অধ্যায় 269

269.1

মার্কণ্ডেয় উবাচ
ততো নিবিশমানাংস্তান্সৈনিকান্রাবণানুগাঃ
অভিজগ্মুর্গণানেকে পিশাচক্ষুদ্ররক্ষসাম্

পর্বণঃ পূতনো জম্ভঃ খরঃ ক্রোধবশো হরিঃ
প্ররুজশ্চারুজশ্চৈব প্রঘসশ্চৈবমাদয়ঃ

ততোঽভিপততাং তেষামদৃশ্যানাং দুরাত্মনাম্
অন্তর্ধানবধং তজ্জ্ঞশ্চকার স বিভীষণঃ

তে দৃশ্যমানা হরিভির্বলিভির্দূরপাতিভিঃ
নিহতাঃ সর্বশো রাজন্মহীং জগ্মুর্গতাসবঃ

অমৃষ্যমাণঃ সবলো রাবণো নির্যয়াবথ
ব্যূহ্য চৌশনসং ব্যূহং হরীন্সর্বানহারয়ৎ

রাঘবস্ত্বভিনির্যায় ব্যূঢানীকং দশাননম্
বার্হস্পত্যং বিধিং কৃত্বা প্রত্যব্যূহন্নিশাচরম্

সমেত্য যুয়ুধে তত্র ততো রামেণ রাবণঃ
যুয়ুধে লক্ষ্মণশ্চৈব তথৈবেন্দ্রজিতা সহ

বিরূপাক্ষেণ সুগ্রীবস্তারেণ চ নিখর্বটঃ
তুণ্ডেন চ নলস্তত্র পটুশঃ পনসেন চ

বিষহ্যং যং হি যো মেনে স স তেন সমেয়িবান্
যুয়ুধে যুদ্ধবেলায়াং স্ববাহুবলমাশ্রিতঃ

স সংপ্রহারো ববৃধে ভীরূণাং ভয়বর্ধনঃ
লোমসংহর্ষণো ঘোরঃ পুরা দেবাসুরে যথা

রাবণো রামমানর্ছচ্ছক্তিশূলাসিবৃষ্টিভিঃ
নিশিতৈরায়সৈস্তীক্ষ্ণৈ রাবণং চাপি রাঘবঃ

তথৈবেন্দ্রজিতং যত্তং লক্ষ্মণো মর্মভেদিভিঃ
ইন্দ্রজিচ্চাপি সৌমিত্রিং বিভেদ বহুভিঃ শরৈঃ

বিভীষণঃ প্রহস্তং চ প্রহস্তশ্চ বিভীষণম্
খগপত্রৈঃ শরৈস্তীক্ষ্ণৈরভ্যবর্ষদ্গতব্যথঃ

তেষাং বলবতামাসীন্মহাস্ত্রাণাং সমাগমঃ
বিব্যথুঃ সকলা যেন ত্রয়ো লোকাশ্চরাচরাঃ