অধ্যায় 285

285.1

সূর্য উবাচ
মাহিতং কর্ণ কার্ষীস্ত্বমাত্মনঃ সুহৃদাং তথা
পুত্রাণামথ ভার্যাণামথো মাতুরথো পিতুঃ

শরীরস্যাবিরোধেন প্রাণিনাং প্রাণভৃদ্বর
ইষ্যতে যশসঃ প্রাপ্তিঃ কীর্তিশ্চ ত্রিদিবে স্থিরা

যস্ত্বং প্রাণবিরোধেন কীর্তিমিচ্ছসি শাশ্বতীম্
সা তে প্রাণান্সমাদায় গমিষ্যতি ন সংশয়ঃ

জীবতাং কুরুতে কার্যং পিতা মাতা সুতাস্তথা
যে চান্যে বান্ধবাঃ কেচিল্লোকেঽস্মিন্পুরুষর্ষভ
রাজানশ্চ নরব্যাঘ্র পৌরুষেণ নিবোধ তৎ

কীর্তিশ্চ জীবতঃ সাধ্বী পুরুষস্য মহাদ্যুতে
মৃতস্য কীর্ত্যা কিং কার্যং ভস্মীভূতস্য দেহিনঃ
মৃতঃ কীর্তিং ন জানাতি জীবন্কীর্তিং সমশ্নুতে

মৃতস্য কীর্তির্মর্ত্যস্য যথা মালা গতায়ুষঃ
অহং তু ত্বাং ব্রবীম্যেতদ্ভক্তোঽসীতি হিতেপ্সয়া

ভক্তিমন্তো হি মে রক্ষ্যা ইত্যেতেনাপি হেতুনা
ভক্তোঽয়ং পরয়া ভক্ত্যা মামিত্যেব মহাভুজ
মমাপি ভক্তিরুত্পন্না স ত্বং কুরু বচো মম

অস্তি চাত্র পরং কিংচিদধ্যাত্মং দেবনির্মিতম্
অতশ্চ ত্বাং ব্রবীম্যেতত্ক্রিয়তামবিশঙ্কয়া

দেবগুহ্যং ত্বয়া জ্ঞাতুং ন শক্যং পুরুষর্ষভ
তস্মান্নাখ্যামি তে গুহ্যং কালে বেত্স্যতি তদ্ভবান্

পুনরুক্তং চ বক্ষ্যামি ত্বং রাধেয় নিবোধ তৎ
মাস্মৈ তে কুণ্ডলে দদ্যা ভিক্ষবে বজ্রপাণয়ে

শোভসে কুণ্ডলাভ্যাং হি রুচিরাভ্যাং মহাদ্যুতে
বিশাখয়োর্মধ্যগতঃ শশীব বিমলো দিবি

কীর্তিশ্চ জীবতঃ সাধ্বী পুরুষস্যেতি বিদ্ধি তৎ
প্রত্যাখ্যেয়স্ত্বয়া তাত কুণ্ডলার্থে পুরংদরঃ

শক্যা বহুবিধৈর্বাক্যৈঃ কুণ্ডলেপ্সা ত্বয়ানঘ
বিহন্তুং দেবরাজস্য হেতুয়ুক্তৈঃ পুনঃ পুনঃ

উপপত্ত্যুপপন্নার্থৈর্মাধুর্যকৃতভূষণৈঃ
পুরংদরস্য কর্ণ ত্বং বুদ্ধিমেতামপানুদ

ত্বং হি নিত্যং নরব্যাঘ্র স্পর্ধসে সব্যসাচিনা
সব্যসাচী ত্বয়া চৈব যুধি শূরঃ সমেষ্যতি

ন তু ত্বামর্জুনঃ শক্তঃ কুণ্ডলাভ্যাং সমন্বিতম্
বিজেতুং যুধি যদ্যস্য স্বয়মিন্দ্রঃ শরো ভবেৎ

তস্মান্ন দেয়ে শক্রায় ত্বয়ৈতে কুণ্ডলে শুভে
সংগ্রামে যদি নির্জেতুং কর্ণ কাময়সেঽর্জুনম্