Utshovঅধ্যায় 266
266.1
মার্কণ্ডেয় উবাচ
রাঘবস্তু সসৌমিত্রিঃ সুগ্রীবেণাভিপালিতঃ
বসন্মাল্যবতঃ পৃষ্ঠে দদর্শ বিমলং নভঃ
266.2
স দৃষ্ট্বা বিমলে ব্যোম্নি নির্মলং শশলক্ষণম্
গ্রহনক্ষত্রতারাভিরনুয়াতমমিত্রহা
266.3
কুমুদোত্পলপদ্মানাং গন্ধমাদায় বায়ুনা
মহীধরস্থঃ শীতেন সহসা প্রতিবোধিতঃ
266.4
প্রভাতে লক্ষ্মণং বীরমভ্যভাষত দুর্মনাঃ
সীতাং সংস্মৃত্য ধর্মাত্মা রুদ্ধাং রাক্ষসবেশ্মনি
266.5
গচ্ছ লক্ষ্মণ জানীহি কিষ্কিন্ধায়াং কপীশ্বরম্
প্রমত্তং গ্রাম্যধর্মেষু কৃতঘ্নং স্বার্থপণ্ডিতম্
266.6
যোঽসৌ কুলাধমো মূঢো ময়া রাজ্যেঽভিষেচিতঃ
সর্ববানরগোপুচ্ছা যমৃক্ষাশ্চ ভজন্তি বৈ
266.7
যদর্থং নিহতো বালী ময়া রঘুকুলোদ্বহ
ত্বয়া সহ মহাবাহো কিষ্কিন্ধোপবনে তদা
266.8
কৃতঘ্নং তমহং মন্যে বানরাপসদং ভুবি
যো মামেবংগতো মূঢো ন জানীতেঽদ্য লক্ষ্মণ
266.9
অসৌ মন্যে ন জানীতে সময়প্রতিপাদনম্
কৃতোপকারং মাং নূনমবমন্যাল্পয়া ধিয়া
266.10
যদি তাবদনুদ্যুক্তঃ শেতে কামসুখাত্মকঃ
নেতব্যো বালিমার্গেণ সর্বভূতগতিং ত্বয়া
266.11
অথাপি ঘটতেঽস্মাকমর্থে বানরপুংগবঃ
তমাদায়ৈহি কাকুত্স্থ ত্বরাবান্ভব মা চিরম্
266.12
ইত্যুক্তো লক্ষ্মণো ভ্রাত্রা গুরুবাক্যহিতে রতঃ
প্রতস্থে রুচিরং গৃহ্য সমার্গণগুণং ধনুঃ
কিষ্কিন্ধাদ্বারমাসাদ্য প্রবিবেশানিবারিতঃ
266.13
সক্রোধ ইতি তং মত্বা রাজা প্রত্যুদ্যয়ৌ হরিঃ
তং সদারো বিনীতাত্মা সুগ্রীবঃ প্লবগাধিপঃ
পূজয়া প্রতিজগ্রাহ প্রীয়মাণস্তদর্হয়া
266.14
তমব্রবীদ্রামবচঃ সৌমিত্রিরকুতোভয়ঃ
স তত্সর্বমশেষেণ শ্রুত্বা প্রহ্বঃ কৃতাঞ্জলিঃ
266.15
সভৃত্যদারো রাজেন্দ্র সুগ্রীবো বানরাধিপঃ
ইদমাহ বচঃ প্রীতো লক্ষ্মণং নরকুঞ্জরম্
266.16
নাস্মি লক্ষ্মণ দুর্মেধা ন কৃতঘ্নো ন নির্ঘৃণঃ
শ্রূয়তাং যঃ প্রয়ত্নো মে সীতাপর্যেষণে কৃতঃ
266.17
দিশঃ প্রস্থাপিতাঃ সর্বে বিনীতা হরয়ো ময়া
সর্বেষাং চ কৃতঃ কালো মাসেনাগমনং পুনঃ
266.18
যৈরিয়ং সবনা সাদ্রিঃ সপুরা সাগরাম্বরা
বিচেতব্যা মহী বীর সগ্রামনগরাকরা
266.19
স মাসঃ পঞ্চরাত্রেণ পূর্ণো ভবিতুমর্হতি
ততঃ শ্রোষ্যসি রামেণ সহিতঃ সুমহত্প্রিয়ম্
266.20
ইত্যুক্তো লক্ষ্মণস্তেন বানরেন্দ্রেণ ধীমতা
ত্যক্ত্বা রোষমদীনাত্মা সুগ্রীবং প্রত্যপূজয়ৎ
266.21
স রামং সহসুগ্রীবো মাল্যবত্পৃষ্ঠমাস্থিতম্
অভিগম্যোদয়ং তস্য কার্যস্য প্রত্যবেদয়ৎ
266.22
ইত্যেবং বানরেন্দ্রাস্তে সমাজগ্মুঃ সহস্রশঃ
দিশস্তিস্রো বিচিত্যাথ ন তু যে দক্ষিণাং গতাঃ
266.23
আচখ্যুস্তে তু রামায় মহীং সাগরমেখলাম্
বিচিতাং ন তু বৈদেহ্যা দর্শনং রাবণস্য বা
266.24
গতাস্তু দক্ষিণামাশাং যে বৈ বানরপুংগবাঃ
আশাবাংস্তেষু কাকুত্স্থঃ প্রাণানার্তোঽপ্যধারয়ৎ
266.25
দ্বিমাসোপরমে কালে ব্যতীতে প্লবগাস্ততঃ
সুগ্রীবমভিগম্যেদং ত্বরিতা বাক্যমব্রুবন্
266.26
রক্ষিতং বালিনা যত্তত্স্ফীতং মধুবনং মহৎ
ত্বয়া চ প্লবগশ্রেষ্ঠ তদ্ভুঙ্ক্তে পবনাত্মজঃ
266.27
বালিপুত্রোঽঙ্গদশ্চৈব যে চান্যে প্লবগর্ষভাঃ
বিচেতুং দক্ষিণামাশাং রাজন্প্রস্থাপিতাস্ত্বয়া
266.28
তেষাং তং প্রণয়ং শ্রুত্বা মেনে স কৃতকৃত্যতাম্
কৃতার্থানাং হি ভৃত্যানামেতদ্ভবতি চেষ্টিতম্
266.29
স তদ্রামায় মেধাবী শশংস প্লবগর্ষভঃ
রামশ্চাপ্যনুমানেন মেনে দৃষ্টাং তু মৈথিলীম্
266.30
হনূমত্প্রমুখাশ্চাপি বিশ্রান্তাস্তে প্লবংগমাঃ
অভিজগ্মুর্হরীন্দ্রং তং রামলক্ষ্মণসংনিধৌ
266.31
গতিং চ মুখবর্ণং চ দৃষ্ট্বা রামো হনূমতঃ
অগমত্প্রত্যয়ং ভূয়ো দৃষ্টা সীতেতি ভারত
266.32
হনূমত্প্রমুখাস্তে তু বানরাঃ পূর্ণমানসাঃ
প্রণেমুর্বিধিবদ্রামং সুগ্রীবং লক্ষ্মণং তথা
266.33
তানুবাচাগতান্রামঃ প্রগৃহ্য সশরং ধনুঃ
অপি মাং জীবয়িষ্যধ্বমপি বঃ কৃতকৃত্যতা
266.34
অপি রাজ্যময়োধ্যায়াং কারয়িষ্যাম্যহং পুনঃ
নিহত্য সমরে শত্রূনাহৃত্য জনকাত্মজাম্
266.35
অমোক্ষয়িত্বা বৈদেহীমহত্বা চ রিপূন্রণে
হৃতদারোঽবধূতশ্চ নাহং জীবিতুমুত্সহে
266.36
ইত্যুক্তবচনং রামং প্রত্যুবাচানিলাত্মজঃ
প্রিয়মাখ্যামি তে রাম দৃষ্টা সা জানকী ময়া
266.37
বিচিত্য দক্ষিণামাশাং সপর্বতবনাকরাম্
শ্রান্তাঃ কালে ব্যতীতে স্ম দৃষ্টবন্তো মহাগুহাম্
266.38
প্রবিশামো বয়ং তাং তু বহুয়োজনমায়তাম্
অন্ধকারাং সুবিপিনাং গহনাং কীটসেবিতাম্
266.39
গত্বা সুমহদধ্বানমাদিত্যস্য প্রভাং ততঃ
দৃষ্টবন্তঃ স্ম তত্রৈব ভবনং দিব্যমন্তরা
266.40
ময়স্য কিল দৈত্যস্য তদাসীদ্বেশ্ম রাঘব
তত্র প্রভাবতী নাম তপোঽতপ্যত তাপসী
266.41
তয়া দত্তানি ভোজ্যানি পানানি বিবিধানি চ
ভুক্ত্বা লব্ধবলাঃ সন্তস্তয়োক্তেন পথা ততঃ
266.42
নির্যায় তস্মাদুদ্দেশাত্পশ্যামো লবণাম্ভসঃ
সমীপে সহ্যমলয়ৌ দর্দুরং চ মহাগিরিম্
266.43
ততো মলয়মারুহ্য পশ্যন্তো বরুণালয়ম্
বিষণ্ণা ব্যথিতাঃ খিন্না নিরাশা জীবিতে ভৃশম্
266.44
অনেকশতবিস্তীর্ণং যোজনানাং মহোদধিম্
তিমিনক্রঝষাবাসং চিন্তয়ন্তঃ সুদুঃখিতাঃ
266.45
তত্রানশনসংকল্পং কৃত্বাসীনা বয়ং তদা
ততঃ কথান্তে গৃধ্রস্য জটায়োরভবত্কথা
266.46
ততঃ পর্বতশৃঙ্গাভং ঘোররূপং ভয়াবহম্
পক্ষিণং দৃষ্টবন্তঃ স্ম বৈনতেয়মিবাপরম্
266.47
সোঽস্মানতর্কয়দ্ভোক্তুমথাভ্যেত্য বচোঽব্রবীৎ
ভোঃ ক এষ মম ভ্রাতুর্জটায়োঃ কুরুতে কথাম্
266.48
সংপাতির্নাম তস্যাহং জ্যেষ্ঠো ভ্রাতা খগাধিপঃ
অন্যোন্যস্পর্ধয়ারূঢাবাবামাদিত্যসংসদম্
266.49
ততো দগ্ধাবিমৌ পক্ষৌ ন দগ্ধৌ তু জটায়ুষঃ
তদা মে চিরদৃষ্টঃ স ভ্রাতা গৃধ্রপতিঃ প্রিয়ঃ
নির্দগ্ধপক্ষঃ পতিতো হ্যহমস্মিন্মহাগিরৌ
266.50
তস্যৈবং বদতোঽস্মাভির্হতো ভ্রাতা নিবেদিতঃ
ব্যসনং ভবতশ্চেদং সংক্ষেপাদ্বৈ নিবেদিতম্
266.51
স সংপাতিস্তদা রাজঞ্শ্রুত্বা সুমহদপ্রিয়ম্
বিষণ্ণচেতাঃ পপ্রচ্ছ পুনরস্মানরিংদম
266.52
কঃ স রামঃ কথং সীতা জটায়ুশ্চ কথং হতঃ
ইচ্ছামি সর্বমেবৈতচ্ছ্রোতুং প্লবগসত্তমাঃ
266.53
তস্যাহং সর্বমেবৈতং ভবতো ব্যসনাগমম্
প্রায়োপবেশনে চৈব হেতুং বিস্তরতোঽব্রুবম্
266.54
সোঽস্মানুত্থাপয়ামাস বাক্যেনানেন পক্ষিরাট্
রাবণো বিদিতো মহ্যং লঙ্কা চাস্য মহাপুরী
266.55
দৃষ্টা পারে সমুদ্রস্য ত্রিকূটগিরিকন্দরে
ভবিত্রী তত্র বৈদেহী ন মেঽস্ত্যত্র বিচারণা
266.56
ইতি তস্য বচঃ শ্রুত্বা বয়মুত্থায় সত্বরাঃ
সাগরপ্লবনে মন্ত্রং মন্ত্রয়ামঃ পরংতপ
266.57
নাধ্যবস্যদ্যদা কশ্চিত্সাগরস্য বিলঙ্ঘনে
ততঃ পিতরমাবিশ্য পুপ্লুবেঽহং মহার্ণবম্
শতয়োজনবিস্তীর্ণং নিহত্য জলরাক্ষসীম্
266.58
তত্র সীতা ময়া দৃষ্টা রাবণান্তঃপুরে সতী
উপবাসতপঃশীলা ভর্তৃদর্শনলালসা
জটিলা মলদিগ্ধাঙ্গী কৃশা দীনা তপস্বিনী
266.59
নিমিত্তৈস্তামহং সীতামুপলভ্য পৃথগ্বিধৈঃ
উপসৃত্যাব্রুবং চার্যামভিগম্য রহোগতাম্
266.60
সীতে রামস্য দূতোঽহং বানরো মারুতাত্মজঃ
ত্বদ্দর্শনমভিপ্রেপ্সুরিহ প্রাপ্তো বিহায়সা
266.61
রাজপুত্রৌ কুশলিনৌ ভ্রাতরৌ রামলক্ষ্মণৌ
সর্বশাখামৃগেন্দ্রেণ সুগ্রীবেণাভিপালিতৌ
266.62
কুশলং ত্বাব্রবীদ্রামঃ সীতে সৌমিত্রিণা সহ
সখিভাবাচ্চ সুগ্রীবঃ কুশলং ত্বানুপৃচ্ছতি
266.63
ক্ষিপ্রমেষ্যতি তে ভর্তা সর্বশাখামৃগৈঃ সহ
প্রত্যয়ং কুরু মে দেবি বানরোঽস্মি ন রাক্ষসঃ
266.64
মুহূর্তমিব চ ধ্যাত্বা সীতা মাং প্রত্যুবাচ হ
অবৈমি ত্বাং হনূমন্তমবিন্ধ্যবচনাদহম্
266.65
অবিন্ধ্যো হি মহাবাহো রাক্ষসো বৃদ্ধসংমতঃ
কথিতস্তেন সুগ্রীবস্ত্বদ্বিধৈঃ সচিবৈর্বৃতঃ
266.66
গম্যতামিতি চোক্ত্বা মাং সীতা প্রাদাদিমং মণিম্
ধারিতা যেন বৈদেহী কালমেতমনিন্দিতা
266.67
প্রত্যয়ার্থং কথাং চেমাং কথয়ামাস জানকী
ক্ষিপ্তামিষীকাং কাকস্য চিত্রকূটে মহাগিরৌ
ভবতা পুরুষব্যাঘ্র প্রত্যভিজ্ঞানকারণাৎ
266.68
শ্রাবয়িত্বা তদাত্মানং ততো দগ্ধ্বা চ তাং পুরীম্
সংপ্রাপ্ত ইতি তং রামঃ প্রিয়বাদিনমর্চয়ৎ