishyasi
Tena tena vashe bhadre sthatavyam te bhavishyati
289.18
अकामो वा सकामो वा न स नैष्यति ते वशम्
विबुधो मन्त्रसंशान्तो वाक्ये भृत्य इवानतः
Akamo va sakamo va na sa naishyati te vasham
Vibudho mantrasanshanto vakye bhritya ivanatah
289.19
वैशंपायन उवाच
न शशाक द्वितीयं सा प्रत्याख्यातुमनिन्दिता
तं वै द्विजातिप्रवरं तदा शापभयान्नृप
Vaishampayana uvacha
Na shashaka dvitiyam sa pratyakhyatumanindita
Tam vai dvijatipravaram tada shapabhayannripa
289.20
ततस्तामनवद्याङ्गीं ग्राहयामास वै द्विजः
मन्त्रग्रामं तदा राजन्नथर्वशिरसि श्रुतम्
Tatastamanavadyangim grahayamasa vai dvijah
Mantragramam tada rajannatharvashirasi shrutam
289.21
तं प्रदाय तु राजेन्द्र कुन्तिभोजमुवाच ह
उषितोऽस्मि सुखं राजन्कन्यया परितोषितः
Tam pradaya tu rajendra kuntibhojamuvacha ha
Ushitosmi sukham rajankanyaya paritoshitah
289.22
तव गेहे सुविहितः सदा सुप्रतिपूजितः
साधयिष्यामहे तावदित्युक्त्वान्तरधीयत
Tava gehe suvihitah sada supratipujitah
Sadhayishyamahe tavadityuktvantaradhiyata
289.23
स तु राजा द्विजं दृष्ट्वा तत्रैवान्तर्हितं तदा
बभूव विस्मयाविष्टः पृथां च समपूजयत्
Sa tu raja dvijam drishtva tatraivantarhitam tada
Babhuva vismayavishtah pritham cha samapujayat