Utshovঅধ্যায় 275
275.1
মার্কণ্ডেয় উবাচ
স হত্বা রাবণং ক্ষুদ্রং রাক্ষসেন্দ্রং সুরদ্বিষম্
বভূব হৃষ্টঃ সসুহৃদ্রামঃ সৌমিত্রিণা সহ
275.2
ততো হতে দশগ্রীবে দেবাঃ সর্ষিপুরোগমাঃ
আশীর্ভির্জয়য়ুক্তাভিরানর্চুস্তং মহাভুজম্
275.3
রামং কমলপত্রাক্ষং তুষ্টুবুঃ সর্বদেবতাঃ
গন্ধর্বাঃ পুষ্পবর্ষৈশ্চ বাগ্ভিশ্চ ত্রিদশালয়াঃ
275.4
পূজয়িত্বা যথা রামং প্রতিজগ্মুর্যথাগতম্
তন্মহোত্সবসংকাশমাসীদাকাশমচ্যুত
275.5
ততো হত্বা দশগ্রীবং লঙ্কাং রামো মহায়শাঃ
বিভীষণায় প্রদদৌ প্রভুঃ পরপুরংজয়ঃ
275.6
ততঃ সীতাং পুরস্কৃত্য বিভীষণপুরস্কৃতাম্
অবিন্ধ্যো নাম সুপ্রজ্ঞো বৃদ্ধামাত্যো বিনির্যয়ৌ
275.7
উবাচ চ মহাত্মানং কাকুত্স্থং দৈন্যমাস্থিতম্
প্রতীচ্ছ দেবীং সদ্বৃত্তাং মহাত্মঞ্জানকীমিতি
275.8
এতচ্ছ্রুত্বা বচস্তস্মাদবতীর্য রথোত্তমাৎ
বাষ্পেণাপিহিতাং সীতাং দদর্শেক্ষ্বাকুনন্দনঃ
275.9
তাং দৃষ্ট্বা চারুসর্বাঙ্গীং যানস্থাং শোককর্শিতাম্
মলোপচিতসর্বাঙ্গীং জটিলাং কৃষ্ণবাসসম্
275.10
উবাচ রামো বৈদেহীং পরামর্শবিশঙ্কিতঃ
গচ্ছ বৈদেহি মুক্তা ত্বং যত্কার্যং তন্ময়া কৃতম্
275.11
মামাসাদ্য পতিং ভদ্রে ন ত্বং রাক্ষসবেশ্মনি
জরাং ব্রজেথা ইতি মে নিহতোঽসৌ নিশাচরঃ
275.12
কথং হ্যস্মদ্বিধো জাতু জানন্ধর্মবিনিশ্চয়ম্
পরহস্তগতাং নারীং মুহূর্তমপি ধারয়েৎ
275.13
সুবৃত্তামসুবৃত্তাং বাপ্যহং ত্বামদ্য মৈথিলি
নোত্সহে পরিভোগায় শ্বাবলীঢং হবির্যথা
275.14
ততঃ সা সহসা বালা তচ্ছ্রুত্বা দারুণং বচঃ
পপাত দেবী ব্যথিতা নিকৃত্তা কদলী যথা
275.15
যো হ্যস্যা হর্ষসংভূতো মুখরাগস্তদাভবৎ
ক্ষণেন স পুনর্ভ্রষ্টো নিঃশ্বাসাদিব দর্পণে
275.16
ততস্তে হরয়ঃ সর্বে তচ্ছ্রুত্বা রামভাষিতম্
গতাসুকল্পা নিশ্চেষ্টা বভূবুঃ সহলক্ষ্মণাঃ
275.17
ততো দেবো বিশুদ্ধাত্মা বিমানেন চতুর্মুখঃ
পিতামহো জগত্স্রষ্টা দর্শয়ামাস রাঘবম্
275.18
শক্রশ্চাগ্নিশ্চ বায়ুশ্চ যমো বরুণ এব চ
যক্ষাধিপশ্চ ভগবাংস্তথা সপ্তর্ষয়োঽমলাঃ
275.19
রাজা দশরথশ্চৈব দিব্যভাস্বরমূর্তিমান্
বিমানেন মহার্হেণ হংসয়ুক্তেন ভাস্বতা
275.20
ততোঽন্তরিক্ষং তত্সর্বং দেবগন্ধর্বসংকুলম্
শুশুভে তারকাচিত্রং শরদীব নভস্তলম্
275.21
তত উত্থায় বৈদেহি তেষাং মধ্যে যশস্বিনী
উবাচ বাক্যং কল্যাণী রামং পৃথুলবক্ষসম্
275.22
রাজপুত্র ন তে কোপং করোমি বিদিতা হি মে
গতিঃ স্ত্রীণাং নরাণাং চ শৃণু চেদং বচো মম
275.23
অন্তশ্চরতি ভূতানাং মাতরিশ্বা সদাগতিঃ
স মে বিমুঞ্চতু প্রাণান্যদি পাপং চরাম্যহম্
275.24
অগ্নিরাপস্তথাকাশং পৃথিবী বায়ুরেব চ
বিমুঞ্চন্তু মম প্রাণান্যদি পাপং চরাম্যহম্
275.25
ততোঽন্তরিক্ষে বাগাসীত্সর্বা বিশ্রাবয়ন্দিশঃ
পুণ্যা সংহর্ষণী তেষাং বানরাণাং মহাত্মনাম্
275.26
বায়ুরুবাচ
ভো ভো রাঘব সত্যং বৈ বায়ুরস্মি সদাগতিঃ
অপাপা মৈথিলী রাজন্সংগচ্ছ সহ ভার্যয়া
275.27
অগ্নিরুবাচ
অহমন্তঃশরীরস্থো ভূতানাং রঘুনন্দন
সুসূক্ষ্মমপি কাকুত্স্থ মৈথিলী নাপরাধ্যতি
275.28
বরুণ উবাচ
রসা বৈ মত্প্রসূতা হি ভূতদেহেষু রাঘব
অহং বৈ ত্বাং প্রব্রবীমি মৈথিলী প্রতিগৃহ্যতাম্
275.29
ব্রহ্মোবাচ
পুত্র নৈতদিহাশ্চর্যং ত্বয়ি রাজর্ষিধর্মিণি
সাধো সদ্বৃত্তমার্গস্থে শৃণু চেদং বচো মম
275.30
শত্রুরেষ ত্বয়া বীর দেবগন্ধর্বভোগিনাম্
যক্ষাণাং দানবানাং চ মহর্ষীণাং চ পাতিতঃ
275.31
অবধ্যঃ সর্বভূতানাং মত্প্রসাদাত্পুরাভবৎ
কস্মাচ্চিত্কারণাত্পাপঃ কংচিত্কালমুপেক্ষিতঃ
275.32
বধার্থমাত্মনস্তেন হৃতা সীতা দুরাত্মনা
নলকূবরশাপেন রক্ষা চাস্যাঃ কৃতা ময়া
275.33
যদি হ্যকামামাসেবেত্স্ত্রিয়মন্যামপি ধ্রুবম্
শতধাস্য ফলেদ্দেহ ইত্যুক্তঃ সোঽভবত্পুরা
275.34
নাত্র শঙ্কা ত্বয়া কার্যা প্রতীচ্ছেমাং মহাদ্যুতে
কৃতং ত্বয়া মহত্কার্যং দেবানামমরপ্রভ
275.35
দশরথ উবাচ
প্রীতোঽস্মি বত্স ভদ্রং তে পিতা দশরথোঽস্মি তে
অনুজানামি রাজ্যং চ প্রশাধি পুরুষোত্তম
275.36
রাম উবাচ
অভিবাদয়ে ত্বাং রাজেন্দ্র যদি ত্বং জনকো মম
গমিষ্যামি পুরীং রম্যাময়োধ্যাং শাসনাত্তব
275.37
মার্কণ্ডেয় উবাচ
তমুবাচ পিতা ভূয়ঃ প্রহৃষ্টো মনুজাধিপ
গচ্ছায়োধ্যাং প্রশাধি ত্বং রাম রক্তান্তলোচন
275.38
ততো দেবান্নমস্কৃত্য সুহৃদ্ভিরভিনন্দিতঃ
মহেন্দ্র ইব পৌলোম্যা ভার্যয়া স সমেয়িবান্
275.39
ততো বরং দদৌ তস্মৈ অবিন্ধ্যায় পরংতপঃ
ত্রিজটাং চার্থমানাভ্যাং যোজয়ামাস রাক্ষসীম্
275.40
তমুবাচ ততো ব্রহ্মা দেবৈঃ শক্রমুখৈর্বৃতঃ
কৌসল্যামাতরিষ্টাংস্তে বরানদ্য দদানি কান্
275.41
বব্রে রামঃ স্থিতিং ধর্মে শত্রুভিশ্চাপরাজয়ম্
রাক্ষসৈর্নিহতানাং চ বানরাণাং সমুদ্ভবম্
275.42
ততস্তে ব্রহ্মণা প্রোক্তে তথেতি বচনে তদা
সমুত্তস্থুর্মহারাজ বানরা লব্ধচেতসঃ
275.43
সীতা চাপি মহাভাগা বরং হনুমতে দদৌ
রামকীর্ত্যা সমং পুত্র জীবিতং তে ভবিষ্যতি
275.44
দিব্যাস্ত্বামুপভোগাশ্চ মত্প্রসাদকৃতাঃ সদা
উপস্থাস্যন্তি হনুমন্নিতি স্ম হরিলোচন
275.45
ততস্তে প্রেক্ষমাণানাং তেষামক্লিষ্টকর্মণাম্
অন্তর্ধানং যয়ুর্দেবাঃ সর্বে শক্রপুরোগমাঃ
275.46
দৃষ্ট্বা তু রামং জানক্যা সমেতং শক্রসারথিঃ
উবাচ পরমপ্রীতঃ সুহৃন্মধ্য ইদং বচঃ
275.47
দেবগন্ধর্বয়ক্ষাণাং মানুষাসুরভোগিনাম্
অপনীতং ত্বয়া দুঃখমিদং সত্যপরাক্রম
275.48
সদেবাসুরগন্ধর্বা যক্ষরাক্ষসপন্নগাঃ
কথয়িষ্যন্তি লোকাস্ত্বাং যাবদ্ভূমির্ধরিষ্যতি
275.49
ইত্যেবমুক্ত্বানুজ্ঞাপ্য রামং শস্ত্রভৃতাং বরম্
সংপূজ্যাপাক্রমত্তেন রথেনাদিত্যবর্চসা
275.50
ততঃ সীতাং পুরস্কৃত্য রামঃ সৌমিত্রিণা সহ
সুগ্রীবপ্রমুখৈশ্চৈব সহিতঃ সর্ববানরৈঃ
275.51
বিধায় রক্ষাং লঙ্কায়াং বিভীষণপুরস্কৃতঃ
সংততার পুনস্তেন সেতুনা মকরালয়ম্
275.52
পুষ্পকেণ বিমানেন খেচরেণ বিরাজতা
কামগেন যথা মুখ্যৈরমাত্যৈঃ সংবৃতো বশী
275.53
ততস্তীরে সমুদ্রস্য যত্র শিশ্যে স পার্থিবঃ
তত্রৈবোবাস ধর্মাত্মা সহিতঃ সর্ববানরৈঃ
275.54
অথৈনান্রাঘবঃ কালে সমানীয়াভিপূজ্য চ
বিসর্জয়ামাস তদা রত্নৈঃ সংতোষ্য সর্বশঃ
275.55
গতেষু বানরেন্দ্রেষু গোপুচ্ছর্ক্ষেষু তেষু চ
সুগ্রীবসহিতো রামঃ কিষ্কিন্ধাং পুনরাগমৎ
275.56
বিভীষণেনানুগতঃ সুগ্রীবসহিতস্তদা
পুষ্পকেণ বিমানেন বৈদেহ্যা দর্শয়ন্বনম্
275.57
কিষ্কিন্ধাং তু সমাসাদ্য রামঃ প্রহরতাং বরঃ
অঙ্গদং কৃতকর্মাণং যৌবরাজ্যেঽভ্যষেচয়ৎ
275.58
ততস্তৈরেব সহিতো রামঃ সৌমিত্রিণা সহ
যথাগতেন মার্গেণ প্রয়য়ৌ স্বপুরং প্রতি
275.59
অয়োধ্যাং স সমাসাদ্য পুরীং রাষ্ট্রপতিস্ততঃ
ভরতায় হনূমন্তং দূতং প্রস্থাপয়ত্তদা
275.60
লক্ষয়িত্বেঙ্গিতং সর্বং প্রিয়ং তস্মৈ নিবেদ্য চ
বায়ুপুত্রে পুনঃ প্রাপ্তে নন্দিগ্রামমুপাগমৎ
275.61
স তত্র মলদিগ্ধাঙ্গং ভরতং চীরবাসসম্
অগ্রতঃ পাদুকে কৃত্বা দদর্শাসীনমাসনে
275.62
সমেত্য ভরতেনাথ শত্রুঘ্নেন চ বীর্যবান্
রাঘবঃ সহসৌমিত্রির্মুমুদে ভরতর্ষভ
275.63
তথা ভরতশত্রুঘ্নৌ সমেতৌ গুরুণা তদা
বৈদেহ্যা দর্শনেনোভৌ প্রহর্ষং সমবাপতুঃ
275.64
তস্মৈ তদ্ভরতো রাজ্যমাগতায়াভিসত্কৃতম্
ন্যাসং নির্যাতয়ামাস যুক্তঃ পরময়া মুদা
275.65
ততস্তং বৈষ্ণবে শূরং নক্ষত্রেঽভিমতেঽহনি
বসিষ্ঠো বামদেবশ্চ সহিতাবভ্যষিঞ্চতাম্
275.66
সোঽভিষিক্তঃ কপিশ্রেষ্ঠং সুগ্রীবং সসুহৃজ্জনম্
বিভীষণং চ পৌলস্ত্যমন্বজানাদ্গৃহান্প্রতি
275.67
অভ্যর্চ্য বিবিধৈ রত্নৈঃ প্রীতিয়ুক্তৌ মুদা যুতৌ
সমাধায়েতিকর্তব্যং দুঃখেন বিসসর্জ হ
275.68
পুষ্পকং চ বিমানং তত্পূজয়িত্বা স রাঘবঃ
প্রাদাদ্বৈশ্রবণায়ৈব প্রীত্যা স রঘুনন্দনঃ
275.69
ততো দেবর্ষিসহিতঃ সরিতং গোমতীমনু
দশাশ্বমেধানাজহ্রে জারূথ্যান্স নিরর্গলান্