অধ্যায় 283

283.1

মার্কণ্ডেয় উবাচ
তস্যাং রাত্র্যাং ব্যতীতায়ামুদিতে সূর্যমণ্ডলে
কৃতপূর্বাহ্ণিকাঃ সর্বে সমেয়ুস্তে তপোধনাঃ

তদেব সর্বং সাবিত্র্যা মহাভাগ্যং মহর্ষয়ঃ
দ্যুমত্সেনায় নাতৃপ্যন্কথয়ন্তঃ পুনঃ পুনঃ

ততঃ প্রকৃতয়ঃ সর্বাঃ শাল্বেভ্যোঽভ্যাগতা নৃপ
আচখ্যুর্নিহতং চৈব স্বেনামাত্যেন তং নৃপম্

তং মন্ত্রিণা হতং শ্রুত্বা সসহায়ং সবান্ধবম্
ন্যবেদয়ন্যথাতত্ত্বং বিদ্রুতং চ দ্বিষদ্বলম্

ঐকমত্যং চ সর্বস্য জনস্যাথ নৃপং প্রতি
সচক্ষুর্বাপ্যচক্ষুর্বা স নো রাজা ভবত্বিতি

অনেন নিশ্চয়েনেহ বয়ং প্রস্থাপিতা নৃপ
প্রাপ্তানীমানি যানানি চতুরঙ্গং চ তে বলম্

প্রয়াহি রাজন্ভদ্রং তে ঘুষ্টস্তে নগরে জয়ঃ
অধ্যাস্স্ব চিররাত্রায় পিতৃপৈতামহং পদম্

চক্ষুষ্মন্তং চ তং দৃষ্ট্বা রাজানং বপুষান্বিতম্
মূর্ধভিঃ পতিতাঃ সর্বে বিস্ময়োত্ফুল্ললোচনাঃ

ততোঽভিবাদ্য তান্বৃদ্ধান্দ্বিজানাশ্রমবাসিনঃ
তৈশ্চাভিপূজিতঃ সর্বৈঃ প্রয়য়ৌ নগরং প্রতি

শৈব্যা চ সহ সাবিত্র্যা স্বাস্তীর্ণেন সুবর্চসা
নরয়ুক্তেন যানেন প্রয়য়ৌ সেনয়া বৃতা

ততোঽভিষিষিচুঃ প্রীত্যা দ্যুমত্সেনং পুরোহিতাঃ
পুত্রং চাস্য মহাত্মানং যৌবরাজ্যেঽভ্যষেচয়ন্

ততঃ কালেন মহতা সাবিত্র্যাঃ কীর্তিবর্ধনম্
তদ্বৈ পুত্রশতং জজ্ঞে শূরাণামনিবর্তিনাম্

ভ্রাতৄণাং সোদরাণাং চ তথৈবাস্যাভবচ্ছতম্
মদ্রাধিপস্যাশ্বপতের্মালব্যাং সুমহাবলম্

এবমাত্মা পিতা মাতা শ্বশ্রূঃ শ্বশুর এব চ
ভর্তুঃ কুলং চ সাবিত্র্যা সর্বং কৃচ্ছ্রাত্সমুদ্ধৃতম্

তথৈবৈষাপি কল্যাণী দ্রৌপদী শীলসংমতা
তারয়িষ্যতি বঃ সর্বান্সাবিত্রীব কুলাঙ্গনা

বৈশংপায়ন উবাচ
এবং স পাণ্ডবস্তেন অনুনীতো মহাত্মনা
বিশোকো বিজ্বরো রাজন্কাম্যকে ন্যবসত্তদা