Utshovঅধ্যায় 282
282.1
মার্কণ্ডেয় উবাচ
এতস্মিন্নেব কালে তু দ্যুমত্সেনো মহাবনে
লব্ধচক্ষুঃ প্রসন্নাত্মা দৃষ্ট্যা সর্বং দদর্শ হ
282.2
স সর্বানাশ্রমান্গত্বা শৈব্যয়া সহ ভার্যয়া
পুত্রহেতোঃ পরামার্তিং জগাম মনুজর্ষভ
282.3
তাবাশ্রমান্নদীশ্চৈব বনানি চ সরাংসি চ
তাংস্তান্দেশান্বিচিন্বন্তৌ দম্পতী পরিজগ্মতুঃ
282.4
শ্রুত্বা শব্দং তু যত্কিংচিদুন্মুখৌ সুতশঙ্কয়া
সাবিত্রীসহিতোঽভ্যেতি সত্যবানিত্যধাবতাম্
282.5
ভিন্নৈশ্চ পরুষৈঃ পাদৈঃ সব্রণৈঃ শোণিতোক্ষিতৈঃ
কুশকণ্টকবিদ্ধাঙ্গাবুন্মত্তাবিব ধাবতঃ
282.6
ততোঽভিসৃত্য তৈর্বিপ্রৈঃ সর্বৈরাশ্রমবাসিভিঃ
পরিবার্য সমাশ্বাস্য সমানীতৌ স্বমাশ্রমম্
282.7
তত্র ভার্যাসহায়ঃ স বৃতো বৃদ্ধৈস্তপোধনৈঃ
আশ্বাসিতো বিচিত্রার্থৈঃ পূর্বরাজ্ঞাং কথাশ্রয়ৈঃ
282.8
ততস্তৌ পুনরাশ্বস্তৌ বৃদ্ধৌ পুত্রদিদৃক্ষয়া
বাল্যে বৃত্তানি পুত্রস্য স্মরন্তৌ ভৃশদুঃখিতৌ
282.9
পুনরুক্ত্বা চ করুণাং বাচং তৌ শোককর্শিতৌ
হা পুত্র হা সাধ্বি বধূঃ ক্বাসি ক্বাসীত্যরোদতাম্
282.10
সুবর্চা উবাচ
যথাস্য ভার্যা সাবিত্রী তপসা চ দমেন চ
আচারেণ চ সংয়ুক্তা তথা জীবতি সত্যবান্
282.11
গৌতম উবাচ
বেদাঃ সাঙ্গা ময়াধীতাস্তপো মে সংচিতং মহৎ
কৌমারং ব্রহ্মচর্যং মে গুরবোঽগ্নিশ্চ তোষিতাঃ
282.12
সমাহিতেন চীর্ণানি সর্বাণ্যেব ব্রতানি মে
বায়ুভক্ষোপবাসশ্চ কুশলানি চ যানি মে
282.13
অনেন তপসা বেদ্মি সর্বং পরিচিকীর্ষিতম্
সত্যমেতন্নিবোধ ত্বং ধ্রিয়তে সত্যবানিতি
282.14
শিষ্য উবাচ
উপাধ্যায়স্য মে বক্ত্রাদ্যথা বাক্যং বিনিঃসৃতম্
নৈতজ্জাতু ভবেন্মিথ্যা তথা জীবতি সত্যবান্
282.15
ঋষয় ঊচুঃ
যথাস্য ভার্যা সাবিত্রী সর্বৈরেব সুলক্ষণৈঃ
অবৈধব্যকরৈর্যুক্তা তথা জীবতি সত্যবান্
282.16
ভারদ্বাজ উবাচ
যথাস্য ভার্যা সাবিত্রী তপসা চ দমেন চ
আচারেণ চ সংয়ুক্তা তথা জীবতি সত্যবান্
282.17
দাল্ভ্য উবাচ
যথা দৃষ্টিঃ প্রবৃত্তা তে সাবিত্র্যাশ্চ যথা ব্রতম্
গতাহারমকৃত্বা চ তথা জীবতি সত্যবান্
282.18
মাণ্ডব্য উবাচ
যথা বদন্তি শান্তায়াং দিশি বৈ মৃগপক্ষিণঃ
পার্থিবী চ প্রবৃত্তিস্তে তথা জীবতি সত্যবান্
282.19
ধৌম্য উবাচ
সর্বৈর্গুণৈরুপেতস্তে যথা পুত্রো জনপ্রিয়ঃ
দীর্ঘায়ুর্লক্ষণোপেতস্তথা জীবতি সত্যবান্
282.20
মার্কণ্ডেয় উবাচ
এবমাশ্বাসিতস্তৈস্তু সত্যবাগ্ভিস্তপস্বিভিঃ
তাংস্তান্বিগণয়ন্নর্থানবস্থিত ইবাভবৎ
282.21
ততো মুহূর্তাত্সাবিত্রী ভর্ত্রা সত্যবতা সহ
আজগামাশ্রমং রাত্রৌ প্রহৃষ্টা প্রবিবেশ হ
282.22
ব্রাহ্মণা ঊচুঃ
পুত্রেণ সংগতং ত্বাদ্য চক্ষুষ্মন্তং নিরীক্ষ্য চ
সর্বে বয়ং বৈ পৃচ্ছামো বৃদ্ধিং তে পৃথিবীপতে
282.23
সমাগমেন পুত্রস্য সাবিত্র্যা দর্শনেন চ
চক্ষুষশ্চাত্মনো লাভাত্ত্রিভির্দিষ্ট্যা বিবর্ধসে
282.24
সর্বৈরস্মাভিরুক্তং যত্তথা তন্নাত্র সংশয়ঃ
ভূয়ো ভূয়শ্চ বৃদ্ধিস্তে ক্ষিপ্রমেব ভবিষ্যতি
282.25
মার্কণ্ডেয় উবাচ
ততোঽগ্নিং তত্র সংজ্বাল্য দ্বিজাস্তে সর্ব এব হি
উপাসাং চক্রিরে পার্থ দ্যুমত্সেনং মহীপতিম্
282.26
শৈব্যা চ সত্যবাংশ্চৈব সাবিত্রী চৈকতঃ স্থিতাঃ
সর্বৈস্তৈরভ্যনুজ্ঞাতা বিশোকাঃ সমুপাবিশন্
282.27
ততো রাজ্ঞা সহাসীনাঃ সর্বে তে বনবাসিনঃ
জাতকৌতূহলাঃ পার্থ পপ্রচ্ছুর্নৃপতেঃ সুতম্
282.28
প্রাগেব নাগতং কস্মাত্সভার্যেণ ত্বয়া বিভো
বিরাত্রে চাগতং কস্মাত্কোঽনুবন্ধশ্চ তেঽভবৎ
282.29
সংতাপিতঃ পিতা মাতা বয়ং চৈব নৃপাত্মজ
নাকস্মাদিতি জানীমস্তত্সর্বং বক্তুমর্হসি
282.30
সত্যবানুবাচ
পিত্রাহমভ্যনুজ্ঞাতঃ সাবিত্রীসহিতো গতঃ
অথ মেঽভূচ্ছিরোদুঃখং বনে কাষ্ঠানি ভিন্দতঃ
282.31
সুপ্তশ্চাহং বেদনয়া চিরমিত্যুপলক্ষয়ে
তাবত্কালং চ ন ময়া সুপ্তপূর্বং কদাচন
282.32
সর্বেষামেব ভবতাং সংতাপো মা ভবেদিতি
অতো বিরাত্রাগমনং নান্যদস্তীহ কারণম্
282.33
গৌতম উবাচ
অকস্মাচ্চক্ষুষঃ প্রাপ্তির্দ্যুমত্সেনস্য তে পিতুঃ
নাস্য ত্বং কারণং বেত্থ সাবিত্রী বক্তুমর্হতি
282.34
শ্রোতুমিচ্ছামি সাবিত্রি ত্বং হি বেত্থ পরাবরম্
ত্বাং হি জানামি সাবিত্রি সাবিত্রীমিব তেজসা
282.35
ত্বমত্র হেতুং জানীষে তস্মাত্সত্যং নিরুচ্যতাম্
রহস্যং যদি তে নাস্তি কিংচিদত্র বদস্ব নঃ
282.36
সাবিত্র্যুবাচ
এবমেতদ্যথা বেত্থ সংকল্পো নান্যথা হি বঃ
ন চ কিংচিদ্রহস্যং মে শ্রূয়তাং তথ্যমত্র যৎ
282.37
মৃত্যুর্মে ভর্তুরাখ্যাতো নারদেন মহাত্মনা
স চাদ্য দিবসঃ প্রাপ্তস্ততো নৈনং জহাম্যহম্
282.38
সুপ্তং চৈনং যমঃ সাক্ষাদুপাগচ্ছত্সকিংকরঃ
স এনমনয়দ্বদ্ধ্বা দিশং পিতৃনিষেবিতাম্
282.39
অস্তৌষং তমহং দেবং সত্যেন বচসা বিভুম্
পঞ্চ বৈ তেন মে দত্তা বরাঃ শৃণুত তান্মম
282.40
চক্ষুষী চ স্বরাজ্যং চ দ্বৌ বরৌ শ্বশুরস্য মে
লব্ধং পিতুঃ পুত্রশতং পুত্রাণামাত্মনঃ শতম্
282.41
চতুর্বর্ষশতায়ুর্মে ভর্তা লব্ধশ্চ সত্যবান্
ভর্তুর্হি জীবিতার্থং তু ময়া চীর্ণং স্থিরং ব্রতম্
282.42
এতত্সত্যং ময়াখ্যাতং কারণং বিস্তরেণ বঃ
যথা বৃত্তং সুখোদর্কমিদং দুঃখং মহন্মম
282.43
ঋষয় ঊচুঃ
নিমজ্জমানং ব্যসনৈরভিদ্রুতং; কুলং নরেন্দ্রস্য তমোময়ে হ্রদে
ত্বয়া সুশীলে ধৃতধর্মপুণ্যয়া; সমুদ্ধৃতং সাধ্বি পুনঃ কুলীনয়া
282.44
মার্কণ্ডেয় উবাচ
তথা প্রশস্য হ্যভিপূজ্য চৈব তে; বরস্ত্রিয়ং তামৃষয়ঃ সমাগতাঃ
নরেন্দ্রমামন্ত্র্য সপুত্রমঞ্জসা; শিবেন জগ্মুর্মুদিতাঃ স্বমালয়ম্