Utshovঅধ্যায় 284
284.1
জনমেজয় উবাচ
যত্তত্তদা মহাব্রহ্মঁল্লোমশো বাক্যমব্রবীৎ
ইন্দ্রস্য বচনাদেত্য পাণ্ডুপুত্রং যুধিষ্ঠিরম্
284.2
যচ্চাপি তে ভয়ং তীব্রং ন চ কীর্তয়সে ক্বচিৎ
তচ্চাপ্যপহরিষ্যামি সব্যসাচাবিহাগতে
284.3
কিং নু তদ্বিদুষাং শ্রেষ্ঠ কর্ণং প্রতি মহদ্ভয়ম্
আসীন্ন চ স ধর্মাত্মা কথয়ামাস কস্যচিৎ
284.4
বৈশংপায়ন উবাচ
অহং তে রাজশার্দূল কথয়ামি কথামিমাম্
পৃচ্ছতে ভরতশ্রেষ্ঠ শুশ্রূষস্ব গিরং মম
284.5
দ্বাদশে সমতিক্রান্তে বর্ষে প্রাপ্তে ত্রয়োদশে
পাণ্ডূনাং হিতকৃচ্ছক্রঃ কর্ণং ভিক্ষিতুমুদ্যতঃ
284.6
অভিপ্রায়মথো জ্ঞাত্বা মহেন্দ্রস্য বিভাবসুঃ
কুণ্ডলার্থে মহারাজ সূর্যঃ কর্ণমুপাগমৎ
284.7
মহার্হে শয়নে বীরং স্পর্ধ্যাস্তরণসংবৃতে
শয়ানমভিবিশ্বস্তং ব্রহ্মণ্যং সত্যবাদিনম্
284.8
স্বপ্নান্তে নিশি রাজেন্দ্র দর্শয়ামাস রশ্মিবান্
কৃপয়া পরয়াবিষ্টঃ পুত্রস্নেহাচ্চ ভারত
284.9
ব্রাহ্মণো বেদবিদ্ভূত্বা সূর্যো যোগাদ্ধি রূপবান্
হিতার্থমব্রবীত্কর্ণং সান্ত্বপূর্বমিদং বচঃ
284.10
কর্ণ মদ্বচনং তাত শৃণু সত্যভৃতাং বর
ব্রুবতোঽদ্য মহাবাহো সৌহৃদাত্পরমং হিতম্
284.11
উপায়াস্যতি শক্রস্ত্বাং পাণ্ডবানাং হিতেপ্সয়া
ব্রাহ্মণচ্ছদ্মনা কর্ণ কুণ্ডলাপজিহীর্ষয়া
284.12
বিদিতং তেন শীলং তে সর্বস্য জগতস্তথা
যথা ত্বং ভিক্ষিতঃ সদ্ভির্দদাস্যেব ন যাচসে
284.13
ত্বং হি তাত দদাস্যেব ব্রাহ্মণেভ্যঃ প্রয়াচিতঃ
বিত্তং যচ্চান্যদপ্যাহুর্ন প্রত্যাখ্যাসি কর্হিচিৎ
284.14
তং ত্বামেবংবিধং জ্ঞাত্বা স্বয়ং বৈ পাকশাসনঃ
আগন্তা কুণ্ডলার্থায় কবচং চৈব ভিক্ষিতুম্
284.15
তস্মৈ প্রয়াচমানায় ন দেয়ে কুণ্ডলে ত্বয়া
অনুনেয়ঃ পরং শক্ত্যা শ্রেয় এতদ্ধি তে পরম্
284.16
কুণ্ডলার্থে ব্রুবংস্তাত কারণৈর্বহুভিস্ত্বয়া
অন্যৈর্বহুবিধৈর্বিত্তৈঃ স নিবার্যঃ পুনঃ পুনঃ
284.17
রত্নৈঃ স্ত্রীভিস্তথা ভোগৈর্ধনৈর্বহুবিধৈরপি
নিদর্শনৈশ্চ বহুভিঃ কুণ্ডলেপ্সুঃ পুরংদরঃ
284.18
যদি দাস্যসি কর্ণ ত্বং সহজে কুণ্ডলে শুভে
আয়ুষঃ প্রক্ষয়ং গত্বা মৃত্যোর্বশমুপেষ্যসি
284.19
কবচেন চ সংয়ুক্তঃ কুণ্ডলাভ্যাং চ মানদ
অবধ্যস্ত্বং রণেঽরীণামিতি বিদ্ধি বচো মম
284.20
অমৃতাদুত্থিতং হ্যেতদুভয়ং রত্নসংভবম্
তস্মাদ্রক্ষ্যং ত্বয়া কর্ণ জীবিতং চেত্প্রিয়ং তব
284.21
কর্ণ উবাচ
কো মামেবং ভবান্প্রাহ দর্শয়ন্সৌহৃদং পরম্
কাময়া ভগবন্ব্রূহি কো ভবান্দ্বিজবেষধৃক্
284.22
ব্রাহ্মণ উবাচ
অহং তাত সহস্রাংশুঃ সৌহৃদাত্ত্বাং নিদর্শয়ে
কুরুষ্বৈতদ্বচো মে ত্বমেতচ্ছ্রেয়ঃ পরং হি তে
284.23
কর্ণ উবাচ
শ্রেয় এব মমাত্যন্তং যস্য মে গোপতিঃ প্রভুঃ
প্রবক্তাদ্য হিতান্বেষী শৃণু চেদং বচো মম
284.24
প্রসাদয়ে ত্বাং বরদং প্রণয়াচ্চ ব্রবীম্যহম্
ন নিবার্যো ব্রতাদস্মাদহং যদ্যস্মি তে প্রিয়ঃ
284.25
ব্রতং বৈ মম লোকোঽয়ং বেত্তি কৃত্স্নো বিভাবসো
যথাহং দ্বিজমুখ্যেভ্যো দদ্যাং প্রাণানপি ধ্রুবম্
284.26
যদ্যাগচ্ছতি শক্রো মাং ব্রাহ্মণচ্ছদ্মনাবৃতঃ
হিতার্থং পাণ্ডুপুত্রাণাং খেচরোত্তম ভিক্ষিতুম্
284.27
দাস্যামি বিবুধশ্রেষ্ঠ কুণ্ডলে বর্ম চোত্তমম্
ন মে কীর্তিঃ প্রণশ্যেত ত্রিষু লোকেষু বিশ্রুতা
284.28
মদ্বিধস্যায়শস্যং হি ন যুক্তং প্রাণরক্ষণম্
যুক্তং হি যশসা যুক্তং মরণং লোকসংমতম্
284.29
সোঽহমিন্দ্রায় দাস্যামি কুণ্ডলে সহ বর্মণা
যদি মাং বলবৃত্রঘ্নো ভিক্ষার্থমুপয়াস্যতি
284.30
হিতার্থং পাণ্ডুপুত্রাণাং কুণ্ডলে মে প্রয়াচিতুম্
তন্মে কীর্তিকরং লোকে তস্যাকীর্তির্ভবিষ্যতি
284.31
বৃণোমি কীর্তিং লোকে হি জীবিতেনাপি ভানুমন্
কীর্তিমানশ্নুতে স্বর্গং হীনকীর্তিস্তু নশ্যতি
284.32
কীর্তির্হি পুরুষং লোকে সংজীবয়তি মাতৃবৎ
অকীর্তির্জীবিতং হন্তি জীবতোঽপি শরীরিণঃ
284.33
অয়ং পুরাণঃ শ্লোকো হি স্বয়ং গীতো বিভাবসো
ধাত্রা লোকেশ্বর যথা কীর্তিরায়ুর্নরস্য বৈ
284.34
পুরুষস্য পরে লোকে কীর্তিরেব পরায়ণম্
ইহ লোকে বিশুদ্ধা চ কীর্তিরায়ুর্বিবর্ধনী
284.35
সোঽহং শরীরজে দত্ত্বা কীর্তিং প্রাপ্স্যামি শাশ্বতীম্
দত্ত্বা চ বিধিবদ্দানং ব্রাহ্মণেভ্যো যথাবিধি
284.36
হুত্বা শরীরং সংগ্রামে কৃত্বা কর্ম সুদুষ্করম্
বিজিত্য বা পরানাজৌ যশঃ প্রাপ্স্যামি কেবলম্
284.37
ভীতানামভয়ং দত্ত্বা সংগ্রামে জীবিতার্থিনাম্
বৃদ্ধান্বালান্দ্বিজাতীংশ্চ মোক্ষয়িত্বা মহাভয়াৎ
284.38
প্রাপ্স্যামি পরমং লোকে যশঃ স্বর্ভানুসূদন
জীবিতেনাপি মে রক্ষ্যা কীর্তিস্তদ্বিদ্ধি মে ব্রতম্
284.39
সোঽহং দত্ত্বা মঘবতে ভিক্ষামেতামনুত্তমাম্
ব্রাহ্মণচ্ছদ্মিনে দেব লোকে গন্তা পরাং গতিম্