Utshovঅধ্যায় 287
287.1
জনমেজয় উবাচ
কিং তদ্গুহ্যং ন চাখ্যাতং কর্ণায়েহোষ্ণরশ্মিনা
কীদৃশে কুণ্ডলে তে চ কবচং চৈব কীদৃশম্
287.2
কুতশ্চ কবচং তস্য কুণ্ডলে চৈব সত্তম
এতদিচ্ছাম্যহং শ্রোতুং তন্মে ব্রূহি তপোধন
287.3
বৈশংপায়ন উবাচ
অয়ং রাজন্ব্রবীম্যেতদ্যত্তদ্গুহ্যং বিভাবসোঃ
যাদৃশে কুণ্ডলে চৈব কবচং চৈব যাদৃশম্
287.4
কুন্তিভোজং পুরা রাজন্ব্রাহ্মণঃ সমুপস্থিতঃ
তিগ্মতেজা মহাপ্রাংশুঃ শ্মশ্রুদণ্ডজটাধরঃ
287.5
দর্শনীয়োঽনবদ্যাঙ্গস্তেজসা প্রজ্বলন্নিব
মধুপিঙ্গো মধুরবাক্তপঃস্বাধ্যায়ভূষণঃ
287.6
স রাজানং কুন্তিভোজমব্রবীত্সুমহাতপাঃ
ভিক্ষামিচ্ছাম্যহং ভোক্তুং তব গেহে বিমত্সর
287.7
ন মে ব্যলীকং কর্তব্যং ত্বয়া বা তব চানুগৈঃ
এবং বত্স্যামি তে গেহে যদি তে রোচতেঽনঘ
287.8
যথাকামং চ গচ্ছেয়মাগচ্ছেয়ং তথৈব চ
শয্যাসনে চ মে রাজন্নাপরাধ্যেত কশ্চন
287.9
তমব্রবীত্কুন্তিভোজঃ প্রীতিয়ুক্তমিদং বচঃ
এবমস্তু পরং চেতি পুনশ্চৈনমথাব্রবীৎ
287.10
মম কন্যা মহাব্রহ্মন্পৃথা নাম যশস্বিনী
শীলবৃত্তান্বিতা সাধ্বী নিয়তা ন চ মানিনী
287.11
উপস্থাস্যতি সা ত্বাং বৈ পূজয়ানবমন্য চ
তস্যাশ্চ শীলবৃত্তেন তুষ্টিং সমুপয়াস্যসি
287.12
এবমুক্ত্বা তু তং বিপ্রমভিপূজ্য যথাবিধি
উবাচ কন্যামভ্যেত্য পৃথাং পৃথুললোচনাম্
287.13
অয়ং বত্সে মহাভাগো ব্রাহ্মণো বস্তুমিচ্ছতি
মম গেহে ময়া চাস্য তথেত্যেবং প্রতিশ্রুতম্
287.14
ত্বয়ি বত্সে পরাশ্বস্য ব্রাহ্মণস্যাভিরাধনম্
তন্মে বাক্যং ন মিথ্যা ত্বং কর্তুমর্হসি কর্হিচিৎ
287.15
অয়ং তপস্বী ভগবান্স্বাধ্যায়নিয়তো দ্বিজঃ
যদ্যদ্ব্রূয়ান্মহাতেজাস্তত্তদ্দেয়মমত্সরাৎ
287.16
ব্রাহ্মণা হি পরং তেজো ব্রাহ্মণা হি পরং তপঃ
ব্রাহ্মণানাং নমস্কারৈঃ সূর্যো দিবি বিরাজতে
287.17
অমানয়ন্হি মানার্হান্বাতাপিশ্চ মহাসুরঃ
নিহতো ব্রহ্মদণ্ডেন তালজঙ্ঘস্তথৈব চ
287.18
সোঽয়ং বত্সে মহাভার আহিতস্ত্বয়ি সাংপ্রতম্
ত্বং সদা নিয়তা কুর্যা ব্রাহ্মণস্যাভিরাধনম্
287.19
জানামি প্রণিধানং তে বাল্যাত্প্রভৃতি নন্দিনি
ব্রাহ্মণেষ্বিহ সর্বেষু গুরুবন্ধুষু চৈব হ
287.20
তথা প্রেষ্যেষু সর্বেষু মিত্রসংবন্ধিমাতৃষু
ময়ি চৈব যথাবত্ত্বং সর্বমাদৃত্য বর্তসে
287.21
ন হ্যতুষ্টো জনোঽস্তীহ পুরে চান্তঃপুরে চ তে
সম্যগ্বৃত্ত্যানবদ্যাঙ্গি তব ভৃত্যজনেষ্বপি
287.22
সংদেষ্টব্যাং তু মন্যে ত্বাং দ্বিজাতিং কোপনং প্রতি
পৃথে বালেতি কৃত্বা বৈ সুতা চাসি মমেতি চ
287.23
বৃষ্ণীনাং ত্বং কুলে জাতা শূরস্য দয়িতা সুতা
দত্তা প্রীতিমতা মহ্যং পিত্রা বালা পুরা স্বয়ম্
287.24
বসুদেবস্য ভগিনী সুতানাং প্রবরা মম
অগ্র্যমগ্রে প্রতিজ্ঞায় তেনাসি দুহিতা মম
287.25
তাদৃশে হি কুলে জাতা কুলে চৈব বিবর্ধিতা
সুখাত্সুখমনুপ্রাপ্তা হ্রদাদ্ধ্রদমিবাগতা
287.26
দৌষ্কুলেয়া বিশেষেণ কথংচিত্প্রগ্রহং গতাঃ
বালভাবাদ্বিকুর্বন্তি প্রায়শঃ প্রমদাঃ শুভে
287.27
পৃথে রাজকুলে জন্ম রূপং চাদ্ভুতদর্শনম্
তেন তেনাসি সংপন্না সমুপেতা চ ভামিনী
287.28
সা ত্বং দর্পং পরিত্যজ্য দম্ভং মানং চ ভামিনি
আরাধ্য বরদং বিপ্রং শ্রেয়সা যোক্ষ্যসে পৃথে
287.29
এবং প্রাপ্স্যসি কল্যাণি কল্যাণমনঘে ধ্রুবম্
কোপিতে তু দ্বিজশ্রেষ্ঠে কৃত্স্নং দহ্যেত মে কুলম্