Utshovঅধ্যায় 264
264.1
মার্কণ্ডেয় উবাচ
ততোঽবিদূরে নলিনীং প্রভূতকমলোত্পলাম্
সীতাহরণদুঃখার্তঃ পম্পাং রামঃ সমাসদৎ
264.2
মারুতেন সুশীতেন সুখেনামৃতগন্ধিনা
সেব্যমানো বনে তস্মিঞ্জগাম মনসা প্রিয়াম্
264.3
বিললাপ স রাজেন্দ্রস্তত্র কান্তামনুস্মরন্
কামবাণাভিসংতপ্তঃ সৌমিত্রিস্তমথাব্রবীৎ
264.4
ন ত্বামেবংবিধো ভাবঃ স্প্রষ্টুমর্হতি মানদ
আত্মবন্তমিব ব্যাধিঃ পুরুষং বৃদ্ধশীলিনম্
264.5
প্রবৃত্তিরুপলব্ধা তে বৈদেহ্যা রাবণস্য চ
তাং ত্বং পুরুষকারেণ বুদ্ধ্যা চৈবোপপাদয়
264.6
অভিগচ্ছাব সুগ্রীবং শৈলস্থং হরিপুংগবম্
ময়ি শিষ্যে চ ভৃত্যে চ সহায়ে চ সমাশ্বস
264.7
এবং বহুবিধৈর্বাক্যৈর্লক্ষ্মণেন স রাঘবঃ
উক্তঃ প্রকৃতিমাপেদে কার্যে চানন্তরোঽভবৎ
264.8
নিষেব্য বারি পম্পায়াস্তর্পয়িত্বা পিতৄনপি
প্রতস্থতুরুভৌ বীরৌ ভ্রাতরৌ রামলক্ষ্মণৌ
264.9
তাবৃশ্যমূকমভ্যেত্য বহুমূলফলং গিরিম্
গির্যগ্রে বানরান্পঞ্চ বীরৌ দদৃশতুস্তদা
264.10
সুগ্রীবঃ প্রেষয়ামাস সচিবং বানরং তয়োঃ
বুদ্ধিমন্তং হনূমন্তং হিমবন্তমিব স্থিতম্
264.11
তেন সংভাষ্য পূর্বং তৌ সুগ্রীবমভিজগ্মতুঃ
সখ্যং বানররাজেন চক্রে রামস্ততো নৃপ
264.12
তদ্বাসো দর্শয়ামাসুস্তস্য কার্যে নিবেদিতে
বানরাণাং তু যত্সীতা হ্রিয়মাণাভ্যবাসৃজৎ
264.13
তত্প্রত্যয়করং লব্ধ্বা সুগ্রীবং প্লবগাধিপম্
পৃথিব্যাং বানরৈশ্বর্যে স্বয়ং রামোঽভ্যষেচয়ৎ
264.14
প্রতিজজ্ঞে চ কাকুত্স্থঃ সমরে বালিনো বধম্
সুগ্রীবশ্চাপি বৈদেহ্যাঃ পুনরানয়নং নৃপ
264.15
ইত্যুক্ত্বা সময়ং কৃত্বা বিশ্বাস্য চ পরস্পরম্
অভ্যেত্য সর্বে কিষ্কিন্ধাং তস্থুর্যুদ্ধাভিকাঙ্ক্ষিণঃ
264.16
সুগ্রীবঃ প্রাপ্য কিষ্কিন্ধাং ননাদৌঘনিভস্বনঃ
নাস্য তন্মমৃষে বালী তং তারা প্রত্যষেধয়ৎ
264.17
যথা নদতি সুগ্রীবো বলবানেষ বানরঃ
মন্যে চাশ্রয়বান্প্রাপ্তো ন ত্বং নির্গন্তুমর্হসি
264.18
হেমমালী ততো বালী তারাং তারাধিপাননাম্
প্রোবাচ বচনং বাগ্মী তাং বানরপতিঃ পতিঃ
264.19
সর্বভূতরুতজ্ঞা ত্বং পশ্য বুদ্ধ্যা সমন্বিতা
কেনাপাশ্রয়বান্প্রাপ্তো মমৈষ ভ্রাতৃগন্ধিকঃ
264.20
চিন্তয়িত্বা মুহূর্তং তু তারা তারাধিপপ্রভা
পতিমিত্যব্রবীত্প্রাজ্ঞা শৃণু সর্বং কপীশ্বর
264.21
হৃতদারো মহাসত্ত্বো রামো দশরথাত্মজঃ
তুল্যারিমিত্রতাং প্রাপ্তঃ সুগ্রীবেণ ধনুর্ধরঃ
264.22
ভ্রাতা চাস্য মহাবাহুঃ সৌমিত্রিরপরাজিতঃ
লক্ষ্মণো নাম মেধাবী স্থিতঃ কার্যার্থসিদ্ধয়ে
264.23
মৈন্দশ্চ দ্বিবিদশ্চৈব হনূমাংশ্চানিলাত্মজঃ
জাম্ববানৃক্ষরাজশ্চ সুগ্রীবসচিবাঃ স্থিতাঃ
264.24
সর্ব এতে মহাত্মানো বুদ্ধিমন্তো মহাবলাঃ
অলং তব বিনাশায় রামবীর্যব্যপাশ্রয়াৎ
264.25
তস্যাস্তদাক্ষিপ্য বচো হিতমুক্তং কপীশ্বরঃ
পর্যশঙ্কত তামীর্ষুঃ সুগ্রীবগতমানসাম্
264.26
তারাং পরুষমুক্ত্বা স নির্জগাম গুহামুখাৎ
স্থিতং মাল্যবতোঽভ্যাশে সুগ্রীবং সোঽভ্যভাষত
264.27
অসকৃত্ত্বং ময়া মূঢ নির্জিতো জীবিতপ্রিয়ঃ
মুক্তো জ্ঞাতিরিতি জ্ঞাত্বা কা ত্বরা মরণে পুনঃ
264.28
ইত্যুক্তঃ প্রাহ সুগ্রীবো ভ্রাতরং হেতুমদ্বচঃ
প্রাপ্তকালমমিত্রঘ্নো রামং সংবোধয়ন্নিব
264.29
হৃতদারস্য মে রাজন্হৃতরাজ্যস্য চ ত্বয়া
কিং নু জীবিতসামর্থ্যমিতি বিদ্ধি সমাগতম্
264.30
এবমুক্ত্বা বহুবিধং ততস্তৌ সংনিপেততুঃ
সমরে বালিসুগ্রীবৌ শালতালশিলায়ুধৌ
264.31
উভৌ জঘ্নতুরন্যোন্যমুভৌ ভূমৌ নিপেততুঃ
উভৌ ববল্গতুশ্চিত্রং মুষ্টিভিশ্চ নিজঘ্নতুঃ
264.32
উভৌ রুধিরসংসিক্তৌ নখদন্তপরিক্ষতৌ
শুশুভাতে তদা বীরৌ পুষ্পিতাবিব কিংশুকৌ
264.33
ন বিশেষস্তয়োর্যুদ্ধে তদা কশ্চন দৃশ্যতে
সুগ্রীবস্য তদা মালাং হনূমান্কণ্ঠ আসজৎ
264.34
স মালয়া তদা বীরঃ শুশুভে কণ্ঠসক্তয়া
শ্রীমানিব মহাশৈলো মলয়ো মেঘমালয়া
264.35
কৃতচিহ্নং তু সুগ্রীবং রামো দৃষ্ট্বা মহাধনুঃ
বিচকর্ষ ধনুঃশ্রেষ্ঠং বালিমুদ্দিশ্য লক্ষ্যবৎ
264.36
বিস্ফারস্তস্য ধনুষো যন্ত্রস্যেব তদা বভৌ
বিতত্রাস তদা বালী শরেণাভিহতো হৃদি
264.37
স ভিন্নমর্মাভিহতো বক্ত্রাচ্ছোণিতমুদ্বমন্
দদর্শাবস্থিতং রামমারাত্সৌমিত্রিণা সহ
264.38
গর্হয়িত্বা স কাকুত্স্থং পপাত ভুবি মূর্ছিতঃ
তারা দদর্শ তং ভূমৌ তারাপতিমিব চ্যুতম্
264.39
হতে বালিনি সুগ্রীবঃ কিষ্কিন্ধাং প্রত্যপদ্যত
তাং চ তারাপতিমুখীং তারাং নিপতিতেশ্বরাম্
264.40
রামস্তু চতুরো মাসান্পৃষ্ঠে মাল্যবতঃ শুভে
নিবাসমকরোদ্ধীমান্সুগ্রীবেণাভ্যুপস্থিতঃ
264.41
রাবণোঽপি পুরীং গত্বা লঙ্কাং কামবলাত্কৃতঃ
সীতাং নিবেশয়ামাস ভবনে নন্দনোপমে
অশোকবনিকাভ্যাশে তাপসাশ্রমসংনিভে
264.42
ভর্তৃস্মরণতন্বঙ্গী তাপসীবেষধারিণী
উপবাসতপঃশীলা তত্র সা পৃথুলেক্ষণা
উবাস দুঃখবসতীঃ ফলমূলকৃতাশনা
264.43
দিদেশ রাক্ষসীস্তত্র রক্ষণে রাক্ষসাধিপঃ
প্রাসাসিশূলপরশুমুদ্গরালাতধারিণীঃ
264.44
দ্ব্যক্ষীং ত্র্যক্ষীং ললাটাক্ষীং দীর্ঘজিহ্বামজিহ্বিকাম্
ত্রিস্তনীমেকপাদাং চ ত্রিজটামেকলোচনাম্
264.45
এতাশ্চান্যাশ্চ দীপ্তাক্ষ্যঃ করভোত্কটমূর্ধজাঃ
পরিবার্যাসতে সীতাং দিবারাত্রমতন্দ্রিতাঃ
264.46
তাস্তু তামায়তাপাঙ্গীং পিশাচ্যো দারুণস্বনাঃ
তর্জয়ন্তি সদা রৌদ্রাঃ পরুষব্যঞ্জনাক্ষরাঃ
264.47
খাদাম পাটয়ামৈনাং তিলশঃ প্রবিভজ্য তাম্
যেয়ং ভর্তারমস্মাকমবমন্যেহ জীবতি
264.48
ইত্যেবং পরিভর্ত্সন্তীস্ত্রাস্যমানা পুনঃ পুনঃ
ভর্তৃশোকসমাবিষ্টা নিঃশ্বস্যেদমুবাচ তাঃ
264.49
আর্যাঃ খাদত মাং শীঘ্রং ন মে লোভোঽস্তি জীবিতে
বিনা তং পুণ্ডরীকাক্ষং নীলকুঞ্চিতমূর্ধজম্
264.50
অপ্যেবাহং নিরাহারা জীবিতপ্রিয়বর্জিতা
শোষয়িষ্যামি গাত্রাণি ব্যালী তালগতা যথা
264.51
ন ত্বন্যমভিগচ্ছেয়ং পুমাংসং রাঘবাদৃতে
ইতি জানীত সত্যং মে ক্রিয়তাং যদনন্তরম্
264.52
তস্যাস্তদ্বচনং শ্রুত্বা রাক্ষস্যস্তাঃ খরস্বনাঃ
আখ্যাতুং রাক্ষসেন্দ্রায় জগ্মুস্তত্সর্বমাদিতঃ
264.53
গতাসু তাসু সর্বাসু ত্রিজটা নাম রাক্ষসী
সান্ত্বয়ামাস বৈদেহীং ধর্মজ্ঞা প্রিয়বাদিনী
264.54
সীতে বক্ষ্যামি তে কিংচিদ্বিশ্বাসং কুরু মে সখি
ভয়ং তে ব্যেতু বামোরু শৃণু চেদং বচো মম
264.55
অবিন্ধ্যো নাম মেধাবী বৃদ্ধো রাক্ষসপুংগবঃ
স রামস্য হিতান্বেষী ত্বদর্থে হি স মাবদৎ
264.56
সীতা মদ্বচনাদ্বাচ্যা সমাশ্বাস্য প্রসাদ্য চ
ভর্তা তে কুশলী রামো লক্ষ্মণানুগতো বলী
264.57
সখ্যং বানররাজেন শক্রপ্রতিমতেজসা
কৃতবান্রাঘবঃ শ্রীমাংস্ত্বদর্থে চ সমুদ্যতঃ
264.58
মা চ তেঽস্তু ভয়ং ভীরু রাবণাল্লোকগর্হিতাৎ
নলকূবরশাপেন রক্ষিতা হ্যস্যনিন্দিতে
264.59
শপ্তো হ্যেষ পুরা পাপো বধূং রম্ভাং পরামৃশন্
ন শক্তো বিবশাং নারীমুপৈতুমজিতেন্দ্রিয়ঃ
264.60
ক্ষিপ্রমেষ্যতি তে ভর্তা সুগ্রীবেণাভিরক্ষিতঃ
সৌমিত্রিসহিতো ধীমাংস্ত্বাং চেতো মোক্ষয়িষ্যতি
264.61
স্বপ্না হি সুমহাঘোরা দৃষ্টা মেঽনিষ্টদর্শনাঃ
বিনাশায়াস্য দুর্বুদ্ধেঃ পৌলস্ত্যকুলঘাতিনঃ
264.62
দারুণো হ্যেষ দুষ্টাত্মা ক্ষুদ্রকর্মা নিশাচরঃ
স্বভাবাচ্ছীলদোষেণ সর্বেষাং ভয়বর্ধনঃ
264.63
স্পর্ধতে সর্বদেবৈর্যঃ কালোপহতচেতনঃ
ময়া বিনাশলিঙ্গানি স্বপ্নে দৃষ্টানি তস্য বৈ
264.64
তৈলাভিষিক্তো বিকচো মজ্জন্পঙ্কে দশাননঃ
অসকৃত্খরয়ুক্তে তু রথে নৃত্যন্নিব স্থিতঃ
264.65
কুম্ভকর্ণাদয়শ্চেমে নগ্নাঃ পতিতমূর্ধজাঃ
কৃষ্যন্তে দক্ষিণামাশাং রক্তমাল্যানুলেপনাঃ
264.66
শ্বেতাতপত্রঃ সোষ্ণীষঃ শুক্লমাল্যবিভূষণঃ
শ্বেতপর্বতমারূঢ এক এব বিভীষণঃ
264.67
সচিবাশ্চাস্য চত্বারঃ শুক্লমাল্যানুলেপনাঃ
শ্বেতপর্বতমারূঢা মোক্ষ্যন্তেঽস্মান্মহাভয়াৎ
264.68
রামস্যাস্ত্রেণ পৃথিবী পরিক্ষিপ্তা সসাগরা
যশসা পৃথিবীং কৃত্স্নাং পূরয়িষ্যতি তে পতিঃ
264.69
অস্থিসংচয়মারূঢো ভুঞ্জানো মধুপায়সম্
লক্ষ্মণশ্চ ময়া দৃষ্টো নিরীক্ষন্সর্বতো দিশঃ
264.70
রুদতী রুধিরার্দ্রাঙ্গী ব্যাঘ্রেণ পরিরক্ষিতা
অসকৃত্ত্বং ময়া দৃষ্টা গচ্ছন্তী দিশমুত্তরাম্
264.71
হর্ষমেষ্যসি বৈদেহি ক্ষিপ্রং ভর্তৃসমন্বিতা
রাঘবেণ সহ ভ্রাত্রা সীতে ত্বমচিরাদিব
264.72
ইতি সা মৃগশাবাক্ষী তচ্ছ্রুত্বা ত্রিজটাবচঃ
বভূবাশাবতী বালা পুনর্ভর্তৃসমাগমে
264.73
যাবদভ্যাগতা রৌদ্রাঃ পিশাচ্যস্তাঃ সুদারুণাঃ
দদৃশুস্তাং ত্রিজটয়া সহাসীনাং যথা পুরা