অধ্যায় 276

276.1

মার্কণ্ডেয় উবাচ
এবমেতন্মহাবাহো রামেণামিততেজসা
প্রাপ্তং ব্যসনমত্যুগ্রং বনবাসকৃতং পুরা

মা শুচঃ পুরুষব্যাঘ্র ক্ষত্রিয়োঽসি পরংতপ
বাহুবীর্যাশ্রয়ে মার্গে বর্তসে দীপ্তনির্ণয়ে

ন হি তে বৃজিনং কিংচিদ্দৃশ্যতে পরমণ্বপি
অস্মিন্মার্গে বিষীদেয়ুঃ সেন্দ্রা অপি সুরাসুরাঃ

সংহত্য নিহতো বৃত্রো মরুদ্ভির্বজ্রপাণিনা
নমুচিশ্চৈব দুর্ধর্ষো দীর্ঘজিহ্বা চ রাক্ষসী

সহায়বতি সর্বার্থাঃ সংতিষ্ঠন্তীহ সর্বশঃ
কিং নু তস্যাজিতং সংখ্যে ভ্রাতা যস্য ধনংজয়ঃ

অয়ং চ বলিনাং শ্রেষ্ঠো ভীমো ভীমপরাক্রমঃ
যুবানৌ চ মহেষ্বাসৌ যমৌ মাদ্রবতীসুতৌ
এভিঃ সহায়ৈঃ কস্মাত্ত্বং বিষীদসি পরংতপ

য ইমে বজ্রিণঃ সেনাং জয়েয়ুঃ সমরুদ্গণাম্
ত্বমপ্যেভির্মহেষ্বাসৈঃ সহায়ৈর্দেবরূপিভিঃ
বিজেষ্যসি রণে সর্বানমিত্রান্ভরতর্ষভ

ইতশ্চ ত্বমিমাং পশ্য সৈন্ধবেন দুরাত্মনা
বলিনা বীর্যমত্তেন হৃতামেভির্মহাত্মভিঃ

আনীতাং দ্রৌপদীং কৃষ্ণাং কৃত্বা কর্ম সুদুষ্করম্
জয়দ্রথং চ রাজানং বিজিতং বশমাগতম্

অসহায়েন রামেণ বৈদেহী পুনরাহৃতা
হত্বা সংখ্যে দশগ্রীবং রাক্ষসং ভীমবিক্রমম্

যস্য শাখামৃগা মিত্রা ঋক্ষাঃ কালমুখাস্তথা
জাত্যন্তরগতা রাজন্নেতদ্বুদ্ধ্যানুচিন্তয়

তস্মাত্ত্বং কুরুশার্দূল মা শুচো ভরতর্ষভ
ত্বদ্বিধা হি মহাত্মানো ন শোচন্তি পরংতপ

বৈশংপায়ন উবাচ
এবমাশ্বাসিতো রাজা মার্কণ্ডেয়েন ধীমতা
ত্যক্ত্বা দুঃখমদীনাত্মা পুনরেবেদমব্রবীৎ