Utshovঅধ্যায় 274
274.1
মার্কণ্ডেয় উবাচ
ততঃ ক্রুদ্ধো দশগ্রীবঃ প্রিয়ে পুত্রে নিপাতিতে
নির্যয়ৌ রথমাস্থায় হেমরত্নবিভূষিতম্
274.2
সংবৃতো রাক্ষসৈর্ঘোরৈর্বিবিধায়ুধপাণিভিঃ
অভিদুদ্রাব রামং স পোথয়ন্হরিয়ূথপান্
274.3
তমাদ্রবন্তং সংক্রুদ্ধং মৈন্দনীলনলাঙ্গদাঃ
হনূমাঞ্জাম্ববাংশ্চৈব সসৈন্যাঃ পর্যবারয়ন্
274.4
তে দশগ্রীবসৈন্যং তদৃক্ষবানরয়ূথপাঃ
দ্রুমৈর্বিধ্বংসয়াং চক্রুর্দশগ্রীবস্য পশ্যতঃ
274.5
ততঃ স্বসৈন্যমালোক্য বধ্যমানমরাতিভিঃ
মায়াবী ব্যদধান্মায়াং রাবণো রাক্ষসেশ্বরঃ
274.6
তস্য দেহাদ্বিনিষ্ক্রান্তাঃ শতশোঽথ সহস্রশঃ
রাক্ষসাঃ প্রত্যদৃশ্যন্ত শরশক্ত্যৃষ্টিপাণয়ঃ
274.7
তান্রামো জঘ্নিবান্সর্বান্দিব্যেনাস্ত্রেণ রাক্ষসান্
অথ ভূয়োঽপি মায়াং স ব্যদধাদ্রাক্ষসাধিপঃ
274.8
কৃত্বা রামস্য রূপাণি লক্ষ্মণস্য চ ভারত
অভিদুদ্রাব রামং চ লক্ষ্মণং চ দশাননঃ
274.9
ততস্তে রামমর্ছন্তো লক্ষ্মণং চ ক্ষপাচরাঃ
অভিপেতুস্তদা রাজন্প্রগৃহীতোচ্চকার্মুকাঃ
274.10
তাং দৃষ্ট্বা রাক্ষসেন্দ্রস্য মায়ামিক্ষ্বাকুনন্দনঃ
উবাচ রামং সৌমিত্রিরসংভ্রান্তো বৃহদ্বচঃ
274.11
জহীমান্রাক্ষসান্পাপানাত্মনঃ প্রতিরূপকান্
জঘান রামস্তাংশ্চান্যানাত্মনঃ প্রতিরূপকান্
274.12
ততো হর্যশ্বয়ুক্তেন রথেনাদিত্যবর্চসা
উপতস্থে রণে রামং মাতলিঃ শক্রসারথিঃ
274.13
মাতলিরুবাচ
অয়ং হর্যশ্বয়ুগ্জৈত্রো মঘোনঃ স্যন্দনোত্তমঃ
অনেন শক্রঃ কাকুত্স্থ সমরে দৈত্যদানবান্
শতশঃ পুরুষব্যাঘ্র রথোদারেণ জঘ্নিবান্
274.14
তদনেন নরব্যাঘ্র ময়া যত্তেন সংয়ুগে
স্যন্দনেন জহি ক্ষিপ্রং রাবণং মা চিরং কৃথাঃ
274.15
ইত্যুক্তো রাঘবস্তথ্যং বচোঽশঙ্কত মাতলেঃ
মায়েয়ং রাক্ষসস্যেতি তমুবাচ বিভীষণঃ
274.16
নেয়ং মায়া নরব্যাঘ্র রাবণস্য দুরাত্মনঃ
তদাতিষ্ঠ রথং শীঘ্রমিমমৈন্দ্রং মহাদ্যুতে
274.17
ততঃ প্রহৃষ্টঃ কাকুত্স্থস্তথেত্যুক্ত্বা বিভীষণম্
রথেনাভিপপাতাশু দশগ্রীবং রুষান্বিতঃ
274.18
হাহাকৃতানি ভূতানি রাবণে সমভিদ্রুতে
সিংহনাদাঃ সপটহা দিবি দিব্যাশ্চ নানদন্
274.19
স রামায় মহাঘোরং বিসসর্জ নিশাচরঃ
শূলমিন্দ্রাশনিপ্রখ্যং ব্রহ্মদণ্ডমিবোদ্যতম্
274.20
তচ্ছূলমন্তরা রামশ্চিচ্ছেদ নিশিতৈঃ শরৈঃ
তদ্দৃষ্ট্বা দুষ্করং কর্ম রাবণং ভয়মাবিশৎ
274.21
ততঃ ক্রুদ্ধঃ সসর্জাশু দশগ্রীবঃ শিতাঞ্শরান্
সহস্রায়ুতশো রামে শস্ত্রাণি বিবিধানি চ
274.22
ততো ভুশুণ্ডীঃ শূলাংশ্চ মুসলানি পরশ্বধান্
শক্তীশ্চ বিবিধাকারাঃ শতঘ্নীশ্চ শিতক্ষুরাঃ
274.23
তাং মায়াং বিকৃতাং দৃষ্ট্বা দশগ্রীবস্য রক্ষসঃ
ভয়াত্প্রদুদ্রুবুঃ সর্বে বানরাঃ সর্বতোদিশম্
274.24
ততঃ সুপত্রং সুমুখং হেমপুঙ্খং শরোত্তমম্
তূণাদাদায় কাকুত্স্থো ব্রহ্মাস্ত্রেণ যুয়োজ হ
274.25
তং বাণবর্যং রামেণ ব্রহ্মাস্ত্রেণাভিমন্ত্রিতম্
জহৃষুর্দেবগন্ধর্বা দৃষ্ট্বা শক্রপুরোগমাঃ
274.26
অল্পাবশেষমায়ুশ্চ ততোঽমন্যন্ত রক্ষসঃ
ব্রহ্মাস্ত্রোদীরণাচ্ছত্রোর্দেবগন্ধর্বকিংনরাঃ
274.27
ততঃ সসর্জ তং রামঃ শরমপ্রতিমৌজসম্
রাবণান্তকরং ঘোরং ব্রহ্মদণ্ডমিবোদ্যতম্
274.28
স তেন রাক্ষসশ্রেষ্ঠঃ সরথঃ সাশ্বসারথিঃ
প্রজজ্বাল মহাজ্বালেনাগ্নিনাভিপরিষ্কৃতঃ
274.29
ততঃ প্রহৃষ্টাস্ত্রিদশাঃ সগন্ধর্বাঃ সচারণাঃ
নিহতং রাবণং দৃষ্ট্বা রামেণাক্লিষ্টকর্মণা
274.30
তত্যজুস্তং মহাভাগং পঞ্চ ভূতানি রাবণম্
ভ্রংশিতঃ সর্বলোকেষু স হি ব্রহ্মাস্ত্রতেজসা
274.31
শরীরধাতবো হ্যস্য মাংসং রুধিরমেব চ
নেশুর্ব্রহ্মাস্ত্রনির্দগ্ধা ন চ ভস্মাপ্যদৃশ্যত