Utshovঅধ্যায় 273
273.1
মার্কণ্ডেয় উবাচ
তাবুভৌ পতিতৌ দৃষ্ট্বা ভ্রাতরাবমিতৌজসৌ
ববন্ধ রাবণির্ভূয়ঃ শরৈর্দত্তবরৈস্তদা
273.2
তৌ বীরৌ শরজালেন বদ্ধাবিন্দ্রজিতা রণে
রেজতুঃ পুরুষব্যাঘ্রৌ শকুন্তাবিব পঞ্জরে
273.3
তৌ দৃষ্ট্বা পতিতৌ ভূমৌ শতশঃ সায়কৈশ্চিতৌ
সুগ্রীবঃ কপিভিঃ সার্ধং পরিবার্য ততঃ স্থিতঃ
273.4
সুষেণমৈন্দদ্বিবিদৈঃ কুমুদেনাঙ্গদেন চ
হনূমন্নীলতারৈশ্চ নলেন চ কপীশ্বরঃ
273.5
ততস্তং দেশমাগম্য কৃতকর্মা বিভীষণঃ
বোধয়ামাস তৌ বীরৌ প্রজ্ঞাস্ত্রেণ প্রবোধিতৌ
273.6
বিশল্যৌ চাপি সুগ্রীবঃ ক্ষণেনোভৌ চকার তৌ
বিশল্যয়া মহৌষধ্যা দিব্যমন্ত্রপ্রয়ুক্তয়া
273.7
তৌ লব্ধসংজ্ঞৌ নৃবরৌ বিশল্যাবুদতিষ্ঠতাম্
গততন্দ্রীক্লমৌ চাস্তাং ক্ষণেনোভৌ মহারথৌ
273.8
ততো বিভীষণঃ পার্থ রামমিক্ষ্বাকুনন্দনম্
উবাচ বিজ্বরং দৃষ্ট্বা কৃতাঞ্জলিরিদং বচঃ
273.9
অয়মম্ভো গৃহীত্বা তু রাজরাজস্য শাসনাৎ
গুহ্যকোঽভ্যাগতঃ শ্বেতাত্ত্বত্সকাশমরিংদম
273.10
ইদমম্ভঃ কুবেরস্তে মহারাজঃ প্রয়চ্ছতি
অন্তর্হিতানাং ভূতানাং দর্শনার্থং পরংতপ
273.11
অনেন স্পৃষ্টনয়নো ভূতান্যন্তর্হিতান্যুত
ভবান্দ্রক্ষ্যতি যস্মৈ চ ভবানেতত্প্রদাস্যতি
273.12
তথেতি রামস্তদ্বারি প্রতিগৃহ্যাথ সত্কৃতম্
চকার নেত্রয়োঃ শৌচং লক্ষ্মণশ্চ মহামনাঃ
273.13
সুগ্রীবজাম্ববন্তৌ চ হনূমানঙ্গদস্তথা
মৈন্দদ্বিবিদনীলাশ্চ প্রায়ঃ প্লবগসত্তমাঃ
273.14
তথা সমভবচ্চাপি যদুবাচ বিভীষণঃ
ক্ষণেনাতীন্দ্রিয়াণ্যেষাং চক্ষূংষ্যাসন্যুধিষ্ঠির
273.15
ইন্দ্রজিত্কৃতকর্মা তু পিত্রে কর্ম তদাত্মনঃ
নিবেদ্য পুনরাগচ্ছত্ত্বরয়াজিশিরঃ প্রতি
273.16
তমাপতন্তং সংক্রুদ্ধং পুনরেব যুয়ুত্সয়া
অভিদুদ্রাব সৌমিত্রির্বিভীষণমতে স্থিতঃ
273.17
অকৃতাহ্নিকমেবৈনং জিঘাংসুর্জিতকাশিনম্
শরৈর্জঘান সংক্রুদ্ধঃ কৃতসংজ্ঞোঽথ লক্ষ্মণঃ
273.18
তয়োঃ সমভবদ্যুদ্ধং তদান্যোন্যং জিগীষতোঃ
অতীব চিত্রমাশ্চর্যং শক্রপ্রহ্লাদয়োরিব
273.19
অবিধ্যদিন্দ্রজিত্তীক্ষ্ণৈঃ সৌমিত্রিং মর্মভেদিভিঃ
সৌমিত্রিশ্চানলস্পর্শৈরবিধ্যদ্রাবণিং শরৈঃ
273.20
সৌমিত্রিশরসংস্পর্শাদ্রাবণিঃ ক্রোধমূর্ছিতঃ
অসৃজল্লক্ষ্মণায়াষ্টৌ শরানাশীবিষোপমান্
273.21
তস্যাসূন্পাবকস্পর্শৈঃ সৌমিত্রিঃ পত্রিভিস্ত্রিভিঃ
যথা নিরহরদ্বীরস্তন্মে নিগদতঃ শৃণু
273.22
একেনাস্য ধনুষ্মন্তং বাহুং দেহাদপাতয়ৎ
দ্বিতীয়েন সনারাচং ভুজং ভূমৌ ন্যপাতয়ৎ
273.23
তৃতীয়েন তু বাণেন পৃথুধারেণ ভাস্বতা
জহার সুনসং চারু শিরো ভ্রাজিষ্ণুকুণ্ডলম্
273.24
বিনিকৃত্তভুজস্কন্ধং কবন্ধং ভীমদর্শনম্
তং হত্বা সূতমপ্যস্ত্রৈর্জঘান বলিনাং বরঃ
273.25
লঙ্কাং প্রবেশয়ামাসুর্বাজিনস্তং রথং তদা
দদর্শ রাবণস্তং চ রথং পুত্রবিনাকৃতম্
273.26
স পুত্রং নিহতং দৃষ্ট্বা ত্রাসাত্সংভ্রান্তলোচনঃ
রাবণঃ শোকমোহার্তো বৈদেহীং হন্তুমুদ্যতঃ
273.27
অশোকবনিকাস্থাং তাং রামদর্শনলালসাম্
খড্গমাদায় দুষ্টাত্মা জবেনাভিপপাত হ
273.28
তং দৃষ্ট্বা তস্য দুর্বুদ্ধেরবিন্ধ্যঃ পাপনিশ্চয়ম্
শময়ামাস সংক্রুদ্ধং শ্রূয়তাং যেন হেতুনা
273.29
মহারাজ্যে স্থিতো দীপ্তে ন স্ত্রিয়ং হন্তুমর্হসি
হতৈবৈষা যদা স্ত্রী চ বন্ধনস্থা চ তে গৃহে
273.30
ন চৈষা দেহভেদেন হতা স্যাদিতি মে মতিঃ
জহি ভর্তারমেবাস্যা হতে তস্মিন্হতা ভবেৎ
273.31
ন হি তে বিক্রমে তুল্যঃ সাক্ষাদপি শতক্রতুঃ
অসকৃদ্ধি ত্বয়া সেন্দ্রাস্ত্রাসিতাস্ত্রিদশা যুধি
273.32
এবং বহুবিধৈর্বাক্যৈরবিন্ধ্যো রাবণং তদা
ক্রুদ্ধং সংশময়ামাস জগৃহে চ স তদ্বচঃ
273.33
নির্যাণে স মতিং কৃত্বা নিধায়াসিং ক্ষপাচরঃ
আজ্ঞাপয়ামাস তদা রথো মে কল্প্যতামিতি