Utshovঅধ্যায় 271
271.1
মার্কণ্ডেয় উবাচ
ততো বিনির্যায় পুরাত্কুম্ভকর্ণঃ সহানুগঃ
অপশ্যত্কপিসৈন্যং তজ্জিতকাশ্যগ্রতঃ স্থিতম্
271.2
তমভ্যেত্যাশু হরয়ঃ পরিবার্য সমন্ততঃ
অভ্যঘ্নংশ্চ মহাকায়ৈর্বহুভির্জগতীরুহৈঃ
করজৈরতুদংশ্চান্যে বিহায় ভয়মুত্তমম্
271.3
বহুধা যুধ্যমানাস্তে যুদ্ধমার্গৈঃ প্লবংগমাঃ
নানাপ্রহরণৈর্ভীমং রাক্ষসেন্দ্রমতাডয়ন্
271.4
স তাড্যমানঃ প্রহসন্ভক্ষয়ামাস বানরান্
পনসং চ গবাক্ষং চ বজ্রবাহুং চ বানরম্
271.5
তদ্দৃষ্ট্বা ব্যথনং কর্ম কুম্ভকর্ণস্য রক্ষসঃ
উদক্রোশন্পরিত্রস্তাস্তারপ্রভৃতয়স্তদা
271.6
তং তারমুচ্চৈঃ ক্রোশন্তমন্যাংশ্চ হরিয়ূথপান্
অভিদুদ্রাব সুগ্রীবঃ কুম্ভকর্ণমপেতভীঃ
271.7
ততোঽভিপত্য বেগেন কুম্ভকর্ণং মহামনাঃ
শালেন জঘ্নিবান্মূর্ধ্নি বলেন কপিকুঞ্জরঃ
271.8
স মহাত্মা মহাবেগঃ কুম্ভকর্ণস্য মূর্ধনি
বিভেদ শালং সুগ্রীবো ন চৈবাব্যথয়ত্কপিঃ
271.9
ততো বিনদ্য প্রহসঞ্শালস্পর্শবিবোধিতঃ
দোর্ভ্যামাদায় সুগ্রীবং কুম্ভকর্ণোঽহরদ্বলাৎ
271.10
হ্রিয়মাণং তু সুগ্রীবং কুম্ভকর্ণেন রক্ষসা
অবেক্ষ্যাভ্যদ্রবদ্বীরঃ সৌমিত্রির্মিত্রনন্দনঃ
271.11
সোঽভিপত্য মহাবেগং রুক্মপুঙ্খং মহাশরম্
প্রাহিণোত্কুম্ভকর্ণায় লক্ষ্মণঃ পরবীরহা
271.12
স তস্য দেহাবরণং ভিত্ত্বা দেহং চ সায়কঃ
জগাম দারয়ন্ভূমিং রুধিরেণ সমুক্ষিতঃ
271.13
তথা স ভিন্নহৃদয়ঃ সমুত্সৃজ্য কপীশ্বরম্
কুম্ভকর্ণো মহেষ্বাসঃ প্রগৃহীতশিলায়ুধঃ
অভিদুদ্রাব সৌমিত্রিমুদ্যম্য মহতীং শিলাম্
271.14
তস্যাভিদ্রবতস্তূর্ণং ক্ষুরাভ্যামুচ্ছ্রিতৌ করৌ
চিচ্ছেদ নিশিতাগ্রাভ্যাং স বভূব চতুর্ভুজঃ
271.15
তানপ্যস্য ভুজান্সর্বান্প্রগৃহীতশিলায়ুধান্
ক্ষুরৈশ্চিচ্ছেদ লঘ্বস্ত্রং সৌমিত্রিঃ প্রতিদর্শয়ন্
271.16
স বভূবাতিকায়শ্চ বহুপাদশিরোভুজঃ
তং ব্রহ্মাস্ত্রেণ সৌমিত্রির্দদাহাদ্রিচয়োপমম্
271.17
স পপাত মহাবীর্যো দিব্যাস্ত্রাভিহতো রণে
মহাশনিবিনির্দগ্ধঃ পাদপোঽঙ্কুরবানিব
271.18
তং দৃষ্ট্বা বৃত্রসংকাশং কুম্ভকর্ণং তরস্বিনম্
গতাসুং পতিতং ভূমৌ রাক্ষসাঃ প্রাদ্রবন্ভয়াৎ
271.19
তথা তান্দ্রবতো যোধান্দৃষ্ট্বা তৌ দূষণানুজৌ
অবস্থাপ্যাথ সৌমিত্রিং সংক্রুদ্ধাবভ্যধাবতাম্
271.20
তাবাদ্রবন্তৌ সংক্রুদ্ধৌ বজ্রবেগপ্রমাথিনৌ
প্রতিজগ্রাহ সৌমিত্রির্বিনদ্যোভৌ পতত্রিভিঃ
271.21
ততঃ সুতুমুলং যুদ্ধমভবল্লোমহর্ষণম্
দূষণানুজয়োঃ পার্থ লক্ষ্মণস্য চ ধীমতঃ
271.22
মহতা শরবর্ষেণ রাক্ষসৌ সোঽভ্যবর্ষত
তৌ চাপি বীরৌ সংক্রুদ্ধাবুভৌ তৌ সমবর্ষতাম্
271.23
মুহূর্তমেবমভবদ্বজ্রবেগপ্রমাথিনোঃ
সৌমিত্রেশ্চ মহাবাহোঃ সংপ্রহারঃ সুদারুণঃ
271.24
অথাদ্রিশৃঙ্গমাদায় হনূমান্মারুতাত্মজঃ
অভিদ্রুত্যাদদে প্রাণান্বজ্রবেগস্য রক্ষসঃ
271.25
নীলশ্চ মহতা গ্রাব্ণা দূষণাবরজং হরিঃ
প্রমাথিনমভিদ্রুত্য প্রমমাথ মহাবলঃ
271.26
ততঃ প্রাবর্তত পুনঃ সংগ্রামঃ কটুকোদয়ঃ
রামরাবণসৈন্যানামন্যোন্যমভিধাবতাম্
271.27
শতশো নৈরৃতান্বন্যা জঘ্নুর্বন্যাংশ্চ নৈরৃতাঃ
নৈরৃতাস্তত্র বধ্যন্তে প্রায়শো ন তু বানরাঃ