Utshovঅধ্যায় 267
267.1
মার্কণ্ডেয় উবাচ
ততস্তত্রৈব রামস্য সমাসীনস্য তৈঃ সহ
সমাজগ্মুঃ কপিশ্রেষ্ঠাঃ সুগ্রীববচনাত্তদা
267.2
বৃতঃ কোটিসহস্রেণ বানরাণাং তরস্বিনাম্
শ্বশুরো বালিনঃ শ্রীমান্সুষেণো রামমভ্যয়াৎ
267.3
কোটীশতবৃতৌ চাপি গজো গবয় এব চ
বানরেন্দ্রৌ মহাবীর্যৌ পৃথক্পৃথগদৃশ্যতাম্
267.4
ষষ্টিকোটিসহস্রাণি প্রকর্ষন্প্রত্যদৃশ্যত
গোলাঙ্গূলো মহারাজ গবাক্ষো ভীমদর্শনঃ
267.5
গন্ধমাদনবাসী তু প্রথিতো গন্ধমাদনঃ
কোটীসহস্রমুগ্রাণাং হরীণাং সমকর্ষত
267.6
পনসো নাম মেধাবী বানরঃ সুমহাবলঃ
কোটীর্দশ দ্বাদশ চ ত্রিংশত্পঞ্চ প্রকর্ষতি
267.7
শ্রীমান্দধিমুখো নাম হরিবৃদ্ধোঽপি বীর্যবান্
প্রচকর্ষ মহত্সৈন্যং হরীণাং ভীমতেজসাম্
267.8
কৃষ্ণানাং মুখপুণ্ড্রাণামৃক্ষাণাং ভীমকর্মণাম্
কোটীশতসহস্রেণ জাম্ববান্প্রত্যদৃশ্যত
267.9
এতে চান্যে চ বহবো হরিয়ূথপয়ূথপাঃ
অসংখ্যেয়া মহারাজ সমীয়ূ রামকারণাৎ
267.10
শিরীষকুসুমাভানাং সিংহানামিব নর্দতাম্
শ্রূয়তে তুমুলঃ শব্দস্তত্র তত্র প্রধাবতাম্
267.11
গিরিকূটনিভাঃ কেচিত্কেচিন্মহিষসংনিভাঃ
শরদভ্রপ্রতীকাশাঃ পিষ্টহিঙ্গুলকাননাঃ
267.12
উত্পতন্তঃ পতন্তশ্চ প্লবমানাশ্চ বানরাঃ
উদ্ধুন্বন্তোঽপরে রেণূন্সমাজগ্মুঃ সমন্ততঃ
267.13
স বানরমহালোকঃ পূর্ণসাগরসংনিভঃ
নিবেশমকরোত্তত্র সুগ্রীবানুমতে তদা
267.14
ততস্তেষু হরীন্দ্রেষু সমাবৃত্তেষু সর্বশঃ
তিথৌ প্রশস্তে নক্ষত্রে মুহূর্তে চাভিপূজিতে
267.15
তেন ব্যূঢেন সৈন্যেন লোকানুদ্বর্তয়ন্নিব
প্রয়য়ৌ রাঘবঃ শ্রীমান্সুগ্রীবসহিতস্তদা
267.16
মুখমাসীত্তু সৈন্যস্য হনূমান্মারুতাত্মজঃ
জঘনং পালয়ামাস সৌমিত্রিরকুতোভয়ঃ
267.17
বদ্ধগোধাঙ্গুলিত্রাণৌ রাঘবৌ তত্র রেজতুঃ
বৃতৌ হরিমহামাত্রৈশ্চন্দ্রসূর্যৌ গ্রহৈরিব
267.18
প্রবভৌ হরিসৈন্যং তচ্ছালতালশিলায়ুধম্
সুমহচ্ছালিভবনং যথা সূর্যোদয়ং প্রতি
267.19
নলনীলাঙ্গদক্রাথমৈন্দদ্বিবিদপালিতা
যয়ৌ সুমহতী সেনা রাঘবস্যার্থসিদ্ধয়ে
267.20
বিধিবত্সুপ্রশস্তেষু বহুমূলফলেষু চ
প্রভূতমধুমাংসেষু বারিমত্সু শিবেষু চ
267.21
নিবসন্তী নিরাবাধা তথৈব গিরিসানুষু
উপায়াদ্ধরিসেনা সা ক্ষারোদমথ সাগরম্
267.22
দ্বিতীয়সাগরনিভং তদ্বলং বহুলধ্বজম্
বেলাবনং সমাসাদ্য নিবাসমকরোত্তদা
267.23
ততো দাশরথিঃ শ্রীমান্সুগ্রীবং প্রত্যভাষত
মধ্যে বানরমুখ্যানাং প্রাপ্তকালমিদং বচঃ
267.24
উপায়ঃ কো নু ভবতাং মতঃ সাগরলঙ্ঘনে
ইয়ং চ মহতী সেনা সাগরশ্চাপি দুস্তরঃ
267.25
তত্রান্যে ব্যাহরন্তি স্ম বানরাঃ পটুমানিনঃ
সমর্থা লঙ্ঘনে সিন্ধোর্ন তু কৃত্স্নস্য বানরাঃ
267.26
কেচিন্নৌভির্ব্যবস্যন্তি কেচিচ্চ বিবিধৈঃ প্লবৈঃ
নেতি রামশ্চ তান্সর্বান্সান্ত্বয়ন্প্রত্যভাষত
267.27
শতয়োজনবিস্তারং ন শক্তাঃ সর্ববানরাঃ
ক্রান্তুং তোয়নিধিং বীরা নৈষা বো নৈষ্ঠিকী মতিঃ
267.28
নাবো ন সন্তি সেনায়া বহ্ব্যস্তারয়িতুং তথা
বণিজামুপঘাতং চ কথমস্মদ্বিধশ্চরেৎ
267.29
বিস্তীর্ণং চৈব নঃ সৈন্যং হন্যাচ্ছিদ্রেষু বৈ পরঃ
প্লবোডুপপ্রতারশ্চ নৈবাত্র মম রোচতে
267.30
অহং ত্বিমং জলনিধিং সমারপ্স্যাম্যুপায়তঃ
প্রতিশেষ্যাম্যুপবসন্দর্শয়িষ্যতি মাং ততঃ
267.31
ন চেদ্দর্শয়িতা মার্গং ধক্ষ্যাম্যেনমহং ততঃ
মহাস্ত্রৈরপ্রতিহতৈরত্যগ্নিপবনোজ্জ্বলৈঃ
267.32
ইত্যুক্ত্বা সহসৌমিত্রিরুপস্পৃশ্যাথ রাঘবঃ
প্রতিশিশ্যে জলনিধিং বিধিবত্কুশসংস্তরে
267.33
সাগরস্তু ততঃ স্বপ্নে দর্শয়ামাস রাঘবম্
দেবো নদনদীভর্তা শ্রীমান্যাদোগণৈর্বৃতঃ
267.34
কৌসল্যামাতরিত্যেবমাভাষ্য মধুরং বচঃ
ইদমিত্যাহ রত্নানামাকরৈঃ শতশো বৃতঃ
267.35
ব্রূহি কিং তে করোম্যত্র সাহায্যং পুরুষর্ষভ
ইক্ষ্বাকুরস্মি তে জ্ঞাতিরিতি রামস্তমব্রবীৎ
267.36
মার্গমিচ্ছামি সৈন্যস্য দত্তং নদনদীপতে
যেন গত্বা দশগ্রীবং হন্যাং পৌলস্ত্যপাংসনম্
267.37
যদ্যেবং যাচতো মার্গং ন প্রদাস্যতি মে ভবান্
শরৈস্ত্বাং শোষয়িষ্যামি দিব্যাস্ত্রপ্রতিমন্ত্রিতৈঃ
267.38
ইত্যেবং ব্রুবতঃ শ্রুত্বা রামস্য বরুণালয়ঃ
উবাচ ব্যথিতো বাক্যমিতি বদ্ধাঞ্জলিঃ স্থিতঃ
267.39
নেচ্ছামি প্রতিঘাতং তে নাস্মি বিঘ্নকরস্তব
শৃণু চেদং বচো রাম শ্রুত্বা কর্তব্যমাচর
267.40
যদি দাস্যামি তে মার্গং সৈন্যস্য ব্রজতোঽঽজ্ঞয়া
অন্যেঽপ্যাজ্ঞাপয়িষ্যন্তি মামেবং ধনুষো বলাৎ
267.41
অস্তি ত্বত্র নলো নাম বানরঃ শিল্পিসংমতঃ
ত্বষ্টুর্দেবস্য তনয়ো বলবান্বিশ্বকর্মণঃ
267.42
স যত্কাষ্ঠং তৃণং বাপি শিলাং বা ক্ষেপ্স্যতে ময়ি
সর্বং তদ্ধারয়িষ্যামি স তে সেতুর্ভবিষ্যতি
267.43
ইত্যুক্ত্বান্তর্হিতে তস্মিন্রামো নলমুবাচ হ
কুরু সেতুং সমুদ্রে ত্বং শক্তো হ্যসি মতো মম
267.44
তেনোপায়েন কাকুত্স্থঃ সেতুবন্ধমকারয়ৎ
দশয়োজনবিস্তারমায়তং শতয়োজনম্
267.45
নলসেতুরিতি খ্যাতো যোঽদ্যাপি প্রথিতো ভুবি
রামস্যাজ্ঞাং পুরস্কৃত্য ধার্যতে গিরিসংনিভঃ
267.46
তত্রস্থং স তু ধর্মাত্মা সমাগচ্ছদ্বিভীষণঃ
ভ্রাতা বৈ রাক্ষসেন্দ্রস্য চতুর্ভিঃ সচিবৈঃ সহ
267.47
প্রতিজগ্রাহ রামস্তং স্বাগতেন মহামনাঃ
সুগ্রীবস্য তু শঙ্কাভূত্প্রণিধিঃ স্যাদিতি স্ম হ
267.48
রাঘবস্তস্য চেষ্টাভিঃ সম্যক্চ চরিতেঙ্গিতৈঃ
যদা তত্ত্বেন তুষ্টোঽভূত্তত এনমপূজয়ৎ
267.49
সর্বরাক্ষসরাজ্যে চাপ্যভ্যষিঞ্চদ্বিভীষণম্
চক্রে চ মন্ত্রানুচরং সুহৃদং লক্ষ্মণস্য চ
267.50
বিভীষণমতে চৈব সোঽত্যক্রামন্মহার্ণবম্
সসৈন্যঃ সেতুনা তেন মাসেনৈব নরাধিপ
267.51
ততো গত্বা সমাসাদ্য লঙ্কোদ্যানান্যনেকশঃ
ভেদয়ামাস কপিভির্মহান্তি চ বহূনি চ
267.52
তত্রাস্তাং রাবণামাত্যৌ রাক্ষসৌ শুকসারণৌ
চারৌ বানররূপেণ তৌ জগ্রাহ বিভীষণঃ
267.53
প্রতিপন্নৌ যদা রূপং রাক্ষসং তৌ নিশাচরৌ
দর্শয়িত্বা ততঃ সৈন্যং রামঃ পশ্চাদবাসৃজৎ
267.54
নিবেশ্যোপবনে সৈন্যং তচ্ছূরঃ প্রাজ্ঞবানরম্
প্রেষয়ামাস দৌত্যেন রাবণস্য ততোঽঙ্গদম্