অধ্যায় 288

288.1

কুন্ত্যুবাচ
ব্রাহ্মণং যন্ত্রিতা রাজনুপস্থাস্যামি পূজয়া
যথাপ্রতিজ্ঞং রাজেন্দ্র ন চ মিথ্যা ব্রবীম্যহম্

এষ চৈব স্বভাবো মে পূজয়েয়ং দ্বিজানিতি
তব চৈব প্রিয়ং কার্যং শ্রেয়শ্চৈতত্পরং মম

যদ্যেবৈষ্যতি সায়াহ্নে যদি প্রাতরথো নিশি
যদ্যর্ধরাত্রে ভগবান্ন মে কোপং করিষ্যতি

লাভো মমৈষ রাজেন্দ্র যদ্বৈ পূজয়তী দ্বিজান্
আদেশে তব তিষ্ঠন্তী হিতং কুর্যাং নরোত্তম

বিস্রব্ধো ভব রাজেন্দ্র ন ব্যলীকং দ্বিজোত্তমঃ
বসন্প্রাপ্স্যতি তে গেহে সত্যমেতদ্ব্রবীমি তে

যত্প্রিয়ং চ দ্বিজস্যাস্য হিতং চৈব তবানঘ
যতিষ্যামি তথা রাজন্ব্যেতু তে মানসো জ্বরঃ

ব্রাহ্মণা হি মহাভাগাঃ পূজিতাঃ পৃথিবীপতে
তারণায় সমর্থাঃ স্যুর্বিপরীতে বধায় চ

সাহমেতদ্বিজানন্তী তোষয়িষ্যে দ্বিজোত্তমম্
ন মত্কৃতে ব্যথাং রাজন্প্রাপ্স্যসি দ্বিজসত্তমাৎ

অপরাধে হি রাজেন্দ্র রাজ্ঞামশ্রেয়সে দ্বিজাঃ
ভবন্তি চ্যবনো যদ্বত্সুকন্যায়াঃ কৃতে পুরা

নিয়মেন পরেণাহমুপস্থাস্যে দ্বিজোত্তমম্
যথা ত্বয়া নরেন্দ্রেদং ভাষিতং ব্রাহ্মণং প্রতি

রাজোবাচ
এবমেতত্ত্বয়া ভদ্রে কর্তব্যমবিশঙ্কয়া
মদ্ধিতার্থং কুলার্থং চ তথাত্মার্থং চ নন্দিনি

বৈশংপায়ন উবাচ
এবমুক্ত্বা তু তাং কন্যাং কুন্তিভোজো মহায়শাঃ
পৃথাং পরিদদৌ তস্মৈ দ্বিজায় সুতবত্সলঃ

ইয়ং ব্রহ্মন্মম সুতা বালা সুখবিবর্ধিতা
অপরাধ্যেত যত্কিংচিন্ন তত্কার্যং হৃদি ত্বয়া

দ্বিজাতয়ো মহাভাগা বৃদ্ধবালতপস্বিষু
ভবন্ত্যক্রোধনাঃ প্রায়ো বিরুদ্ধেষ্বপি নিত্যদা

সুমহত্যপরাধেঽপি ক্ষান্তিঃ কার্যা দ্বিজাতিভিঃ
যথাশক্তি যথোত্সাহং পূজা গ্রাহ্যা দ্বিজোত্তম

তথেতি ব্রাহ্মণেনোক্তে স রাজা প্রীতমানসঃ
হংসচন্দ্রাংশুসংকাশং গৃহমস্য ন্যবেদয়ৎ

তত্রাগ্নিশরণে কৢপ্তমাসনং তস্য ভানুমৎ
আহারাদি চ সর্বং তত্তথৈব প্রত্যবেদয়ৎ

নিক্ষিপ্য রাজপুত্রী তু তন্দ্রীং মানং তথৈব চ
আতস্থে পরমং যত্নং ব্রাহ্মণস্যাভিরাধনে

তত্র সা ব্রাহ্মণং গত্বা পৃথা শৌচপরা সতী
বিধিবত্পরিচারার্হং দেববত্পর্যতোষয়ৎ