Utshovঅধ্যায় 280
280.1
মার্কণ্ডেয় উবাচ
ততঃ কালে বহুতিথে ব্যতিক্রান্তে কদাচন
প্রাপ্তঃ স কালো মর্তব্যং যত্র সত্যবতা নৃপ
280.2
গণয়ন্ত্যাশ্চ সাবিত্র্যা দিবসে দিবসে গতে
তদ্বাক্যং নারদেনোক্তং বর্ততে হৃদি নিত্যশঃ
280.3
চতুর্থেঽহনি মর্তব্যমিতি সংচিন্ত্য ভামিনী
ব্রতং ত্রিরাত্রমুদ্দিশ্য দিবারাত্রং স্থিতাভবৎ
280.4
তং শ্রুত্বা নিয়মং দুঃখং বধ্বা দুঃখান্বিতো নৃপঃ
উত্থায় বাক্যং সাবিত্রীমব্রবীত্পরিসান্ত্বয়ন্
280.5
অতিতীব্রোঽয়মারম্ভস্ত্বয়ারব্ধো নৃপাত্মজে
তিসৃণাং বসতীনাং হি স্থানং পরমদুষ্করম্
280.6
সাবিত্র্যুবাচ
ন কার্যস্তাত সংতাপঃ পারয়িষ্যাম্যহং ব্রতম্
ব্যবসায়কৃতং হীদং ব্যবসায়শ্চ কারণম্
280.7
দ্যুমত্সেন উবাচ
ব্রতং ভিন্ধীতি বক্তুং ত্বাং নাস্মি শক্তঃ কথংচন
পারয়স্বেতি বচনং যুক্তমস্মদ্বিধো বদেৎ
280.8
মার্কণ্ডেয় উবাচ
এবমুক্ত্বা দ্যুমত্সেনো বিররাম মহামনাঃ
তিষ্ঠন্তী চাপি সাবিত্রী কাষ্ঠভূতেব লক্ষ্যতে
280.9
শ্বোভূতে ভর্তৃমরণে সাবিত্র্যা ভরতর্ষভ
দুঃখান্বিতায়াস্তিষ্ঠন্ত্যাঃ সা রাত্রির্ব্যত্যবর্তত
280.10
অদ্য তদ্দিবসং চেতি হুত্বা দীপ্তং হুতাশনম্
যুগমাত্রোদিতে সূর্যে কৃত্বা পৌর্বাহ্ণিকীঃ ক্রিয়াঃ
280.11
ততঃ সর্বান্দ্বিজান্বৃদ্ধাঞ্শ্বশ্রূং শ্বশুরমেব চ
অভিবাদ্যানুপূর্ব্যেণ প্রাঞ্জলির্নিয়তা স্থিতা
280.12
অবৈধব্যাশিষস্তে তু সাবিত্র্যর্থং হিতাঃ শুভাঃ
ঊচুস্তপস্বিনঃ সর্বে তপোবননিবাসিনঃ
280.13
এবমস্ত্বিতি সাবিত্রী ধ্যানয়োগপরায়ণা
মনসা তা গিরঃ সর্বাঃ প্রত্যগৃহ্ণাত্তপস্বিনাম্
280.14
তং কালং চ মুহূর্তং চ প্রতীক্ষন্তী নৃপাত্মজা
যথোক্তং নারদবচশ্চিন্তয়ন্তী সুদুঃখিতা
280.15
ততস্তু শ্বশ্রূশ্বশুরাবূচতুস্তাং নৃপাত্মজাম্
একান্তস্থামিদং বাক্যং প্রীত্যা ভরতসত্তম
280.16
শ্বশুরাবূচতুঃ
ব্রতো যথোপদিষ্টোঽয়ং যথাবত্পারিতস্ত্বয়া
আহারকালঃ সংপ্রাপ্তঃ ক্রিয়তাং যদনন্তরম্
280.17
সাবিত্র্যুবাচ
অস্তং গতে ময়াদিত্যে ভোক্তব্যং কৃতকাময়া
এষ মে হৃদি সংকল্পঃ সময়শ্চ কৃতো ময়া
280.18
মার্কণ্ডেয় উবাচ
এবং সংভাষমাণায়াঃ সাবিত্র্যা ভোজনং প্রতি
স্কন্ধে পরশুমাদায় সত্যবান্প্রস্থিতো বনম্
280.19
সাবিত্রী ত্বাহ ভর্তারং নৈকস্ত্বং গন্তুমর্হসি
সহ ত্বয়াগমিষ্যামি ন হি ত্বাং হাতুমুত্সহে
280.20
সত্যবানুবাচ
বনং ন গতপূর্বং তে দুঃখঃ পন্থাশ্চ ভামিনি
ব্রতোপবাসক্ষামা চ কথং পদ্ভ্যাং গমিষ্যসি
280.21
সাবিত্র্যুবাচ
উপবাসান্ন মে গ্লানির্নাস্তি চাপি পরিশ্রমঃ
গমনে চ কৃতোত্সাহাং প্রতিষেদ্ধুং ন মার্হসি
280.22
সত্যবানুবাচ
যদি তে গমনোত্সাহঃ করিষ্যামি তব প্রিয়ম্
মম ত্বামন্ত্রয় গুরূন্ন মাং দোষঃ স্পৃশেদয়ম্
280.23
মার্কণ্ডেয় উবাচ
সাভিগম্যাব্রবীচ্ছ্বশ্রূং শ্বশুরং চ মহাব্রতা
অয়ং গচ্ছতি মে ভর্তা ফলাহারো মহাবনম্
280.24
ইচ্ছেয়মভ্যনুজ্ঞাতুমার্যয়া শ্বশুরেণ চ
অনেন সহ নির্গন্তুং ন হি মে বিরহঃ ক্ষমঃ
280.25
গুর্বগ্নিহোত্রার্থকৃতে প্রস্থিতশ্চ সুতস্তব
ন নিবার্যো নিবার্যঃ স্যাদন্যথা প্রস্থিতো বনম্
280.26
সংবত্সরঃ কিংচিদূনো ন নিষ্ক্রান্তাহমাশ্রমাৎ
বনং কুসুমিতং দ্রষ্টুং পরং কৌতূহলং হি মে
280.27
দ্যুমত্সেন উবাচ
যতঃ প্রভৃতি সাবিত্রী পিত্রা দত্তা স্নুষা মম
নানয়াভ্যর্থনায়ুক্তমুক্তপূর্বং স্মরাম্যহম্
280.28
তদেষা লভতাং কামং যথাভিলষিতং বধূঃ
অপ্রমাদশ্চ কর্তব্যঃ পুত্রি সত্যবতঃ পথি
280.29
মার্কণ্ডেয় উবাচ
উভাভ্যামভ্যনুজ্ঞাতা সা জগাম যশস্বিনী
সহ ভর্ত্রা হসন্তীব হৃদয়েন বিদূয়তা
280.30
সা বনানি বিচিত্রাণি রমণীয়ানি সর্বশঃ
ময়ূররবঘুষ্টানি দদর্শ বিপুলেক্ষণা
280.31
নদীঃ পুণ্যবহাশ্চৈব পুষ্পিতাংশ্চ নগোত্তমান্
সত্যবানাহ পশ্যেতি সাবিত্রীং মধুরাক্ষরম্
280.32
নিরীক্ষমাণা ভর্তারং সর্বাবস্থমনিন্দিতা
মৃতমেব হি তং মেনে কালে মুনিবচঃ স্মরন্
280.33
অনুবর্ততী তু ভর্তারং জগাম মৃদুগামিনী
দ্বিধেব হৃদয়ং কৃত্বা তং চ কালমবেক্ষতী