Utshovঅধ্যায় 281
281.1
মার্কণ্ডেয় উবাচ
অথ ভার্যাসহায়ঃ স ফলান্যাদায় বীর্যবান্
কঠিনং পূরয়ামাস ততঃ কাষ্ঠান্যপাটয়ৎ
281.2
তস্য পাটয়তঃ কাষ্ঠং স্বেদো বৈ সমজায়ত
ব্যায়ামেন চ তেনাস্য জজ্ঞে শিরসি বেদনা
281.3
সোঽভিগম্য প্রিয়াং ভার্যামুবাচ শ্রমপীডিতঃ
ব্যায়ামেন মমানেন জাতা শিরসি বেদনা
281.4
অঙ্গানি চৈব সাবিত্রি হৃদয়ং দূয়তীব চ
অস্বস্থমিব চাত্মানং লক্ষয়ে মিতভাষিণি
281.5
শূলৈরিব শিরো বিদ্ধমিদং সংলক্ষয়াম্যহম্
তত্স্বপ্তুমিচ্ছে কল্যাণি ন স্থাতুং শক্তিরস্তি মে
281.6
সমাসাদ্যাথ সাবিত্রী ভর্তারমুপগূহ্য চ
উত্সঙ্গেঽস্য শিরঃ কৃত্বা নিষসাদ মহীতলে
281.7
ততঃ সা নারদবচো বিমৃশন্তী তপস্বিনী
তং মুহূর্তং ক্ষণং বেলাং দিবসং চ যুয়োজ হ
281.8
মুহূর্তাদিব চাপশ্যত্পুরুষং পীতবাসসম্
বদ্ধমৌলিং বপুষ্মন্তমাদিত্যসমতেজসম্
281.9
শ্যামাবদাতং রক্তাক্ষং পাশহস্তং ভয়াবহম্
স্থিতং সত্যবতঃ পার্শ্বে নিরীক্ষন্তং তমেব চ
281.10
তং দৃষ্ট্বা সহসোত্থায় ভর্তুর্ন্যস্য শনৈঃ শিরঃ
কৃতাঞ্জলিরুবাচার্তা হৃদয়েন প্রবেপতা
281.11
দৈবতং ত্বাভিজানামি বপুরেতদ্ধ্যমানুষম্
কাময়া ব্রূহি মে দেব কস্ত্বং কিং চ চিকীর্ষসি
281.12
যম উবাচ
পতিব্রতাসি সাবিত্রি তথৈব চ তপোন্বিতা
অতস্ত্বামভিভাষামি বিদ্ধি মাং ত্বং শুভে যমম্
281.13
অয়ং তে সত্যবান্ভর্তা ক্ষীণায়ুঃ পার্থিবাত্মজঃ
নেষ্যাম্যেনমহং বদ্ধ্বা বিদ্ধ্যেতন্মে চিকীর্ষিতম্
281.14
মার্কণ্ডেয় উবাচ
ইত্যুক্ত্বা পিতৃরাজস্তাং ভগবান্স্বং চিকীর্ষিতম্
যথাবত্সর্বমাখ্যাতুং তত্প্রিয়ার্থং প্রচক্রমে
281.15
অয়ং হি ধর্মসংয়ুক্তো রূপবান্গুণসাগরঃ
নার্হো মত্পুরুষৈর্নেতুমতোঽস্মি স্বয়মাগতঃ
281.16
ততঃ সত্যবতঃ কায়াত্পাশবদ্ধং বশং গতম্
অঙ্গুষ্ঠমাত্রং পুরুষং নিশ্চকর্ষ যমো বলাৎ
281.17
ততঃ সমুদ্ধৃতপ্রাণং গতশ্বাসং হতপ্রভম্
নির্বিচেষ্টং শরীরং তদ্বভূবাপ্রিয়দর্শনম্
281.18
যমস্তু তং তথা বদ্ধ্বা প্রয়াতো দক্ষিণামুখঃ
সাবিত্রী চাপি দুঃখার্তা যমমেবান্বগচ্ছত
নিয়মব্রতসংসিদ্ধা মহাভাগা পতিব্রতা
281.19
যম উবাচ
নিবর্ত গচ্ছ সাবিত্রি কুরুষ্বাস্যৌর্ধ্বদেহিকম্
কৃতং ভর্তুস্ত্বয়ানৃণ্যং যাবদ্গম্যং গতং ত্বয়া
281.20
সাবিত্র্যুবাচ
যত্র মে নীয়তে ভর্তা স্বয়ং বা যত্র গচ্ছতি
ময়াপি তত্র গন্তব্যমেষ ধর্মঃ সনাতনঃ
281.21
তপসা গুরুবৃত্ত্যা চ ভর্তুঃ স্নেহাদ্ব্রতেন চ
তব চৈব প্রসাদেন ন মে প্রতিহতা গতিঃ
281.22
প্রাহুঃ সপ্তপদং মিত্রং বুধাস্তত্ত্বার্থদর্শিনঃ
মিত্রতাং চ পুরস্কৃত্য কিংচিদ্বক্ষ্যামি তচ্ছৃণু
281.23
নানাত্মবন্তস্তু বনে চরন্তি; ধর্মং চ বাসং চ পরিশ্রমং চ
বিজ্ঞানতো ধর্মমুদাহরন্তি; তস্মাত্সন্তো ধর্মমাহুঃ প্রধানম্
281.24
একস্য ধর্মেণ সতাং মতেন; সর্বে স্ম তং মার্গমনুপ্রপন্নাঃ
মা বৈ দ্বিতীয়ং মা তৃতীয়ং চ বাঞ্ছে; তস্মাত্সন্তো ধর্মমাহুঃ প্রধানম্
281.25
যম উবাচ
নিবর্ত তুষ্টোঽস্মি তবানয়া গিরা; স্বরাক্ষরব্যঞ্জনহেতুয়ুক্তয়া
বরং বৃণীষ্বেহ বিনাস্য জীবিতং; দদানি তে সর্বমনিন্দিতে বরম্
281.26
সাবিত্র্যুবাচ
চ্যুতঃ স্বরাজ্যাদ্বনবাসমাশ্রিতো; বিনষ্টচক্ষুঃ শ্বশুরো মমাশ্রমে
স লব্ধচক্ষুর্বলবান্ভবেন্নৃপ;স্তব প্রসাদাজ্জ্বলনার্কসংনিভঃ
281.27
যম উবাচ
দদানি তে সর্বমনিন্দিতে বরং; যথা ত্বয়োক্তং ভবিতা চ তত্তথা
তবাধ্বনা গ্লানিমিবোপলক্ষয়ে; নিবর্ত গচ্ছস্ব ন তে শ্রমো ভবেৎ
281.28
সাবিত্র্যুবাচ
কুতঃ শ্রমো ভর্তৃসমীপতো হি মে; যতো হি ভর্তা মম সা গতির্ধ্রুবা
যতঃ পতিং নেষ্যসি তত্র মে গতিঃ; সুরেশ ভূয়শ্চ বচো নিবোধ মে
281.29
সতাং সকৃত্সংগতমীপ্সিতং পরং; ততঃ পরং মিত্রমিতি প্রচক্ষতে
ন চাফলং সত্পুরুষেণ সংগতং; ততঃ সতাং সংনিবসেত্সমাগমে
281.30
যম উবাচ
মনোনুকূলং বুধবুদ্ধিবর্ধনং; ত্বয়াহমুক্তো বচনং হিতাশ্রয়ম্
বিনা পুনঃ সত্যবতোঽস্য জীবিতং; বরং দ্বিতীয়ং বরয়স্ব ভামিনি
281.31
সাবিত্র্যুবাচ
হৃতং পুরা মে শ্বশুরস্য ধীমতঃ; স্বমেব রাজ্যং স লভেত পার্থিবঃ
জহ্যাত্স্বধর্মং ন চ মে গুরুর্যথা; দ্বিতীয়মেতং বরয়ামি তে বরম্
281.32
যম উবাচ
স্বমেব রাজ্যং প্রতিপত্স্যতেঽচিরা;ন্ন চ স্বধর্মাত্পরিহাস্যতে নৃপঃ
কৃতেন কামেন ময়া নৃপাত্মজে; নিবর্ত গচ্ছস্ব ন তে শ্রমো ভবেৎ
281.33
সাবিত্র্যুবাচ
প্রজাস্ত্বয়েমা নিয়মেন সংয়তা; নিয়ম্য চৈতা নয়সে ন কাময়া
অতো যমত্বং তব দেব বিশ্রুতং; নিবোধ চেমাং গিরমীরিতাং ময়া
281.34
অদ্রোহঃ সর্বভূতেষু কর্মণা মনসা গিরা
অনুগ্রহশ্চ দানং চ সতাং ধর্মঃ সনাতনঃ
281.35
এবংপ্রায়শ্চ লোকোঽয়ং মনুষ্যাঃ শক্তিপেশলাঃ
সন্তস্ত্বেবাপ্যমিত্রেষু দয়াং প্রাপ্তেষু কুর্বতে
281.36
যম উবাচ
পিপাসিতস্যেব যথা ভবেত্পয়;স্তথা ত্বয়া বাক্যমিদং সমীরিতম্
বিনা পুনঃ সত্যবতোঽস্য জীবিতং; বরং বৃণীষ্বেহ শুভে যদিচ্ছসি
281.37
সাবিত্র্যুবাচ
মমানপত্যঃ পৃথিবীপতিঃ পিতা; ভবেত্পিতুঃ পুত্রশতং মমৌরসম্
কুলস্য সংতানকরং চ যদ্ভবে;ত্তৃতীয়মেতং বরয়ামি তে বরম্
281.38
যম উবাচ
কুলস্য সংতানকরং সুবর্চসং; শতং সুতানাং পিতুরস্তু তে শুভে
কৃতেন কামেন নরাধিপাত্মজে; নিবর্ত দূরং হি পথস্ত্বমাগতা
281.39
সাবিত্র্যুবাচ
ন দূরমেতন্মম ভর্তৃসংনিধৌ; মনো হি মে দূরতরং প্রধাবতি
তথা ব্রজন্নেব গিরং সমুদ্যতাং; ময়োচ্যমানাং শৃণু ভূয় এব চ
281.40
বিবস্বতস্ত্বং তনয়ঃ প্রতাপবাং;স্ততো হি বৈবস্বত উচ্যসে বুধৈঃ
শমেন ধর্মেণ চ রঞ্জিতাঃ প্রজা;স্ততস্তবেহেশ্বর ধর্মরাজতা
281.41
আত্মন্যপি ন বিশ্বাসস্তাবান্ভবতি সত্সু যঃ
তস্মাত্সত্সু বিশেষেণ সর্বঃ প্রণয়মিচ্ছতি
281.42
সৌহৃদাত্সর্বভূতানাং বিশ্বাসো নাম জায়তে
তস্মাত্সত্সু বিশেষেণ বিশ্বাসং কুরুতে জনঃ
281.43
যম উবাচ
উদাহৃতং তে বচনং যদঙ্গনে; শুভে ন তাদৃক্ত্বদৃতে ময়া শ্রুতম্
অনেন তুষ্টোঽস্মি বিনাস্য জীবিতং; বরং চতুর্থং বরয়স্ব গচ্ছ চ
281.44
সাবিত্র্যুবাচ
মমাত্মজং সত্যবতস্তথৌরসং; ভবেদুভাভ্যামিহ যত্কুলোদ্বহম্
শতং সুতানাং বলবীর্যশালিনা;মিদং চতুর্থং বরয়ামি তে বরম্
281.45
যম উবাচ
শতং সুতানাং বলবীর্যশালিনাং; ভবিষ্যতি প্রীতিকরং তবাবলে
পরিশ্রমস্তে ন ভবেন্নৃপাত্মজে; নিবর্ত দূরং হি পথস্ত্বমাগতা
281.46
সাবিত্র্যুবাচ
সতাং সদা শাশ্বতী ধর্মবৃত্তিঃ; সন্তো ন সীদন্তি ন চ ব্যথন্তি
সতাং সদ্ভির্নাফলঃ সংগমোঽস্তি; সদ্ভ্যো ভয়ং নানুবর্তন্তি সন্তঃ
281.47
সন্তো হি সত্যেন নয়ন্তি সূর্যং; সন্তো ভূমিং তপসা ধারয়ন্তি
সন্তো গতির্ভূতভব্যস্য রাজ;ন্সতাং মধ্যে নাবসীদন্তি সন্তঃ
281.48
আর্যজুষ্টমিদং বৃত্তমিতি বিজ্ঞায় শাশ্বতম্
সন্তঃ পরার্থং কুর্বাণা নাবেক্ষন্তে প্রতিক্রিয়াম্
281.49
ন চ প্রসাদঃ সত্পুরুষেষু মোঘো; ন চাপ্যর্থো নশ্যতি নাপি মানঃ
যস্মাদেতন্নিয়তং সত্সু নিত্যং; তস্মাত্সন্তো রক্ষিতারো ভবন্তি
281.50
যম উবাচ
যথা যথা ভাষসি ধর্মসংহিতং; মনোনুকূলং সুপদং মহার্থবৎ
তথা তথা মে ত্বয়ি ভক্তিরুত্তমা; বরং বৃণীষ্বাপ্রতিমং যতব্রতে
281.51
সাবিত্র্যুবাচ
ন তেঽপবর্গঃ সুকৃতাদ্বিনাকৃত;স্তথা যথান্যেষু বরেষু মানদ
বরং বৃণে জীবতু সত্যবানয়ং; যথা মৃতা হ্যেবমহং বিনা পতিম্
281.52
ন কাময়ে ভর্তৃবিনাকৃতা সুখং; ন কাময়ে ভর্তৃবিনাকৃতা দিবম্
ন কাময়ে ভর্তৃবিনাকৃতা শ্রিয়ং; ন ভর্তৃহীনা ব্যবসামি জীবিতুম্
281.53
বরাতিসর্গঃ শতপুত্রতা মম; ত্বয়ৈব দত্তো হ্রিয়তে চ মে পতিঃ
বরং বৃণে জীবতু সত্যবানয়ং; তবৈব সত্যং বচনং ভবিষ্যতি
281.54
মার্কণ্ডেয় উবাচ
তথেত্যুক্ত্বা তু তান্পাশান্মুক্ত্বা বৈবস্বতো যমঃ
ধর্মরাজঃ প্রহৃষ্টাত্মা সাবিত্রীমিদমব্রবীৎ
281.55
এষ ভদ্রে ময়া মুক্তো ভর্তা তে কুলনন্দিনি
অরোগস্তব নেয়শ্চ সিদ্ধার্থশ্চ ভবিষ্যতি
281.56
চতুর্বর্ষশতং চায়ুস্ত্বয়া সার্ধমবাপ্স্যতি
ইষ্ট্বা যজ্ঞৈশ্চ ধর্মেণ খ্যাতিং লোকে গমিষ্যতি
281.57
ত্বয়ি পুত্রশতং চৈব সত্যবাঞ্জনয়িষ্যতি
তে চাপি সর্বে রাজানঃ ক্ষত্রিয়াঃ পুত্রপৌত্রিণঃ
খ্যাতাস্ত্বন্নামধেয়াশ্চ ভবিষ্যন্তীহ শাশ্বতাঃ
281.58
পিতুশ্চ তে পুত্রশতং ভবিতা তব মাতরি
মালব্যাং মালবা নাম শাশ্বতাঃ পুত্রপৌত্রিণঃ
ভ্রাতরস্তে ভবিষ্যন্তি ক্ষত্রিয়াস্ত্রিদশোপমাঃ
281.59
এবং তস্যৈ বরং দত্ত্বা ধর্মরাজঃ প্রতাপবান্
নিবর্তয়িত্বা সাবিত্রীং স্বমেব ভবনং যয়ৌ
281.60
সাবিত্র্যপি যমে যাতে ভর্তারং প্রতিলভ্য চ
জগাম তত্র যত্রাস্যা ভর্তুঃ শাবং কলেবরম্
281.61
সা ভূমৌ প্রেক্ষ্য ভর্তারমুপসৃত্যোপগূহ্য চ
উত্সঙ্গে শির আরোপ্য ভূমাবুপবিবেশ হ
281.62
সংজ্ঞাং চ সত্যবাঁল্লব্ধ্বা সাবিত্রীমভ্যভাষত
প্রোষ্যাগত ইব প্রেম্ণা পুনঃ পুনরুদীক্ষ্য বৈ
281.63
সত্যবানুবাচ
সুচিরং বত সুপ্তোঽস্মি কিমর্থং নাববোধিতঃ
ক্ব চাসৌ পুরুষঃ শ্যামো যোঽসৌ মাং সংচকর্ষ হ
281.64
সাবিত্র্যুবাচ
সুচিরং বত সুপ্তোঽসি মমাঙ্কে পুরুষর্ষভ
গতঃ স ভগবান্দেবঃ প্রজাসংয়মনো যমঃ
281.65
বিশ্রান্তোঽসি মহাভাগ বিনিদ্রশ্চ নৃপাত্মজ
যদি শক্যং সমুত্তিষ্ঠ বিগাঢাং পশ্য শর্বরীম্
281.66
মার্কণ্ডেয় উবাচ
উপলভ্য ততঃ সংজ্ঞাং সুখসুপ্ত ইবোত্থিতঃ
দিশঃ সর্বা বনান্তাংশ্চ নিরীক্ষ্যোবাচ সত্যবান্
281.67
ফলাহারোঽস্মি নিষ্ক্রান্তস্ত্বয়া সহ সুমধ্যমে
ততঃ পাটয়তঃ কাষ্ঠং শিরসো মে রুজাভবৎ
281.68
শিরোভিতাপসংতপ্তঃ স্থাতুং চিরমশক্নুবন্
তবোত্সঙ্গে প্রসুপ্তোঽহমিতি সর্বং স্মরে শুভে
281.69
ত্বয়োপগূঢস্য চ মে নিদ্রয়াপহৃতং মনঃ
ততোঽপশ্যং তমো ঘোরং পুরুষং চ মহৌজসম্
281.70
তদ্যদি ত্বং বিজানাসি কিং তদ্ব্রূহি সুমধ্যমে
স্বপ্নো মে যদি বা দৃষ্টো যদি বা সত্যমেব তৎ
281.71
তমুবাচাথ সাবিত্রী রজনী ব্যবগাহতে
শ্বস্তে সর্বং যথাবৃত্তমাখ্যাস্যামি নৃপাত্মজ
281.72
উত্তিষ্ঠোত্তিষ্ঠ ভদ্রং তে পিতরৌ পশ্য সুব্রত
বিগাঢা রজনী চেয়ং নিবৃত্তশ্চ দিবাকরঃ
281.73
নক্তংচরাশ্চরন্ত্যেতে হৃষ্টাঃ ক্রূরাভিভাষিণঃ
শ্রূয়ন্তে পর্ণশব্দাশ্চ মৃগাণাং চরতাং বনে
281.74
এতাঃ শিবা ঘোরনাদা দিশং দক্ষিণপশ্চিমাম্
আস্থায় বিরুবন্ত্যুগ্রাঃ কম্পয়ন্ত্যো মনো মম
281.75
সত্যবানুবাচ
বনং প্রতিভয়াকারং ঘনেন তমসা বৃতম্
ন বিজ্ঞাস্যসি পন্থানং গন্তুং চৈব ন শক্ষ্যসি
281.76
সাবিত্র্যুবাচ
অস্মিন্নদ্য বনে দগ্ধে শুষ্কবৃক্ষঃ স্থিতো জ্বলন্
বায়ুনা ধম্যমানোঽগ্নির্দৃশ্যতেঽত্র ক্বচিত্ক্বচিৎ
281.77
ততোঽগ্নিমানয়িত্বেহ জ্বালয়িষ্যামি সর্বতঃ
কাষ্ঠানীমানি সন্তীহ জহি সংতাপমাত্মনঃ
281.78
যদি নোত্সহসে গন্তুং সরুজং ত্বাভিলক্ষয়ে
ন চ জ্ঞাস্যসি পন্থানং তমসা সংবৃতে বনে
281.79
শ্বঃ প্রভাতে বনে দৃশ্যে যাস্যাবোঽনুমতে তব
বসাবেহ ক্ষপামেতাং রুচিতং যদি তেঽনঘ
281.80
সত্যবানুবাচ
শিরোরুজা নিবৃত্তা মে স্বস্থান্যঙ্গানি লক্ষয়ে
মাতাপিতৃভ্যামিচ্ছামি সংগমং ত্বত্প্রসাদজম্
281.81
ন কদাচিদ্বিকালে হি গতপূর্বো ময়াশ্রমঃ
অনাগতায়াং সংধ্যায়াং মাতা মে প্ররুণদ্ধি মাম্
281.82
দিবাপি ময়ি নিষ্ক্রান্তে সংতপ্যেতে গুরূ মম
বিচিনোতি চ মাং তাতঃ সহৈবাশ্রমবাসিভিঃ
281.83
মাত্রা পিত্রা চ সুভৃশং দুঃখিতাভ্যামহং পুরা
উপালব্ধঃ সুবহুশশ্চিরেণাগচ্ছসীতি হ
281.84
কা ত্ববস্থা তয়োরদ্য মদর্থমিতি চিন্তয়ে
তয়োরদৃশ্যে ময়ি চ মহদ্দুঃখং ভবিষ্যতি
281.85
পুরা মামূচতুশ্চৈব রাত্রাবস্রায়মাণকৌ
ভৃশং সুদুঃখিতৌ বৃদ্ধৌ বহুশঃ প্রীতিসংয়ুতৌ
281.86
ত্বয়া হীনৌ ন জীবাব মুহূর্তমপি পুত্রক
যাবদ্ধরিষ্যসে পুত্র তাবন্নৌ জীবিতং ধ্রুবম্
281.87
বৃদ্ধয়োরন্ধয়োর্যষ্টিস্ত্বয়ি বংশঃ প্রতিষ্ঠিতঃ
ত্বয়ি পিণ্ডশ্চ কীর্তিশ্চ সংতানং চাবয়োরিতি
281.88
মাতা বৃদ্ধা পিতা বৃদ্ধস্তয়োর্যষ্টিরহং কিল
তৌ রাত্রৌ মামপশ্যন্তৌ কামবস্থাং গমিষ্যতঃ
281.89
নিদ্রায়াশ্চাভ্যসূয়ামি যস্যা হেতোঃ পিতা মম
মাতা চ সংশয়ং প্রাপ্তা মত্কৃতেঽনপকারিণী
281.90
অহং চ সংশয়ং প্রাপ্তঃ কৃচ্ছ্রামাপদমাস্থিতঃ
মাতাপিতৃভ্যাং হি বিনা নাহং জীবিতুমুত্সহে
281.91
ব্যক্তমাকুলয়া বুদ্ধ্যা প্রজ্ঞাচক্ষুঃ পিতা মম
একৈকমস্যাং বেলায়াং পৃচ্ছত্যাশ্রমবাসিনম্
281.92
নাত্মানমনুশোচামি যথাহং পিতরং শুভে
ভর্তারং চাপ্যনুগতাং মাতরং পরিদুর্বলাম্
281.93
মত্কৃতেন হি তাবদ্য সংতাপং পরমেষ্যতঃ
জীবন্তাবনুজীবামি ভর্তব্যৌ তৌ ময়েতি হ
তয়োঃ প্রিয়ং মে কর্তব্যমিতি জীবামি চাপ্যহম্
281.94
মার্কণ্ডেয় উবাচ
এবমুক্ত্বা স ধর্মাত্মা গুরুবর্তী গুরুপ্রিয়ঃ
উচ্ছ্রিত্য বাহূ দুঃখার্তঃ সস্বরং প্ররুরোদ হ
281.95
ততোঽব্রবীত্তথা দৃষ্ট্বা ভর্তারং শোককর্শিতম্
প্রমৃজ্যাশ্রূণি নেত্রাভ্যাং সাবিত্রী ধর্মচারিণী
281.96
যদি মেঽস্তি তপস্তপ্তং যদি দত্তং হুতং যদি
শ্বশ্রূশ্বশুরভর্তৄণাং মম পুণ্যাস্তু শর্বরী
281.97
ন স্মরাম্যুক্তপূর্বাং বৈ স্বৈরেষ্বপ্যনৃতাং গিরম্
তেন সত্যেন তাবদ্য ধ্রিয়েতাং শ্বশুরৌ মম
281.98
সত্যবানুবাচ
কাময়ে দর্শনং পিত্রোর্যাহি সাবিত্রি মাচিরম্
পুরা মাতুঃ পিতুর্বাপি যদি পশ্যামি বিপ্রিয়ম্
ন জীবিষ্যে বরারোহে সত্যেনাত্মানমালভে
281.99
যদি ধর্মে চ তে বুদ্ধির্মাং চেজ্জীবন্তমিচ্ছসি
মম প্রিয়ং বা কর্তব্যং গচ্ছস্বাশ্রমমন্তিকাৎ
281.100
মার্কণ্ডেয় উবাচ
সাবিত্রী তত উত্থায় কেশান্সংয়ম্য ভামিনী
পতিমুত্থাপয়ামাস বাহুভ্যাং পরিগৃহ্য বৈ
281.101
উত্থায় সত্যবাংশ্চাপি প্রমৃজ্যাঙ্গানি পাণিনা
দিশঃ সর্বাঃ সমালোক্য কঠিনে দৃষ্টিমাদধে
281.102
তমুবাচাথ সাবিত্রী শ্বঃ ফলানীহ নেষ্যসি
যোগক্ষেমার্থমেতত্তে নেষ্যামি পরশুং ত্বহম্
281.103
কৃত্বা কঠিনভারং সা বৃক্ষশাখাবলম্বিনম্
গৃহীত্বা পরশুং ভর্তুঃ সকাশং পুনরাগমৎ
281.104
বামে স্কন্ধে তু বামোরূর্ভর্তুর্বাহুং নিবেশ্য সা
দক্ষিণেন পরিষ্বজ্য জগাম মৃদুগামিনী
281.105
সত্যবানুবাচ
অভ্যাসগমনাদ্ভীরু পন্থানো বিদিতা মম
বৃক্ষান্তরালোকিতয়া জ্যোত্স্নয়া চাপি লক্ষয়ে
281.106
আগতৌ স্বঃ পথা যেন ফলান্যবচিতানি চ
যথাগতং শুভে গচ্ছ পন্থানং মা বিচারয়
281.107
পলাশষণ্ডে চৈতস্মিন্পন্থা ব্যাবর্ততে দ্বিধা
তস্যোত্তরেণ যঃ পন্থাস্তেন গচ্ছ ত্বরস্ব চ
স্বস্থোঽস্মি বলবানস্মি দিদৃক্ষুঃ পিতরাবুভৌ
281.108
মার্কণ্ডেয় উবাচ
ব্রুবন্নেবং ত্বরায়ুক্তঃ স প্রায়াদাশ্রমং প্রতি