Utshovঅধ্যায় 265
265.1
মার্কণ্ডেয় উবাচ
ততস্তাং ভর্তৃশোকার্তাং দীনাং মলিনবাসসম্
মণিশেষাভ্যলংকারাং রুদতীং চ পতিব্রতাম্
265.2
রাক্ষসীভিরুপাস্যন্তীং সমাসীনাং শিলাতলে
রাবণঃ কামবাণার্তো দদর্শোপসসর্প চ
265.3
দেবদানবগন্ধর্বয়ক্ষকিংপুরুষৈর্যুধি
অজিতোঽশোকবনিকাং যয়ৌ কন্দর্পমোহিতঃ
265.4
দিব্যাম্বরধরঃ শ্রীমান্সুমৃষ্টমণিকুণ্ডলঃ
বিচিত্রমাল্যমুকুটো বসন্ত ইব মূর্তিমান্
265.5
স কল্পবৃক্ষসদৃশো যত্নাদপি বিভূষিতঃ
শ্মশানচৈত্যদ্রুমবদ্ভূষিতোঽপি ভয়ংকরঃ
265.6
স তস্যাস্তনুমধ্যায়াঃ সমীপে রজনীচরঃ
দদৃশে রোহিণীমেত্য শনৈশ্চর ইব গ্রহঃ
265.7
স তামামন্ত্র্য সুশ্রোণীং পুষ্পকেতুশরাহতঃ
ইদমিত্যব্রবীদ্বালাং ত্রস্তাং রৌহীমিবাবলাম্
265.8
সীতে পর্যাপ্তমেতাবত্কৃতো ভর্তুরনুগ্রহঃ
প্রসাদং কুরু তন্বঙ্গি ক্রিয়তাং পরিকর্ম তে
265.9
ভজস্ব মাং বরারোহে মহার্হাভরণাম্বরা
ভব মে সর্বনারীণামুত্তমা বরবর্ণিনি
265.10
সন্তি মে দেবকন্যাশ্চ রাজর্ষীণাং তথাঙ্গনাঃ
সন্তি দানবকন্যাশ্চ দৈত্যানাং চাপি যোষিতঃ
265.11
চতুর্দশ পিশাচানাং কোট্যো মে বচনে স্থিতাঃ
দ্বিস্তাবত্পুরুষাদানাং রক্ষসাং ভীমকর্মণাম্
265.12
ততো মে ত্রিগুণা যক্ষা যে মদ্বচনকারিণঃ
কেচিদেব ধনাধ্যক্ষং ভ্রাতরং মে সমাশ্রিতাঃ
265.13
গন্ধর্বাপ্সরসো ভদ্রে মামাপানগতং সদা
উপতিষ্ঠন্তি বামোরু যথৈব ভ্রাতরং মম
265.14
পুত্রোঽহমপি বিপ্রর্ষেঃ সাক্ষাদ্বিশ্রবসো মুনেঃ
পঞ্চমো লোকপালানামিতি মে প্রথিতং যশঃ
265.15
দিব্যানি ভক্ষ্যভোজ্যানি পানানি বিবিধানি চ
যথৈব ত্রিদশেশস্য তথৈব মম ভামিনি
265.16
ক্ষীয়তাং দুষ্কৃতং কর্ম বনবাসকৃতং তব
ভার্যা মে ভব সুশ্রোণি যথা মন্দোদরী তথা
265.17
ইত্যুক্তা তেন বৈদেহী পরিবৃত্য শুভাননা
তৃণমন্তরতঃ কৃত্বা তমুবাচ নিশাচরম্
265.18
অশিবেনাতিবামোরূরজস্রং নেত্রবারিণা
স্তনাবপতিতৌ বালা সহিতাবভিবর্ষতী
উবাচ বাক্যং তং ক্ষুদ্রং বৈদেহী পতিদেবতা
265.19
অসকৃদ্বদতো বাক্যমীদৃশং রাক্ষসেশ্বর
বিষাদয়ুক্তমেতত্তে ময়া শ্রুতমভাগ্যয়া
265.20
তদ্ভদ্রসুখ ভদ্রং তে মানসং বিনিবর্ত্যতাম্
পরদারাস্ম্যলভ্যা চ সততং চ পতিব্রতা
265.21
ন চৈবোপয়িকী ভার্যা মানুষী কৃপণা তব
বিবশাং ধর্ষয়িত্বা চ কাং ত্বং প্রীতিমবাপ্স্যসি
265.22
প্রজাপতিসমো বিপ্রো ব্রহ্ময়োনিঃ পিতা তব
ন চ পালয়সে ধর্মং লোকপালসমঃ কথম্
265.23
ভ্রাতরং রাজরাজানং মহেশ্বরসখং প্রভুম্
ধনেশ্বরং ব্যপদিশন্কথং ত্বিহ ন লজ্জসে
265.24
ইত্যুক্ত্বা প্রারুদত্সীতা কম্পয়ন্তী পয়োধরৌ
শিরোধরাং চ তন্বঙ্গী মুখং প্রচ্ছাদ্য বাসসা
265.25
তস্যা রুদত্যা ভামিন্যা দীর্ঘা বেণী সুসংয়তা
দদৃশে স্বসিতা স্নিগ্ধা কালী ব্যালীব মূর্ধনি
265.26
তচ্ছ্রুত্বা রাবণো বাক্যং সীতয়োক্তং সুনিষ্ঠুরম্
প্রত্যাখ্যাতোঽপি দুর্মেধাঃ পুনরেবাব্রবীদ্বচঃ
265.27
কামমঙ্গানি মে সীতে দুনোতু মকরধ্বজঃ
ন ত্বামকামাং সুশ্রোণীং সমেষ্যে চারুহাসিনীম্
265.28
কিং নু শক্যং ময়া কর্তুং যত্ত্বমদ্যাপি মানুষম্
আহারভূতমস্মাকং রামমেবানুরুধ্যসে
265.29
ইত্যুক্ত্বা তামনিন্দ্যাঙ্গীং স রাক্ষসগণেশ্বরঃ
তত্রৈবান্তর্হিতো ভূত্বা জগামাভিমতাং দিশম্
265.30
রাক্ষসীভিঃ পরিবৃতা বৈদেহী শোককর্শিতা
সেব্যমানা ত্রিজটয়া তত্রৈব ন্যবসত্তদা