Utshovঅধ্যায় 277
277.1
যুধিষ্ঠির উবাচ
নাত্মানমনুশোচামি নেমান্ভ্রাতৄন্মহামুনে
হরণং চাপি রাজ্যস্য যথেমাং দ্রুপদাত্মজাম্
277.2
দ্যূতে দুরাত্মভিঃ ক্লিষ্টাঃ কৃষ্ণয়া তারিতা বয়ম্
জয়দ্রথেন চ পুনর্বনাদপহৃতা বলাৎ
277.3
অস্তি সীমন্তিনী কাচিদ্দৃষ্টপূর্বাথ বা শ্রুতা
পতিব্রতা মহাভাগা যথেয়ং দ্রুপদাত্মজা
277.4
মার্কণ্ডেয় উবাচ
শৃণু রাজন্কুলস্ত্রীণাং মহাভাগ্যং যুধিষ্ঠির
সর্বমেতদ্যথা প্রাপ্তং সাবিত্র্যা রাজকন্যয়া
277.5
আসীন্মদ্রেষু ধর্মাত্মা রাজা পরমধার্মিকঃ
ব্রহ্মণ্যশ্চ শরণ্যশ্চ সত্যসংধো জিতেন্দ্রিয়ঃ
277.6
যজ্বা দানপতির্দক্ষঃ পৌরজানপদপ্রিয়ঃ
পার্থিবোঽশ্বপতির্নাম সর্বভূতহিতে রতঃ
277.7
ক্ষমাবাননপত্যশ্চ সত্যবাগ্বিজিতেন্দ্রিয়ঃ
অতিক্রান্তেন বয়সা সংতাপমুপজগ্মিবান্
277.8
অপত্যোত্পাদনার্থং স তীব্রং নিয়মমাস্থিতঃ
কালে পরিমিতাহারো ব্রহ্মচারী জিতেন্দ্রিয়ঃ
277.9
হুত্বা শতসহস্রং স সাবিত্র্যা রাজসত্তম
ষষ্ঠে ষষ্ঠে তদা কালে বভূব মিতভোজনঃ
277.10
এতেন নিয়মেনাসীদ্বর্ষাণ্যষ্টাদশৈব তু
পূর্ণে ত্বষ্টাদশে বর্ষে সাবিত্রী তুষ্টিমভ্যগাৎ
স্বরূপিণী তদা রাজন্দর্শয়ামাস তং নৃপম্
277.11
অগ্নিহোত্রাত্সমুত্থায় হর্ষেণ মহতান্বিতা
উবাচ চৈনং বরদা বচনং পার্থিবং তদা
277.12
ব্রহ্মচর্যেণ শুদ্ধেন দমেন নিয়মেন চ
সর্বাত্মনা চ মদ্ভক্ত্যা তুষ্টাস্মি তব পার্থিব
277.13
বরং বৃণীষ্বাশ্বপতে মদ্ররাজ যথেপ্সিতম্
ন প্রমাদশ্চ ধর্মেষু কর্তব্যস্তে কথংচন
277.14
অশ্বপতিরুবাচ
অপত্যার্থঃ সমারম্ভঃ কৃতো ধর্মেপ্সয়া ময়া
পুত্রা মে বহবো দেবি ভবেয়ুঃ কুলভাবনাঃ
277.15
তুষ্টাসি যদি মে দেবি কামমেতং বৃণোম্যহম্
সংতানং হি পরো ধর্ম ইত্যাহুর্মাং দ্বিজাতয়ঃ
277.16
সাবিত্র্যুবাচ
পূর্বমেব ময়া রাজন্নভিপ্রায়মিমং তব
জ্ঞাত্বা পুত্রার্থমুক্তো বৈ তব হেতোঃ পিতামহঃ
277.17
প্রসাদাচ্চৈব তস্মাত্তে স্বয়ংভুবিহিতাদ্ভুবি
কন্যা তেজস্বিনী সৌম্য ক্ষিপ্রমেব ভবিষ্যতি
277.18
উত্তরং চ ন তে কিংচিদ্ব্যাহর্তব্যং কথংচন
পিতামহনিসর্গেণ তুষ্টা হ্যেতদ্ব্রবীমি তে
277.19
মার্কণ্ডেয় উবাচ
স তথেতি প্রতিজ্ঞায় সাবিত্র্যা বচনং নৃপঃ
প্রসাদয়ামাস পুনঃ ক্ষিপ্রমেবং ভবেদিতি
277.20
অন্তর্হিতায়াং সাবিত্র্যাং জগাম স্বগৃহং নৃপঃ
স্বরাজ্যে চাবসত্প্রীতঃ প্রজা ধর্মেণ পালয়ন্
277.21
কস্মিংশ্চিত্তু গতে কালে স রাজা নিয়তব্রতঃ
জ্যেষ্ঠায়াং ধর্মচারিণ্যাং মহিষ্যাং গর্ভমাদধে
277.22
রাজপুত্র্যাং তু গর্ভঃ স মালব্যাং ভরতর্ষভ
ব্যবর্ধত যথা শুক্লে তারাপতিরিবাম্বরে
277.23
প্রাপ্তে কালে তু সুষুবে কন্যাং রাজীবলোচনাম্
ক্রিয়াশ্চ তস্যা মুদিতশ্চক্রে স নৃপতিস্তদা
277.24
সাবিত্র্যা প্রীতয়া দত্তা সাবিত্র্যা হুতয়া হ্যপি
সাবিত্রীত্যেব নামাস্যাশ্চক্রুর্বিপ্রাস্তথা পিতা
277.25
সা বিগ্রহবতীব শ্রীর্ব্যবর্ধত নৃপাত্মজা
কালেন চাপি সা কন্যা যৌবনস্থা বভূব হ
277.26
তাং সুমধ্যাং পৃথুশ্রোণীং প্রতিমাং কাঞ্চনীমিব
প্রাপ্তেয়ং দেবকন্যেতি দৃষ্ট্বা সংমেনিরে জনাঃ
277.27
তাং তু পদ্মপলাশাক্ষীং জ্বলন্তীমিব তেজসা
ন কশ্চিদ্বরয়ামাস তেজসা প্রতিবারিতঃ
277.28
অথোপোষ্য শিরঃস্নাতা দৈবতান্যভিগম্য সা
হুত্বাগ্নিং বিধিবদ্বিপ্রান্বাচয়ামাস পর্বণি
277.29
ততঃ সুমনসঃ শেষাঃ প্রতিগৃহ্য মহাত্মনঃ
পিতুঃ সকাশমগমদ্দেবী শ্রীরিব রূপিণী
277.30
সাভিবাদ্য পিতুঃ পাদৌ শেষাঃ পূর্বং নিবেদ্য চ
কৃতাঞ্জলির্বরারোহা নৃপতেঃ পার্শ্বতঃ স্থিতা
277.31
যৌবনস্থাং তু তাং দৃষ্ট্বা স্বাং সুতাং দেবরূপিণীম্
অয়াচ্যমানাং চ বরৈর্নৃপতির্দুঃখিতোঽভবৎ
277.32
রাজোবাচ
পুত্রি প্রদানকালস্তে ন চ কশ্চিদ্বৃণোতি মাম্
স্বয়মন্বিচ্ছ ভর্তারং গুণৈঃ সদৃশমাত্মনঃ
277.33
প্রার্থিতঃ পুরুষো যশ্চ স নিবেদ্যস্ত্বয়া মম
বিমৃশ্যাহং প্রদাস্যামি বরয় ত্বং যথেপ্সিতম্
277.34
শ্রুতং হি ধর্মশাস্ত্রে মে পঠ্যমানং দ্বিজাতিভিঃ
তথা ত্বমপি কল্যাণি গদতো মে বচঃ শৃণু
277.35
অপ্রদাতা পিতা বাচ্যো বাচ্যশ্চানুপয়ন্পতিঃ
মৃতে ভর্তরি পুত্রশ্চ বাচ্যো মাতুররক্ষিতা
277.36
ইদং মে বচনং শ্রুত্বা ভর্তুরন্বেষণে ত্বর
দেবতানাং যথা বাচ্যো ন ভবেয়ং তথা কুরু
277.37
মার্কণ্ডেয় উবাচ
এবমুক্ত্বা দুহিতরং তথা বৃদ্ধাংশ্চ মন্ত্রিণঃ
ব্যাদিদেশানুয়াত্রং চ গম্যতামিত্যচোদয়ৎ
277.38
সাভিবাদ্য পিতুঃ পাদৌ ব্রীডিতেব মনস্বিনী
পিতুর্বচনমাজ্ঞায় নির্জগামাবিচারিতম্
277.39
সা হৈমং রথমাস্থায় স্থবিরৈঃ সচিবৈর্বৃতা
তপোবনানি রম্যাণি রাজর্ষীণাং জগাম হ
277.40
মান্যানাং তত্র বৃদ্ধানাং কৃত্বা পাদাভিবন্দনম্
বনানি ক্রমশস্তাত সর্বাণ্যেবাভ্যগচ্ছত
277.41
এবং সর্বেষু তীর্থেষু ধনোত্সর্গং নৃপাত্মজা
কুর্বতী দ্বিজমুখ্যানাং তং তং দেশং জগাম হ