UtshovChapter 266
266.1
मार्कण्डेय उवाच
राघवस्तु ससौमित्रिः सुग्रीवेणाभिपालितः
वसन्माल्यवतः पृष्ठे ददर्श विमलं नभः
Markandeya uvacha
Raghavastu sasaumitrih sugrivenabhipalitah
Vasanmalyavatah prishthe dadarsha vimalam nabhah
266.2
स दृष्ट्वा विमले व्योम्नि निर्मलं शशलक्षणम्
ग्रहनक्षत्रताराभिरनुयातममित्रहा
Sa drishtva vimale vyomni nirmalam shashalakshanam
Grahanakshatratarabhiranuyatamamitraha
266.3
कुमुदोत्पलपद्मानां गन्धमादाय वायुना
महीधरस्थः शीतेन सहसा प्रतिबोधितः
Kumudotpalapadmanam gandhamadaya vayuna
Mahidharasthah shitena sahasa pratibodhitah
266.4
प्रभाते लक्ष्मणं वीरमभ्यभाषत दुर्मनाः
सीतां संस्मृत्य धर्मात्मा रुद्धां राक्षसवेश्मनि
Prabhate lakshmanam viramabhyabhashata durmanah
Sitam sansmritya dharmatma ruddham rakshasaveshmani
266.5
गच्छ लक्ष्मण जानीहि किष्किन्धायां कपीश्वरम्
प्रमत्तं ग्राम्यधर्मेषु कृतघ्नं स्वार्थपण्डितम्
Gachchha lakshmana janihi kishkindhayam kapishvaram
Pramattam gramyadharmeshu kritaghnam svarthapanditam
266.6
योऽसौ कुलाधमो मूढो मया राज्येऽभिषेचितः
सर्ववानरगोपुच्छा यमृक्षाश्च भजन्ति वै
Yosau kuladhamo mudho maya rajyebhishechitah
Sarvavanaragopuchchha yamrikshashcha bhajanti vai
266.7
यदर्थं निहतो वाली मया रघुकुलोद्वह
त्वया सह महाबाहो किष्किन्धोपवने तदा
Yadartham nihato vali maya raghukulodvaha
Tvaya saha mahabaho kishkindhopavane tada
266.8
कृतघ्नं तमहं मन्ये वानरापसदं भुवि
यो मामेवंगतो मूढो न जानीतेऽद्य लक्ष्मण
Kritaghnam tamaham manye vanarapasadam bhuvi
Yo mamevangato mudho na janitedya lakshmana
266.9
असौ मन्ये न जानीते समयप्रतिपादनम्
कृतोपकारं मां नूनमवमन्याल्पया धिया
Asau manye na janite samayapratipadanam
Kritopakaram mam nunamavamanyalpaya dhiya
266.10
यदि तावदनुद्युक्तः शेते कामसुखात्मकः
नेतव्यो वालिमार्गेण सर्वभूतगतिं त्वया
Yadi tavadanudyuktah shete kamasukhatmakah
Netavyo valimargena sarvabhutagatim tvaya
266.11
अथापि घटतेऽस्माकमर्थे वानरपुंगवः
तमादायैहि काकुत्स्थ त्वरावान्भव मा चिरम्
Athapi ghatatesmakamarthe vanarapungavah
Tamadayaihi kakutstha tvaravanbhava ma chiram
266.12
इत्युक्तो लक्ष्मणो भ्रात्रा गुरुवाक्यहिते रतः
प्रतस्थे रुचिरं गृह्य समार्गणगुणं धनुः
किष्किन्धाद्वारमासाद्य प्रविवेशानिवारितः
Ityukto lakshmano bhratra guruvakyahite ratah
Pratasthe ruchiram grihya samarganagunam dhanuh
Kishkindhadvaramasadya praviveshanivaritah
266.13
सक्रोध इति तं मत्वा राजा प्रत्युद्ययौ हरिः
तं सदारो विनीतात्मा सुग्रीवः प्लवगाधिपः
पूजया प्रतिजग्राह प्रीयमाणस्तदर्हया
Sakrodha iti tam matva raja pratyudyayau harih
Tam sadaro vinitatma sugrivah plavagadhipah
Pujaya pratijagraha priyamanastadarhaya
266.14
तमब्रवीद्रामवचः सौमित्रिरकुतोभयः
स तत्सर्वमशेषेण श्रुत्वा प्रह्वः कृताञ्जलिः
Tamabravidramavachah saumitrirakutobhayah
Sa tatsarvamasheshena shrutva prahvah kritanjalih
266.15
सभृत्यदारो राजेन्द्र सुग्रीवो वानराधिपः
इदमाह वचः प्रीतो लक्ष्मणं नरकुञ्जरम्
Sabhrityadaro rajendra sugrivo vanaradhipah
Idamaha vachah prito lakshmanam narakunjaram
266.16
नास्मि लक्ष्मण दुर्मेधा न कृतघ्नो न निर्घृणः
श्रूयतां यः प्रयत्नो मे सीतापर्येषणे कृतः
Nasmi lakshmana durmedha na kritaghno na nirghrinah
Shruyatam yah prayatno me sitaparyeshane kritah
266.17
दिशः प्रस्थापिताः सर्वे विनीता हरयो मया
सर्वेषां च कृतः कालो मासेनागमनं पुनः
Dishah prasthapitah sarve vinita harayo maya
Sarvesham cha kritah kalo masenagamanam punah
266.18
यैरियं सवना साद्रिः सपुरा सागराम्बरा
विचेतव्या मही वीर सग्रामनगराकरा
Yairiyam savana sadrih sapura sagarambara
Vichetavya mahi vira sagramanagarakara
266.19
स मासः पञ्चरात्रेण पूर्णो भवितुमर्हति
ततः श्रोष्यसि रामेण सहितः सुमहत्प्रियम्
Sa masah pancharatrena purno bhavitumarhati
Tatah shroshyasi ramena sahitah sumahatpriyam
266.20
इत्युक्तो लक्ष्मणस्तेन वानरेन्द्रेण धीमता
त्यक्त्वा रोषमदीनात्मा सुग्रीवं प्रत्यपूजयत्
Ityukto lakshmanastena vanarendrena dhimata
Tyaktva roshamadinatma sugrivam pratyapujayat
266.21
स रामं सहसुग्रीवो माल्यवत्पृष्ठमास्थितम्
अभिगम्योदयं तस्य कार्यस्य प्रत्यवेदयत्
Sa ramam sahasugrivo malyavatprishthamasthitam
Abhigamyodayam tasya karyasya pratyavedayat
266.22
इत्येवं वानरेन्द्रास्ते समाजग्मुः सहस्रशः
दिशस्तिस्रो विचित्याथ न तु ये दक्षिणां गताः
Ityevam vanarendraste samajagmuh sahasrashah
Dishastisro vichityatha na tu ye dakshinam gatah
266.23
आचख्युस्ते तु रामाय महीं सागरमेखलाम्
विचितां न तु वैदेह्या दर्शनं रावणस्य वा
Achakhyuste tu ramaya mahim sagaramekhalam
Vichitam na tu vaidehya darshanam ravanasya va
266.24
गतास्तु दक्षिणामाशां ये वै वानरपुंगवाः
आशावांस्तेषु काकुत्स्थः प्राणानार्तोऽप्यधारयत्
Gatastu dakshinamasham ye vai vanarapungavah
Ashavansteshu kakutsthah prananartopyadharayat
266.25
द्विमासोपरमे काले व्यतीते प्लवगास्ततः
सुग्रीवमभिगम्येदं त्वरिता वाक्यमब्रुवन्
Dvimasoparame kale vyatite plavagastatah
Sugrivamabhigamyedam tvarita vakyamabruvan
266.26
रक्षितं वालिना यत्तत्स्फीतं मधुवनं महत्
त्वया च प्लवगश्रेष्ठ तद्भुङ्क्ते पवनात्मजः
Rakshitam valina yattatsphitam madhuvanam mahat
Tvaya cha plavagashreshtha tadbhunkte pavanatmajah
266.27
वालिपुत्रोऽङ्गदश्चैव ये चान्ये प्लवगर्षभाः
विचेतुं दक्षिणामाशां राजन्प्रस्थापितास्त्वया
Valiputrongadashchaiva ye chanye plavagarshabhah
Vichetum dakshinamasham rajanprasthapitastvaya
266.28
तेषां तं प्रणयं श्रुत्वा मेने स कृतकृत्यताम्
कृतार्थानां हि भृत्यानामेतद्भवति चेष्टितम्
Tesham tam pranayam shrutva mene sa kritakrityatam
Kritarthanam hi bhrityanametadbhavati cheshtitam
266.29
स तद्रामाय मेधावी शशंस प्लवगर्षभः
रामश्चाप्यनुमानेन मेने दृष्टां तु मैथिलीम्
Sa tadramaya medhavi shashansa plavagarshabhah
Ramashchapyanumanena mene drishtam tu maithilim
266.30
हनूमत्प्रमुखाश्चापि विश्रान्तास्ते प्लवंगमाः
अभिजग्मुर्हरीन्द्रं तं रामलक्ष्मणसंनिधौ
Hanumatpramukhashchapi vishrantaste plavangamah
Abhijagmurharindram tam ramalakshmanasannidhau
266.31
गतिं च मुखवर्णं च दृष्ट्वा रामो हनूमतः
अगमत्प्रत्ययं भूयो दृष्टा सीतेति भारत
Gatim cha mukhavarnam cha drishtva ramo hanumatah
Agamatpratyayam bhuyo drishta siteti bharata
266.32
हनूमत्प्रमुखास्ते तु वानराः पूर्णमानसाः
प्रणेमुर्विधिवद्रामं सुग्रीवं लक्ष्मणं तथा
Hanumatpramukhaste tu vanarah purnamanasah
Pranemurvidhivadramam sugrivam lakshmanam tatha
266.33
तानुवाचागतान्रामः प्रगृह्य सशरं धनुः
अपि मां जीवयिष्यध्वमपि वः कृतकृत्यता
Tanuvachagatanramah pragrihya sasharam dhanuh
Api mam jivayishyadhvamapi vah kritakrityata
266.34
अपि राज्यमयोध्यायां कारयिष्याम्यहं पुनः
निहत्य समरे शत्रूनाहृत्य जनकात्मजाम्
Api rajyamayodhyayam karayishyamyaham punah
Nihatya samare shatrunahritya janakatmajam
266.35
अमोक्षयित्वा वैदेहीमहत्वा च रिपून्रणे
हृतदारोऽवधूतश्च नाहं जीवितुमुत्सहे
Amokshayitva vaidehimahatva cha ripunrane
Hritadarovadhutashcha naham jivitumutsahe
266.36
इत्युक्तवचनं रामं प्रत्युवाचानिलात्मजः
प्रियमाख्यामि ते राम दृष्टा सा जानकी मया
Ityuktavachanam ramam pratyuvachanilatmajah
Priyamakhyami te rama drishta sa janaki maya
266.37
विचित्य दक्षिणामाशां सपर्वतवनाकराम्
श्रान्ताः काले व्यतीते स्म दृष्टवन्तो महागुहाम्
Vichitya dakshinamasham saparvatavanakaram
Shrantah kale vyatite sma drishtavanto mahaguham
266.38
प्रविशामो वयं तां तु बहुयोजनमायताम्
अन्धकारां सुविपिनां गहनां कीटसेविताम्
Pravishamo vayam tam tu bahuyojanamayatam
Andhakaram suvipinam gahanam kitasevitam
266.39
गत्वा सुमहदध्वानमादित्यस्य प्रभां ततः
दृष्टवन्तः स्म तत्रैव भवनं दिव्यमन्तरा
Gatva sumahadadhvanamadityasya prabham tatah
Drishtavantah sma tatraiva bhavanam divyamantara
266.40
मयस्य किल दैत्यस्य तदासीद्वेश्म राघव
तत्र प्रभावती नाम तपोऽतप्यत तापसी
Mayasya kila daityasya tadasidveshma raghava
Tatra prabhavati nama tapotapyata tapasi
266.41
तया दत्तानि भोज्यानि पानानि विविधानि च
भुक्त्वा लब्धबलाः सन्तस्तयोक्तेन पथा ततः
Taya dattani bhojyani panani vividhani cha
Bhuktva labdhabalah santastayoktena patha tatah
266.42
निर्याय तस्मादुद्देशात्पश्यामो लवणाम्भसः
समीपे सह्यमलयौ दर्दुरं च महागिरिम्
Niryaya tasmaduddeshatpashyamo lavanambhasah
Samipe sahyamalayau darduram cha mahagirim
266.43
ततो मलयमारुह्य पश्यन्तो वरुणालयम्
विषण्णा व्यथिताः खिन्ना निराशा जीविते भृशम्
Tato malayamaruhya pashyanto varunalayam
Vishanna vyathitah khinna nirasha jivite bhrisham
266.44
अनेकशतविस्तीर्णं योजनानां महोदधिम्
तिमिनक्रझषावासं चिन्तयन्तः सुदुःखिताः
Anekashatavistirnam yojananam mahodadhim
Timinakrajhashavasam chintayantah suduhkhitah
266.45
तत्रानशनसंकल्पं कृत्वासीना वयं तदा
ततः कथान्ते गृध्रस्य जटायोरभवत्कथा
Tatranashanasankalpam kritvasina vayam tada
Tatah kathante gridhrasya jatayorabhavatkatha
266.46
ततः पर्वतशृङ्गाभं घोररूपं भयावहम्
पक्षिणं दृष्टवन्तः स्म वैनतेयमिवापरम्
Tatah parvatashringabham ghorarupam bhayavaham
Pakshinam drishtavantah sma vainateyamivaparam
266.47
सोऽस्मानतर्कयद्भोक्तुमथाभ्येत्य वचोऽब्रवीत्
भोः क एष मम भ्रातुर्जटायोः कुरुते कथाम्
Sosmanatarkayadbhoktumathabhyetya vachobravit
Bhoh ka esha mama bhraturjatayoh kurute katham
266.48
संपातिर्नाम तस्याहं ज्येष्ठो भ्राता खगाधिपः
अन्योन्यस्पर्धयारूढावावामादित्यसंसदम्
Sampatirnama tasyaham jyeshtho bhrata khagadhipah
Anyonyaspardhayarudhavavamadityasansadam
266.49
ततो दग्धाविमौ पक्षौ न दग्धौ तु जटायुषः
तदा मे चिरदृष्टः स भ्राता गृध्रपतिः प्रियः
निर्दग्धपक्षः पतितो ह्यहमस्मिन्महागिरौ
Tato dagdhavimau pakshau na dagdhau tu jatayushah
Tada me chiradrishtah sa bhrata gridhrapatih priyah
Nirdagdhapakshah patito hyahamasminmahagirau
266.50
तस्यैवं वदतोऽस्माभिर्हतो भ्राता निवेदितः
व्यसनं भवतश्चेदं संक्षेपाद्वै निवेदितम्
Tasyaivam vadatosmabhirhato bhrata niveditah
Vyasanam bhavatashchedam sankshepadvai niveditam
266.51
स संपातिस्तदा राजञ्श्रुत्वा सुमहदप्रियम्
विषण्णचेताः पप्रच्छ पुनरस्मानरिंदम
Sa sampatistada rajanshrutva sumahadapriyam
Vishannachetah paprachchha punarasmanarindama
266.52
कः स रामः कथं सीता जटायुश्च कथं हतः
इच्छामि सर्वमेवैतच्छ्रोतुं प्लवगसत्तमाः
Kah sa ramah katham sita jatayushcha katham hatah
Ichchhami sarvamevaitachchhrotum plavagasattamah
266.53
तस्याहं सर्वमेवैतं भवतो व्यसनागमम्
प्रायोपवेशने चैव हेतुं विस्तरतोऽब्रुवम्
Tasyaham sarvamevaitam bhavato vyasanagamam
Prayopaveshane chaiva hetum vistaratobruvam
266.54
सोऽस्मानुत्थापयामास वाक्येनानेन पक्षिराट्
रावणो विदितो मह्यं लङ्का चास्य महापुरी
Sosmanutthapayamasa vakyenanena pakshirat
Ravano vidito mahyam lanka chasya mahapuri
266.55
दृष्टा पारे समुद्रस्य त्रिकूटगिरिकन्दरे
भवित्री तत्र वैदेही न मेऽस्त्यत्र विचारणा
Drishta pare samudrasya trikutagirikandare
Bhavitri tatra vaidehi na mestyatra vicharana
266.56
इति तस्य वचः श्रुत्वा वयमुत्थाय सत्वराः
सागरप्लवने मन्त्रं मन्त्रयामः परंतप
Iti tasya vachah shrutva vayamutthaya satvarah
Sagaraplavane mantram mantrayamah parantapa
266.57
नाध्यवस्यद्यदा कश्चित्सागरस्य विलङ्घने
ततः पितरमाविश्य पुप्लुवेऽहं महार्णवम्
शतयोजनविस्तीर्णं निहत्य जलराक्षसीम्
Nadhyavasyadyada kashchitsagarasya vilanghane
Tatah pitaramavishya pupluveham maharnavam
Shatayojanavistirnam nihatya jalarakshasim
266.58
तत्र सीता मया दृष्टा रावणान्तःपुरे सती
उपवासतपःशीला भर्तृदर्शनलालसा
जटिला मलदिग्धाङ्गी कृशा दीना तपस्विनी
Tatra sita maya drishta ravanantahpure sati
Upavasatapahshila bhartridarshanalalasa
Jatila maladigdhangi krisha dina tapasvini
266.59
निमित्तैस्तामहं सीतामुपलभ्य पृथग्विधैः
उपसृत्याब्रुवं चार्यामभिगम्य रहोगताम्
Nimittaistamaham sitamupalabhya prithagvidhaih
Upasrityabruvam charyamabhigamya rahogatam
266.60
सीते रामस्य दूतोऽहं वानरो मारुतात्मजः
त्वद्दर्शनमभिप्रेप्सुरिह प्राप्तो विहायसा
Site ramasya dutoham vanaro marutatmajah
Tvaddarshanamabhiprepsuriha prapto vihayasa
266.61
राजपुत्रौ कुशलिनौ भ्रातरौ रामलक्ष्मणौ
सर्वशाखामृगेन्द्रेण सुग्रीवेणाभिपालितौ
Rajaputrau kushalinau bhratarau ramalakshmanau
Sarvashakhamrigendrena sugrivenabhipalitau
266.62
कुशलं त्वाब्रवीद्रामः सीते सौमित्रिणा सह
सखिभावाच्च सुग्रीवः कुशलं त्वानुपृच्छति
Kushalam tvabravidramah site saumitrina saha
Sakhibhavachcha sugrivah kushalam tvanuprichchhati
266.63
क्षिप्रमेष्यति ते भर्ता सर्वशाखामृगैः सह
प्रत्ययं कुरु मे देवि वानरोऽस्मि न राक्षसः
Kshiprameshyati te bharta sarvashakhamrigaih saha
Pratyayam kuru me devi vanarosmi na rakshasah
266.64
मुहूर्तमिव च ध्यात्वा सीता मां प्रत्युवाच ह
अवैमि त्वां हनूमन्तमविन्ध्यवचनादहम्
Muhurtamiva cha dhyatva sita mam pratyuvacha ha
Avaimi tvam hanumantamavindhyavachanadaham
266.65
अविन्ध्यो हि महाबाहो राक्षसो वृद्धसंमतः
कथितस्तेन सुग्रीवस्त्वद्विधैः सचिवैर्वृतः
Avindhyo hi mahabaho rakshaso vriddhasammatah
Kathitastena sugrivastvadvidhaih sachivairvritah
266.66
गम्यतामिति चोक्त्वा मां सीता प्रादादिमं मणिम्
धारिता येन वैदेही कालमेतमनिन्दिता
Gamyatamiti choktva mam sita pradadimam manim
Dharita yena vaidehi kalametamanindita
266.67
प्रत्ययार्थं कथां चेमां कथयामास जानकी
क्षिप्तामिषीकां काकस्य चित्रकूटे महागिरौ
भवता पुरुषव्याघ्र प्रत्यभिज्ञानकारणात्
Pratyayartham katham chemam kathayamasa janaki
Kshiptamishikam kakasya chitrakute mahagirau
Bhavata purushavyaghra pratyabhigyanakaranat
266.68
श्रावयित्वा तदात्मानं ततो दग्ध्वा च तां पुरीम्
संप्राप्त इति तं रामः प्रियवादिनमर्चयत्
Shravayitva tadatmanam tato dagdhva cha tam purim
Samprapta iti tam ramah priyavadinamarchayat