অধ্যায় 286

286.1

কর্ণ উবাচ
ভগবন্তমহং ভক্তো যথা মাং বেত্থ গোপতে
তথা পরমতিগ্মাংশো নান্যং দেবং কথংচন

ন মে দারা ন মে পুত্রা ন চাত্মা সুহৃদো ন চ
তথেষ্টা বৈ সদা ভক্ত্যা যথা ত্বং গোপতে মম

ইষ্টানাং চ মহাত্মানো ভক্তানাং চ ন সংশয়ঃ
কুর্বন্তি ভক্তিমিষ্টাং চ জানীষে ত্বং চ ভাস্কর

ইষ্টো ভক্তশ্চ মে কর্ণো ন চান্যদ্দৈবতং দিবি
জানীত ইতি বৈ কৃত্বা ভগবানাহ মদ্ধিতম্

ভূয়শ্চ শিরসা যাচে প্রসাদ্য চ পুনঃ পুনঃ
ইতি ব্রবীমি তিগ্মাংশো ত্বং তু মে ক্ষন্তুমর্হসি

বিভেমি ন তথা মৃত্যোর্যথা বিভ্যেঽনৃতাদহম্
বিশেষেণ দ্বিজাতীনাং সর্বেষাং সর্বদা সতাম্
প্রদানে জীবিতস্যাপি ন মেঽত্রাস্তি বিচারণা

যচ্চ মামাত্থ দেব ত্বং পাণ্ডবং ফল্গুনং প্রতি
ব্যেতু সংতাপজং দুঃখং তব ভাস্কর মানসম্
অর্জুনং প্রতি মাং চৈব বিজেষ্যামি রণেঽর্জুনম্

তবাপি বিদিতং দেব মমাপ্যস্ত্রবলং মহৎ
জামদগ্ন্যাদুপাত্তং যত্তথা দ্রোণান্মহাত্মনঃ

ইদং ত্বমনুজানীহি সুরশ্রেষ্ঠ ব্রতং মম
ভিক্ষতে বজ্রিণে দদ্যামপি জীবিতমাত্মনঃ

সূর্য উবাচ
যদি তাত দদাস্যেতে বজ্রিণে কুণ্ডলে শুভে
ত্বমপ্যেনমথো ব্রূয়া বিজয়ার্থং মহাবল

নিয়মেন প্রদদ্যাস্ত্বং কুণ্ডলে বৈ শতক্রতোঃ
অবধ্যো হ্যসি ভূতানাং কুণ্ডলাভ্যাং সমন্বিতঃ

অর্জুনেন বিনাশং হি তব দানবসূদনঃ
প্রার্থয়ানো রণে বত্স কুণ্ডলে তে জিহীর্ষতি

স ত্বমপ্যেনমারাধ্য সূনৃতাভিঃ পুনঃ পুনঃ
অভ্যর্থয়েথা দেবেশমমোঘার্থং পুরংদরম্

অমোঘাং দেহি মে শক্তিমমিত্রবিনিবর্হিণীম্
দাস্যামি তে সহস্রাক্ষ কুণ্ডলে বর্ম চোত্তমম্

ইত্যেবং নিয়মেন ত্বং দদ্যাঃ শক্রায় কুণ্ডলে
তয়া ত্বং কর্ণ সংগ্রামে হনিষ্যসি রণে রিপূন্

নাহত্বা হি মহাবাহো শত্রূনেতি করং পুনঃ
সা শক্তির্দেবরাজস্য শতশোঽথ সহস্রশঃ

বৈশংপায়ন উবাচ
এবমুক্ত্বা সহস্রাংশুঃ সহসান্তরধীয়ত
ততঃ সূর্যায় জপ্যান্তে কর্ণঃ স্বপ্নং ন্যবেদয়ৎ

যথাদৃষ্টং যথাতত্ত্বং যথোক্তমুভয়োর্নিশি
তত্সর্বমানুপূর্ব্যেণ শশংসাস্মৈ বৃষস্তদা

তচ্ছ্রুত্বা ভগবান্দেবো ভানুঃ স্বর্ভানুসূদনঃ
উবাচ তং তথেত্যেব কর্ণং সূর্যঃ স্ময়ন্নিব

ততস্তত্ত্বমিতি জ্ঞাত্বা রাধেয়ঃ পরবীরহা
শক্তিমেবাভিকাঙ্ক্ষন্বৈ বাসবং প্রত্যপালয়ৎ