Utshovঅধ্যায় 278
278.1
মার্কণ্ডেয় উবাচ
অথ মদ্রাধিপো রাজা নারদেন সমাগতঃ
উপবিষ্টঃ সভামধ্যে কথায়োগেন ভারত
278.2
ততোঽভিগম্য তীর্থানি সর্বাণ্যেবাশ্রমাংস্তথা
আজগাম পিতুর্বেশ্ম সাবিত্রী সহ মন্ত্রিভিঃ
278.3
নারদেন সহাসীনং দৃষ্ট্বা সা পিতরং শুভা
উভয়োরেব শিরসা চক্রে পাদাভিবন্দনম্
278.4
নারদ উবাচ
ক্ব গতাভূত্সুতেয়ং তে কুতশ্চৈবাগতা নৃপ
কিমর্থং যুবতীং ভর্ত্রে ন চৈনাং সংপ্রয়চ্ছসি
278.5
অশ্বপতিরুবাচ
কার্যেণ খল্বনেনৈব প্রেষিতাদ্যৈব চাগতা
তদস্যাঃ শৃণু দেবর্ষে ভর্তারং যোঽনয়া বৃতঃ
278.6
মার্কণ্ডেয় উবাচ
সা ব্রূহি বিস্তরেণেতি পিত্রা সংচোদিতা শুভা
দৈবতস্যেব বচনং প্রতিগৃহ্যেদমব্রবীৎ
278.7
আসীচ্ছাল্বেষু ধর্মাত্মা ক্ষত্রিয়ঃ পৃথিবীপতিঃ
দ্যুমত্সেন ইতি খ্যাতঃ পশ্চাদন্ধো বভূব হ
278.8
বিনষ্টচক্ষুষস্তস্য বালপুত্রস্য ধীমতঃ
সামীপ্যেন হৃতং রাজ্যং ছিদ্রেঽস্মিন্পূর্ববৈরিণা
278.9
স বালবত্সয়া সার্ধং ভার্যয়া প্রস্থিতো বনম্
মহারণ্যগতশ্চাপি তপস্তেপে মহাব্রতঃ
278.10
তস্য পুত্রঃ পুরে জাতঃ সংবৃদ্ধশ্চ তপোবনে
সত্যবাননুরূপো মে ভর্তেতি মনসা বৃতঃ
278.11
নারদ উবাচ
অহো বত মহত্পাপং সাবিত্র্যা নৃপতে কৃতম্
অজানন্ত্যা যদনয়া গুণবান্সত্যবান্বৃতঃ
278.12
সত্যং বদত্যস্য পিতা সত্যং মাতা প্রভাষতে
ততোঽস্য ব্রাহ্মণাশ্চক্রুর্নামৈতত্সত্যবানিতি
278.13
বালস্যাশ্বাঃ প্রিয়াশ্চাস্য করোত্যশ্বাংশ্চ মৃন্ময়ান্
চিত্রেঽপি চ লিখত্যশ্বাংশ্চিত্রাশ্ব ইতি চোচ্যতে
278.14
রাজোবাচ
অপীদানীং স তেজস্বী বুদ্ধিমান্বা নৃপাত্মজঃ
ক্ষমাবানপি বা শূরঃ সত্যবান্পিতৃনন্দনঃ
278.15
নারদ উবাচ
বিবস্বানিব তেজস্বী বৃহস্পতিসমো মতৌ
মহেন্দ্র ইব শূরশ্চ বসুধেব ক্ষমান্বিতঃ
278.16
অশ্বপতিরুবাচ
অপি রাজাত্মজো দাতা ব্রহ্মণ্যো বাপি সত্যবান্
রূপবানপ্যুদারো বাপ্যথ বা প্রিয়দর্শনঃ
278.17
নারদ উবাচ
সাঙ্কৃতে রন্তিদেবস্য স শক্ত্যা দানতঃ সমঃ
ব্রহ্মণ্যঃ সত্যবাদী চ শিবিরৌশীনরো যথা
278.18
যয়াতিরিব চোদারঃ সোমবত্প্রিয়দর্শনঃ
রূপেণান্যতমোঽশ্বিভ্যাং দ্যুমত্সেনসুতো বলী
278.19
স দান্তঃ স মৃদুঃ শূরঃ স সত্যঃ স জিতেন্দ্রিয়ঃ
স মৈত্রঃ সোঽনসূয়শ্চ স হ্রীমান্ধৃতিমাংশ্চ সঃ
278.20
নিত্যশশ্চার্জবং তস্মিন্স্থিতিস্তস্যৈব চ ধ্রুবা
সংক্ষেপতস্তপোবৃদ্ধৈঃ শীলবৃদ্ধৈশ্চ কথ্যতে
278.21
অশ্বপতিরুবাচ
গুণৈরুপেতং সর্বৈস্তং ভগবন্প্রব্রবীষি মে
দোষানপ্যস্য মে ব্রূহি যদি সন্তীহ কেচন
278.22
নারদ উবাচ
একো দোষোঽস্য নান্যোঽস্তি সোঽদ্য প্রভৃতি সত্যবান্
সংবত্সরেণ ক্ষীণায়ুর্দেহন্যাসং করিষ্যতি
278.23
রাজোবাচ
এহি সাবিত্রি গচ্ছ ত্বমন্যং বরয় শোভনে
তস্য দোষো মহানেকো গুণানাক্রম্য তিষ্ঠতি
278.24
যথা মে ভগবানাহ নারদো দেবসত্কৃতঃ
সংবত্সরেণ সোঽল্পায়ুর্দেহন্যাসং করিষ্যতি
278.25
সাবিত্র্যুবাচ
সকৃদংশো নিপততি সকৃত্কন্যা প্রদীয়তে
সকৃদাহ দদানীতি ত্রীণ্যেতানি সকৃত্সকৃৎ
278.26
দীর্ঘায়ুরথ বাল্পায়ুঃ সগুণো নির্গুণোঽপি বা
সকৃদ্বৃতো ময়া ভর্তা ন দ্বিতীয়ং বৃণোম্যহম্
278.27
মনসা নিশ্চয়ং কৃত্বা ততো বাচাভিধীয়তে
ক্রিয়তে কর্মণা পশ্চাত্প্রমাণং মে মনস্ততঃ
278.28
নারদ উবাচ
স্থিরা বুদ্ধির্নরশ্রেষ্ঠ সাবিত্র্যা দুহিতুস্তব
নৈষা চালয়িতুং শক্যা ধর্মাদস্মাত্কথংচন
278.29
নান্যস্মিন্পুরুষে সন্তি যে সত্যবতি বৈ গুণাঃ
প্রদানমেব তস্মান্মে রোচতে দুহিতুস্তব
278.30
রাজোবাচ
অবিচার্যমেতদুক্তং হি তথ্যং ভগবতা বচঃ
করিষ্যাম্যেতদেবং চ গুরুর্হি ভগবান্মম
278.31
নারদ উবাচ
অবিঘ্নমস্তু সাবিত্র্যাঃ প্রদানে দুহিতুস্তব
সাধয়িষ্যামহে তাবত্সর্বেষাং ভদ্রমস্তু বঃ
278.32
মার্কণ্ডেয় উবাচ
এবমুক্ত্বা খমুত্পত্য নারদস্ত্রিদিবং গতঃ
রাজাপি দুহিতুঃ সর্বং বৈবাহিকমকারয়ৎ