Utshovঅধ্যায় 272
272.1
মার্কণ্ডেয় উবাচ
ততঃ শ্রুত্বা হতং সংখ্যে কুম্ভকর্ণং সহানুগম্
প্রহস্তং চ মহেষ্বাসং ধূম্রাক্ষং চাতিতেজসম্
272.2
পুত্রমিন্দ্রজিতং শূরং রাবণঃ প্রত্যভাষত
জহি রামমমিত্রঘ্ন সুগ্রীবং চ সলক্ষ্মণম্
272.3
ত্বয়া হি মম সত্পুত্র যশো দীপ্তমুপার্জিতম্
জিত্বা বজ্রধরং সংখ্যে সহস্রাক্ষং শচীপতিম্
272.4
অন্তর্হিতঃ প্রকাশো বা দিব্যৈর্দত্তবরৈঃ শরৈঃ
জহি শত্রূনমিত্রঘ্ন মম শস্ত্রভৃতাং বর
272.5
রামলক্ষ্মণসুগ্রীবাঃ শরস্পর্শং ন তেঽনঘ
সমর্থাঃ প্রতিসংসোঢুং কুতস্তদনুয়ায়িনঃ
272.6
অকৃতা যা প্রহস্তেন কুম্ভকর্ণেন চানঘ
খরস্যাপচিতিঃ সংখ্যে তাং গচ্ছস্ব মহাভুজ
272.7
ত্বমদ্য নিশিতৈর্বাণৈর্হত্বা শত্রূন্সসৈনিকান্
প্রতিনন্দয় মাং পুত্র পুরা বদ্ধ্বেব বাসবম্
272.8
ইত্যুক্তঃ স তথেত্যুক্ত্বা রথমাস্থায় দংশিতঃ
প্রয়য়াবিন্দ্রজিদ্রাজংস্তূর্ণমায়োধনং প্রতি
272.9
তত্র বিশ্রাব্য বিস্পষ্টং নাম রাক্ষসপুংগবঃ
আহ্বয়ামাস সমরে লক্ষ্মণং শুভলক্ষণম্
272.10
তং লক্ষ্মণোঽপ্যভ্যধাবত্প্রগৃহ্য সশরং ধনুঃ
ত্রাসয়ংস্তলঘোষেণ সিংহঃ ক্ষুদ্রমৃগং যথা
272.11
তয়োঃ সমভবদ্যুদ্ধং সুমহজ্জয়গৃদ্ধিনোঃ
দিব্যাস্ত্রবিদুষোস্তীব্রমন্যোন্যস্পর্ধিনোস্তদা
272.12
রাবণিস্তু যদা নৈনং বিশেষয়তি সায়কৈঃ
ততো গুরুতরং যত্নমাতিষ্ঠদ্বলিনাং বরঃ
272.13
তত এনং মহাবেগৈরর্দয়ামাস তোমরৈঃ
তানাগতান্স চিচ্ছেদ সৌমিত্রির্নিশিতৈঃ শরৈঃ
তে নিকৃত্তাঃ শরৈস্তীক্ষ্ণৈর্ন্যপতন্বসুধাতলে
272.14
তমঙ্গদো বালিসুতঃ শ্রীমানুদ্যম্য পাদপম্
অভিদ্রুত্য মহাবেগস্তাডয়ামাস মূর্ধনি
272.15
তস্যেন্দ্রজিদসংভ্রান্তঃ প্রাসেনোরসি বীর্যবান্
প্রহর্তুমৈচ্ছত্তং চাস্য প্রাসং চিচ্ছেদ লক্ষ্মণঃ
272.16
তমভ্যাশগতং বীরমঙ্গদং রাবণাত্মজঃ
গদয়াতাডয়ত্সব্যে পার্শ্বে বানরপুংগবম্
272.17
তমচিন্ত্য প্রহারং স বলবান্বালিনঃ সুতঃ
সসর্জেন্দ্রজিতঃ ক্রোধাচ্ছালস্কন্ধমমিত্রজিৎ
272.18
সোঽঙ্গদেন রুষোত্সৃষ্টো বধায়েন্দ্রজিতস্তরুঃ
জঘানেন্দ্রজিতঃ পার্থ রথং সাশ্বং সসারথিম্
272.19
ততো হতাশ্বাত্প্রস্কন্দ্য রথাত্স হতসারথিঃ
তত্রৈবান্তর্দধে রাজন্মায়য়া রাবণাত্মজঃ
272.20
অন্তর্হিতং বিদিত্বা তং বহুমায়ং চ রাক্ষসম্
রামস্তং দেশমাগম্য তত্সৈন্যং পর্যরক্ষত
272.21
স রামমুদ্দিশ্য শরৈস্ততো দত্তবরৈস্তদা
বিব্যাধ সর্বগাত্রেষু লক্ষ্মণং চ মহারথম্
272.22
তমদৃশ্যং শরৈঃ শূরৌ মায়য়ান্তর্হিতং তদা
যোধয়ামাসতুরুভৌ রাবণিং রামলক্ষ্মণৌ
272.23
স রুষা সর্বগাত্রেষু তয়োঃ পুরুষসিংহয়োঃ
ব্যসৃজত্সায়কান্ভূয়ঃ শতশোঽথ সহস্রশঃ
272.24
তমদৃশ্যং বিচিন্বন্তঃ সৃজন্তমনিশং শরান্
হরয়ো বিবিশুর্ব্যোম প্রগৃহ্য মহতীঃ শিলাঃ
272.25
তাংশ্চ তৌ চাপ্যদৃশ্যঃ স শরৈর্বিব্যাধ রাক্ষসঃ
স ভৃশং তাডয়ন্বীরো রাবণির্মায়য়াবৃতঃ
272.26
তৌ শরৈরাচিতৌ বীরৌ ভ্রাতরৌ রামলক্ষ্মণৌ
পেততুর্গগনাদ্ভূমিং সূর্যাচন্দ্রমসাবিব