Utshovঅধ্যায় 270
270.1
মার্কণ্ডেয় উবাচ
ততঃ প্রহস্তঃ সহসা সমভ্যেত্য বিভীষণম্
গদয়া তাডয়ামাস বিনদ্য রণকর্কশঃ
270.2
স তয়াভিহতো ধীমান্গদয়া ভীমবেগয়া
নাকম্পত মহাবাহুর্হিমবানিব সুস্থিরঃ
270.3
ততঃ প্রগৃহ্য বিপুলাং শতঘণ্টাং বিভীষণঃ
অভিমন্ত্র্য মহাশক্তিং চিক্ষেপাস্য শিরঃ প্রতি
270.4
পতন্ত্যা স তয়া বেগাদ্রাক্ষসোঽশনিনাদয়া
হৃতোত্তমাঙ্গো দদৃশে বাতরুগ্ণ ইব দ্রুমঃ
270.5
তং দৃষ্ট্বা নিহতং সংখ্যে প্রহস্তং ক্ষণদাচরম্
অভিদুদ্রাব ধূম্রাক্ষো বেগেন মহতা কপীন্
270.6
তস্য মেঘোপমং সৈন্যমাপতদ্ভীমদর্শনম্
দৃষ্ট্বৈব সহসা দীর্ণা রণে বানরপুংগবাঃ
270.7
ততস্তান্সহসা দীর্ণান্দৃষ্ট্বা বানরপুংগবান্
নির্যায় কপিশার্দূলো হনূমান্পর্যবস্থিতঃ
270.8
তং দৃষ্ট্বাবস্থিতং সংখ্যে হরয়ঃ পবনাত্মজম্
বেগেন মহতা রাজন্সংন্যবর্তন্ত সর্বশঃ
270.9
ততঃ শব্দো মহানাসীত্তুমুলো লোমহর্ষণঃ
রামরাবণসৈন্যানামন্যোন্যমভিধাবতাম্
270.10
তস্মিন্প্রবৃত্তে সংগ্রামে ঘোরে রুধিরকর্দমে
ধূম্রাক্ষঃ কপিসৈন্যং তদ্দ্রাবয়ামাস পত্রিভিঃ
270.11
তং রাক্ষসমহামাত্রমাপতন্তং সপত্নজিৎ
তরসা প্রতিজগ্রাহ হনূমান্পবনাত্মজঃ
270.12
তয়োর্যুদ্ধমভূদ্ঘোরং হরিরাক্ষসবীরয়োঃ
জিগীষতোর্যুধান্যোন্যমিন্দ্রপ্রহ্লাদয়োরিব
270.13
গদাভিঃ পরিঘৈশ্চৈব রাক্ষসো জঘ্নিবান্কপিম্
কপিশ্চ জঘ্নিবান্রক্ষঃ সস্কন্ধবিটপৈর্দ্রুমৈঃ
270.14
ততস্তমতিকায়েন সাশ্বং সরথসারথিম্
ধূম্রাক্ষমবধীদ্ধীমান্হনূমান্মারুতাত্মজঃ
270.15
ততস্তং নিহতং দৃষ্ট্বা ধূম্রাক্ষং রাক্ষসোত্তমম্
হরয়ো জাতবিস্রম্ভা জঘ্নুরভ্যেত্য সৈনিকান্
270.16
তে বধ্যমানা বলিভির্হরিভির্জিতকাশিভিঃ
রাক্ষসা ভগ্নসংকল্পা লঙ্কামভ্যপতন্ভয়াৎ
270.17
তেঽভিপত্য পুরং ভগ্না হতশেষা নিশাচরাঃ
সর্বং রাজ্ঞে যথাবৃত্তং রাবণায় ন্যবেদয়ন্
270.18
শ্রুত্বা তু রাবণস্তেভ্যঃ প্রহস্তং নিহতং যুধি
ধূম্রাক্ষং চ মহেষ্বাসং সসৈন্যং বানরর্ষভৈঃ
270.19
সুদীর্ঘমিব নিঃশ্বস্য সমুত্পত্য বরাসনাৎ
উবাচ কুম্ভকর্ণস্য কর্মকালোঽয়মাগতঃ
270.20
ইত্যেবমুক্ত্বা বিবিধৈর্বাদিত্রৈঃ সুমহাস্বনৈঃ
শয়ানমতিনিদ্রালুং কুম্ভকর্ণমবোধয়ৎ
270.21
প্রবোধ্য মহতা চৈনং যত্নেনাগতসাধ্বসঃ
স্বস্থমাসীনমব্যগ্রং বিনিদ্রং রাক্ষসাধিপঃ
ততোঽব্রবীদ্দশগ্রীবঃ কুম্ভকর্ণং মহাবলম্
270.22
ধন্যোঽসি যস্য তে নিদ্রা কুম্ভকর্ণেয়মীদৃশী
য ইমং দারুণং কালং ন জানীষে মহাভয়ম্
270.23
এষ তীর্ত্বার্ণবং রামঃ সেতুনা হরিভিঃ সহ
অবমন্যেহ নঃ সর্বান্করোতি কদনং মহৎ
270.24
ময়া হ্যপহৃতা ভার্যা সীতা নামাস্য জানকী
তাং মোক্ষয়িষুরায়াতো বদ্ধ্বা সেতুং মহার্ণবে
270.25
তেন চৈব প্রহস্তাদির্মহান্নঃ স্বজনো হতঃ
তস্য নান্যো নিহন্তাস্তি ত্বদৃতে শত্রুকর্শন
270.26
স দংশিতোঽভিনির্যায় ত্বমদ্য বলিনাং বর
রামাদীন্সমরে সর্বাঞ্জহি শত্রূনরিংদম
270.27
দূষণাবরজৌ চৈব বজ্রবেগপ্রমাথিনৌ
তৌ ত্বাং বলেন মহতা সহিতাবনুয়াস্যতঃ
270.28
ইত্যুক্ত্বা রাক্ষসপতিঃ কুম্ভকর্ণং তরস্বিনম্
সংদিদেশেতিকর্তব্যে বজ্রবেগপ্রমাথিনৌ
270.29
তথেত্যুক্ত্বা তু তৌ বীরৌ রাবণং দূষণানুজৌ
কুম্ভকর্ণং পুরস্কৃত্য তূর্ণং নির্যয়তুঃ পুরাৎ