UtshovChapter 265
265.1
मार्कण्डेय उवाच
ततस्तां भर्तृशोकार्तां दीनां मलिनवाससम्
मणिशेषाभ्यलंकारां रुदतीं च पतिव्रताम्
Markandeya uvacha
Tatastam bhartrishokartam dinam malinavasasam
Manisheshabhyalankaram rudatim cha pativratam
265.2
राक्षसीभिरुपास्यन्तीं समासीनां शिलातले
रावणः कामबाणार्तो ददर्शोपससर्प च
Rakshasibhirupasyantim samasinam shilatale
Ravanah kamabanarto dadarshopasasarpa cha
265.3
देवदानवगन्धर्वयक्षकिंपुरुषैर्युधि
अजितोऽशोकवनिकां ययौ कन्दर्पमोहितः
Devadanavagandharvayakshakimpurushairyudhi
Ajitoshokavanikam yayau kandarpamohitah
265.4
दिव्याम्बरधरः श्रीमान्सुमृष्टमणिकुण्डलः
विचित्रमाल्यमुकुटो वसन्त इव मूर्तिमान्
Divyambaradharah shrimansumrishtamanikundalah
Vichitramalyamukuto vasanta iva murtiman
265.5
स कल्पवृक्षसदृशो यत्नादपि विभूषितः
श्मशानचैत्यद्रुमवद्भूषितोऽपि भयंकरः
Sa kalpavrikshasadrisho yatnadapi vibhushitah
Shmashanachaityadrumavadbhushitopi bhayankarah
265.6
स तस्यास्तनुमध्यायाः समीपे रजनीचरः
ददृशे रोहिणीमेत्य शनैश्चर इव ग्रहः
Sa tasyastanumadhyayah samipe rajanicharah
Dadrishe rohinimetya shanaishchara iva grahah
265.7
स तामामन्त्र्य सुश्रोणीं पुष्पकेतुशराहतः
इदमित्यब्रवीद्बालां त्रस्तां रौहीमिवाबलाम्
Sa tamamantrya sushronim pushpaketusharahatah
Idamityabravidbalam trastam rauhimivabalam
265.8
सीते पर्याप्तमेतावत्कृतो भर्तुरनुग्रहः
प्रसादं कुरु तन्वङ्गि क्रियतां परिकर्म ते
Site paryaptametavatkrito bharturanugrahah
Prasadam kuru tanvangi kriyatam parikarma te
265.9
भजस्व मां वरारोहे महार्हाभरणाम्बरा
भव मे सर्वनारीणामुत्तमा वरवर्णिनि
Bhajasva mam vararohe maharhabharanambara
Bhava me sarvanarinamuttama varavarnini
265.10
सन्ति मे देवकन्याश्च राजर्षीणां तथाङ्गनाः
सन्ति दानवकन्याश्च दैत्यानां चापि योषितः
Santi me devakanyashcha rajarshinam tathanganah
Santi danavakanyashcha daityanam chapi yoshitah
265.11
चतुर्दश पिशाचानां कोट्यो मे वचने स्थिताः
द्विस्तावत्पुरुषादानां रक्षसां भीमकर्मणाम्
Chaturdasha pishachanam kotyo me vachane sthitah
Dvistavatpurushadanam rakshasam bhimakarmanam
265.12
ततो मे त्रिगुणा यक्षा ये मद्वचनकारिणः
केचिदेव धनाध्यक्षं भ्रातरं मे समाश्रिताः
Tato me triguna yaksha ye madvachanakarinah
Kechideva dhanadhyaksham bhrataram me samashritah
265.13
गन्धर्वाप्सरसो भद्रे मामापानगतं सदा
उपतिष्ठन्ति वामोरु यथैव भ्रातरं मम
Gandharvapsaraso bhadre mamapanagatam sada
Upatishthanti vamoru yathaiva bhrataram mama
265.14
पुत्रोऽहमपि विप्रर्षेः साक्षाद्विश्रवसो मुनेः
पञ्चमो लोकपालानामिति मे प्रथितं यशः
Putrohamapi viprarsheh sakshadvishravaso muneh
Panchamo lokapalanamiti me prathitam yashah
265.15
दिव्यानि भक्ष्यभोज्यानि पानानि विविधानि च
यथैव त्रिदशेशस्य तथैव मम भामिनि
Divyani bhakshyabhojyani panani vividhani cha
Yathaiva tridasheshasya tathaiva mama bhamini
265.16
क्षीयतां दुष्कृतं कर्म वनवासकृतं तव
भार्या मे भव सुश्रोणि यथा मन्दोदरी तथा
Kshiyatam dushkritam karma vanavasakritam tava
Bharya me bhava sushroni yatha mandodari tatha
265.17
इत्युक्ता तेन वैदेही परिवृत्य शुभानना
तृणमन्तरतः कृत्वा तमुवाच निशाचरम्
Ityukta tena vaidehi parivritya shubhanana
Trinamantaratah kritva tamuvacha nishacharam
265.18
अशिवेनातिवामोरूरजस्रं नेत्रवारिणा
स्तनावपतितौ बाला सहितावभिवर्षती
उवाच वाक्यं तं क्षुद्रं वैदेही पतिदेवता
Ashivenativamorurajasram netravarina
Stanavapatitau bala sahitavabhivarshati
Uvacha vakyam tam kshudram vaidehi patidevata
265.19
असकृद्वदतो वाक्यमीदृशं राक्षसेश्वर
विषादयुक्तमेतत्ते मया श्रुतमभाग्यया
Asakridvadato vakyamidrisham rakshaseshvara
Vishadayuktametatte maya shrutamabhagyaya
265.20
तद्भद्रसुख भद्रं ते मानसं विनिवर्त्यताम्
परदारास्म्यलभ्या च सततं च पतिव्रता
Tadbhadrasukha bhadram te manasam vinivartyatam
Paradarasmyalabhya cha satatam cha pativrata
265.21
न चैवोपयिकी भार्या मानुषी कृपणा तव
विवशां धर्षयित्वा च कां त्वं प्रीतिमवाप्स्यसि
Na chaivopayiki bharya manushi kripana tava
Vivasham dharshayitva cha kam tvam pritimavapsyasi
265.22
प्रजापतिसमो विप्रो ब्रह्मयोनिः पिता तव
न च पालयसे धर्मं लोकपालसमः कथम्
Prajapatisamo vipro brahmayonih pita tava
Na cha palayase dharmam lokapalasamah katham
265.23
भ्रातरं राजराजानं महेश्वरसखं प्रभुम्
धनेश्वरं व्यपदिशन्कथं त्विह न लज्जसे
Bhrataram rajarajanam maheshvarasakham prabhum
Dhaneshvaram vyapadishankatham tviha na lajjase
265.24
इत्युक्त्वा प्रारुदत्सीता कम्पयन्ती पयोधरौ
शिरोधरां च तन्वङ्गी मुखं प्रच्छाद्य वाससा
Ityuktva prarudatsita kampayanti payodharau
Shirodharam cha tanvangi mukham prachchhadya vasasa
265.25
तस्या रुदत्या भामिन्या दीर्घा वेणी सुसंयता
ददृशे स्वसिता स्निग्धा काली व्यालीव मूर्धनि
Tasya rudatya bhaminya dirgha veni susanyata
Dadrishe svasita snigdha kali vyaliva murdhani
265.26
तच्छ्रुत्वा रावणो वाक्यं सीतयोक्तं सुनिष्ठुरम्
प्रत्याख्यातोऽपि दुर्मेधाः पुनरेवाब्रवीद्वचः
Tachchhrutva ravano vakyam sitayoktam sunishthuram
Pratyakhyatopi durmedhah punarevabravidvachah
265.27
काममङ्गानि मे सीते दुनोतु मकरध्वजः
न त्वामकामां सुश्रोणीं समेष्ये चारुहासिनीम्
Kamamangani me site dunotu makaradhvajah
Na tvamakamam sushronim sameshye charuhasinim
265.28
किं नु शक्यं मया कर्तुं यत्त्वमद्यापि मानुषम्
आहारभूतमस्माकं राममेवानुरुध्यसे
Kim nu shakyam maya kartum yattvamadyapi manusham
Aharabhutamasmakam ramamevanurudhyase
265.29
इत्युक्त्वा तामनिन्द्याङ्गीं स राक्षसगणेश्वरः
तत्रैवान्तर्हितो भूत्वा जगामाभिमतां दिशम्
Ityuktva tamanindyangim sa rakshasaganeshvarah
Tatraivantarhito bhutva jagamabhimatam disham
265.30
राक्षसीभिः परिवृता वैदेही शोककर्शिता
सेव्यमाना त्रिजटया तत्रैव न्यवसत्तदा
Rakshasibhih parivrita vaidehi shokakarshita
Sevyamana trijataya tatraiva nyavasattada