Utshovঅধ্যায় 268
268.1
মার্কণ্ডেয় উবাচ
প্রভূতান্নোদকে তস্মিন্বহুমূলফলে বনে
সেনাং নিবেশ্য কাকুত্স্থো বিধিবত্পর্যরক্ষত
268.2
রাবণশ্চ বিধিং চক্রে লঙ্কায়াং শাস্ত্রনির্মিতম্
প্রকৃত্যৈব দুরাধর্ষা দৃঢপ্রাকারতোরণা
268.3
অগাধতোয়াঃ পরিখা মীননক্রসমাকুলাঃ
বভূবুঃ সপ্ত দুর্ধর্ষাঃ খাদিরৈঃ শঙ্কুভিশ্চিতাঃ
268.4
কর্ণাট্টয়ন্ত্রদুর্ধর্ষা বভূবুঃ সহুডোপলাঃ
সাশীবিষঘটায়োধাঃ সসর্জরসপাংসবঃ
268.5
মুসলালাতনারাচতোমরাসিপরশ্বধৈঃ
অন্বিতাশ্চ শতঘ্নীভিঃ সমধূচ্ছিষ্টমুদ্গরাঃ
268.6
পুরদ্বারেষু সর্বেষু গুল্মাঃ স্থাবরজঙ্গমাঃ
বভূবুঃ পত্তিবহুলাঃ প্রভূতগজবাজিনঃ
268.7
অঙ্গদস্ত্বথ লঙ্কায়া দ্বারদেশমুপাগতঃ
বিদিতো রাক্ষসেন্দ্রস্য প্রবিবেশ গতব্যথঃ
268.8
মধ্যে রাক্ষসকোটীনাং বহ্বীনাং সুমহাবলঃ
শুশুভে মেঘমালাভিরাদিত্য ইব সংবৃতঃ
268.9
স সমাসাদ্য পৌলস্ত্যমমাত্যৈরভিসংবৃতম্
রামসংদেশমামন্ত্র্য বাগ্মী বক্তুং প্রচক্রমে
268.10
আহ ত্বাং রাঘবো রাজন্কোসলেন্দ্রো মহায়শাঃ
প্রাপ্তকালমিদং বাক্যং তদাদত্স্ব কুরুষ্ব চ
268.11
অকৃতাত্মানমাসাদ্য রাজানমনয়ে রতম্
বিনশ্যন্ত্যনয়াবিষ্টা দেশাশ্চ নগরাণি চ
268.12
ত্বয়ৈকেনাপরাদ্ধং মে সীতামাহরতা বলাৎ
বধায়ানপরাদ্ধানামন্যেষাং তদ্ভবিষ্যতি
268.13
যে ত্বয়া বলদর্পাভ্যামাবিষ্টেন বনেচরাঃ
ঋষয়ো হিংসিতাঃ পূর্বং দেবাশ্চাপ্যবমানিতাঃ
268.14
রাজর্ষয়শ্চ নিহতা রুদন্ত্যশ্চাহৃতাঃ স্ত্রিয়ঃ
তদিদং সমনুপ্রাপ্তং ফলং তস্যানয়স্য তে
268.15
হন্তাস্মি ত্বাং সহামাত্যং যুধ্যস্ব পুরুষো ভব
পশ্য মে ধনুষো বীর্যং মানুষস্য নিশাচর
268.16
মুচ্যতাং জানকী সীতা ন মে মোক্ষ্যসি কর্হিচিৎ
অরাক্ষসমিমং লোকং কর্তাস্মি নিশিতৈঃ শরৈঃ
268.17
ইতি তস্য ব্রুবাণস্য দূতস্য পরুষং বচঃ
শ্রুত্বা ন মমৃষে রাজা রাবণঃ ক্রোধমূর্ছিতঃ
268.18
ইঙ্গিতজ্ঞাস্ততো ভর্তুশ্চত্বারো রজনীচরাঃ
চতুর্ষ্বঙ্গেষু জগৃহুঃ শার্দূলমিব পক্ষিণঃ
268.19
তাংস্তথাঙ্গেষু সংসক্তানঙ্গদো রজনীচরান্
আদায়ৈব খমুত্পত্য প্রাসাদতলমাবিশৎ
268.20
বেগেনোত্পততস্তস্য পেতুস্তে রজনীচরাঃ
ভুবি সংভিন্নহৃদয়াঃ প্রহারপরিপীডিতাঃ
268.21
স মুক্তো হর্ম্যশিখরাত্তস্মাত্পুনরবাপতৎ
লঙ্ঘয়িত্বা পুরীং লঙ্কাং স্ববলস্য সমীপতঃ
268.22
কোসলেন্দ্রমথাভ্যেত্য সর্বমাবেদ্য চাঙ্গদঃ
বিশশ্রাম স তেজস্বী রাঘবেণাভিনন্দিতঃ
268.23
ততঃ সর্বাভিসারেণ হরীণাং বাতরংহসাম্
ভেদয়ামাস লঙ্কায়াঃ প্রাকারং রঘুনন্দনঃ
268.24
বিভীষণর্ক্ষাধিপতী পুরস্কৃত্যাথ লক্ষ্মণঃ
দক্ষিণং নগরদ্বারমবামৃদ্নাদ্দুরাসদম্
268.25
করভারুণগাত্রাণাং হরীণাং যুদ্ধশালিনাম্
কোটীশতসহস্রেণ লঙ্কামভ্যপতত্তদা
268.26
উত্পতদ্ভিঃ পতদ্ভিশ্চ নিপতদ্ভিশ্চ বানরৈঃ
নাদৃশ্যত তদা সূর্যো রজসা নাশিতপ্রভঃ
268.27
শালিপ্রসূনসদৃশৈঃ শিরীষকুসুমপ্রভৈঃ
তরুণাদিত্যসদৃশৈঃ শরগৌরৈশ্চ বানরৈঃ
268.28
প্রাকারং দদৃশুস্তে তু সমন্তাত্কপিলীকৃতম্
রাক্ষসা বিস্মিতা রাজন্সস্ত্রীবৃদ্ধাঃ সমন্ততঃ
268.29
বিভিদুস্তে মণিস্তম্ভান্কর্ণাট্টশিখরাণি চ
ভগ্নোন্মথিতবেগানি যন্ত্রাণি চ বিচিক্ষিপুঃ
268.30
পরিগৃহ্য শতঘ্নীশ্চ সচক্রাঃ সহুডোপলাঃ
চিক্ষিপুর্ভুজবেগেন লঙ্কামধ্যে মহাবলাঃ
268.31
প্রাকারস্থাশ্চ যে কেচিন্নিশাচরগণাস্তদা
প্রদুদ্রুবুস্তে শতশঃ কপিভিঃ সমভিদ্রুতাঃ
268.32
ততস্তু রাজবচনাদ্রাক্ষসাঃ কামরূপিণঃ
নির্যয়ুর্বিকৃতাকারাঃ সহস্রশতসংঘশঃ
268.33
শস্ত্রবর্ষাণি বর্ষন্তো দ্রাবয়ন্তো বনৌকসঃ
প্রাকারং শোধয়ন্তস্তে পরং বিক্রমমাস্থিতাঃ
268.34
স মাষরাশিসদৃশৈর্বভূব ক্ষণদাচরৈঃ
কৃতো নির্বানরো ভূয়ঃ প্রাকারো ভীমদর্শনৈঃ
268.35
পেতুঃ শূলবিভিন্নাঙ্গা বহবো বানরর্ষভাঃ
স্তম্ভতোরণভগ্নাশ্চ পেতুস্তত্র নিশাচরাঃ
268.36
কেশাকেশ্যভবদ্যুদ্ধং রক্ষসাং বানরৈঃ সহ
নখৈর্দন্তৈশ্চ বীরাণাং খাদতাং বৈ পরস্পরম্
268.37
নিষ্টনন্তো হ্যুভয়তস্তত্র বানররাক্ষসাঃ
হতা নিপতিতা ভূমৌ ন মুঞ্চন্তি পরস্পরম্
268.38
রামস্তু শরজালানি ববর্ষ জলদো যথা
তানি লঙ্কাং সমাসাদ্য জঘ্নুস্তান্রজনীচরান্
268.39
সৌমিত্রিরপি নারাচৈর্দৃঢধন্বা জিতক্লমঃ
আদিশ্যাদিশ্য দুর্গস্থান্পাতয়ামাস রাক্ষসান্
268.40
ততঃ প্রত্যবহারোঽভূত্সৈন্যানাং রাঘবাজ্ঞয়া
কৃতে বিমর্দে লঙ্কায়াং লব্ধলক্ষো জয়োত্তরঃ