অধ্যায় 279

279.1

মার্কণ্ডেয় উবাচ
অথ কন্যাপ্রদানে স তমেবার্থং বিচিন্তয়ন্
সমানিন্যে চ তত্সর্বং ভাণ্ডং বৈবাহিকং নৃপঃ

ততো বৃদ্ধান্দ্বিজান্সর্বানৃত্বিজঃ সপুরোহিতান্
সমাহূয় তিথৌ পুণ্যে প্রয়য়ৌ সহ কন্যয়া

মেধ্যারণ্যং স গত্বা চ দ্যুমত্সেনাশ্রমং নৃপঃ
পদ্ভ্যামেব দ্বিজৈঃ সার্ধং রাজর্ষিং তমুপাগমৎ

তত্রাপশ্যন্মহাভাগং শালবৃক্ষমুপাশ্রিতম্
কৌশ্যাং বৃস্যাং সমাসীনং চক্ষুর্হীনং নৃপং তদা

স রাজা তস্য রাজর্ষেঃ কৃত্বা পূজাং যথার্হতঃ
বাচা সুনিয়তো ভূত্বা চকারাত্মনিবেদনম্

তস্যার্ঘ্যমাসনং চৈব গাং চাবেদ্য স ধর্মবিৎ
কিমাগমনমিত্যেবং রাজা রাজানমব্রবীৎ

তস্য সর্বমভিপ্রায়মিতিকর্তব্যতাং চ তাম্
সত্যবন্তং সমুদ্দিশ্য সর্বমেব ন্যবেদয়ৎ

অশ্বপতিরুবাচ
সাবিত্রী নাম রাজর্ষে কন্যেয়ং মম শোভনা
তাং স্বধর্মেণ ধর্মজ্ঞ স্নুষার্থে ত্বং গৃহাণ মে

দ্যুমত্সেন উবাচ
চ্যুতাঃ স্ম রাজ্যাদ্বনবাসমাশ্রিতা;শ্চরাম ধর্মং নিয়তাস্তপস্বিনঃ
কথং ত্বনর্হা বনবাসমাশ্রমে; সহিষ্যতে ক্লেশমিমং সুতা তব

অশ্বপতিরুবাচ
সুখং চ দুঃখং চ ভবাভবাত্মকং; যদা বিজানাতি সুতাহমেব চ
ন মদ্বিধে যুজ্যতি বাক্যমীদৃশং; বিনিশ্চয়েনাভিগতোঽস্মি তে নৃপ

আশাং নার্হসি মে হন্তুং সৌহৃদাত্প্রণয়েন চ
অভিতশ্চাগতং প্রেম্ণা প্রত্যাখ্যাতুং ন মার্হসি

অনুরূপো হি সংয়োগে ত্বং মমাহং তবাপি চ
স্নুষাং প্রতীচ্ছ মে কন্যাং ভার্যাং সত্যবতঃ সুতাম্

দ্যুমত্সেন উবাচ
পূর্বমেবাভিলষিতঃ সংবন্ধো মে ত্বয়া সহ
ভ্রষ্টরাজ্যস্ত্বহমিতি তত এতদ্বিচারিতম্

অভিপ্রায়স্ত্বয়ং যো মে পূর্বমেবাভিকাঙ্ক্ষিতঃ
স নির্বর্ততু মেঽদ্যৈব কাঙ্ক্ষিতো হ্যসি মেঽতিথিঃ

মার্কণ্ডেয় উবাচ
ততঃ সর্বান্সমানীয় দ্বিজানাশ্রমবাসিনঃ
যথাবিধি সমুদ্বাহং কারয়ামাসতুর্নৃপৌ

দত্ত্বা ত্বশ্বপতিঃ কন্যাং যথার্হং চ পরিচ্ছদম্
যয়ৌ স্বমেব ভবনং যুক্তঃ পরময়া মুদা

সত্যবানপি ভার্যাং তাং লব্ধ্বা সর্বগুণান্বিতাম্
মুমুদে সা চ তং লব্ধ্বা ভর্তারং মনসেপ্সিতম্

গতে পিতরি সর্বাণি সংন্যস্যাভরণানি সা
জগৃহে বল্কলান্যেব বস্ত্রং কাষায়মেব চ

পরিচারৈর্গুণৈশ্চৈব প্রশ্রয়েণ দমেন চ
সর্বকামক্রিয়াভিশ্চ সর্বেষাং তুষ্টিমাবহৎ

শ্বশ্রূং শরীরসত্কারৈঃ সর্বৈরাচ্ছাদনাদিভিঃ
শ্বশুরং দেবকার্যৈশ্চ বাচঃ সংয়মনেন চ

তথৈব প্রিয়বাদেন নৈপুণেন শমেন চ
রহশ্চৈবোপচারেণ ভর্তারং পর্যতোষয়ৎ

এবং তত্রাশ্রমে তেষাং তদা নিবসতাং সতাম্
কালস্তপস্যতাং কশ্চিদতিচক্রাম ভারত

সাবিত্র্যাস্তু শয়ানায়াস্তিষ্ঠন্ত্যাশ্চ দিবানিশম্
নারদেন যদুক্তং তদ্বাক্যং মনসি বর্ততে